મુખ્યમંત્રી ભૂપેન્દ્ર પટેલની ઉપસ્થિતિમાં ‘ગાંધીનગર લોકસભા પ્રીમિયર લીગ’નો સમાપન સમારંભ યોજાયો

ગાંધીનગર લોકસભા મત વિસ્તારની 1078 જેટલી ટીમો વચ્ચે મેચ યોજાઈ

ખાસ-ખબર ન્યૂઝ ગાંધીનગર, તા.13
મુખ્યમંત્રી ભૂપેન્દ્ર પટેલની ઉપસ્થિતિમાં સાંસદ ખેલકૂદ સ્પર્ધા અંતર્ગત ગાંધીનગર લોકસભા પ્રીમિયર લીગનો સમાપન સમારંભ યોજાયો હતો. ગાંધીનગર લોકસભા મત વિસ્તારની 1078 જેટલી ટીમો વચ્ચે મેચ રમાઈ હતી. આ પ્રસંગે ગૃહ રાજ્યમંત્રી હર્ષ સંઘવી, સહકાર મંત્રી જગદીશભાઈ વિશ્ર્વકર્મા અને બીસીસીઆઈ સેક્રેટરી જય શાહ ઉપસ્થિત રહ્યા હતા.

મુખ્યમંત્રી ભૂપેન્દ્ર પટેલે ટોસ ઉછાળીને ફાઈનલ મેચની શરૂઆત કરાવી હતી, ત્યારબાદ મુખ્યમંત્રી સહિતના મહાનુભાવોએ ઘાટલોડિયા વિધાનસભા અને ગાંધીનગર ઉત્તર વિધાનસભા વચ્ચેની મેચ નિહાળી હતી. આ પ્રસંગે મુખ્યમંત્રી ભૂપેન્દ્ર પટેલે ખેલાડીઓને પ્રોત્સાહિત કર્યા હતા.

ગૃહ રાજ્યમંત્રી હર્ષ સંઘવી તથા બીસીસીઆઈ સેક્રેટરી જય શાહે લાઈવ ક્રિકેટ મેચની મજા માણી હતી. ગાંધીનગર લોકસભા પ્રીમિયર લીગના સમાપન સમારંભ પ્રસંગે રાજ્યસભાના સાંસદ મયંકભાઈ નાયક, ગાંધીનગર લોકસભા મત વિસ્તારના વિધાનસભા ક્ષેત્રોના ધારાસભ્યો, સંગઠનના નેતાઓ તથા પદાધિકારીઓ સહિત મોટી સંખ્યામાં ક્રિકેટરસિકો ઉપસ્થિત રહ્યા હતા.