રૂ.30 કરોડની 5000 ચો. મી. જમીન ખુલ્લી કરાવાઈ
ખાસ-ખબર ન્યૂઝ રાજકોટ
રાજકોટ જિલ્લા કલેકટરની સુચનાનાં પગલે શહેર અને જિલ્લામાં મામલતદારો દ્વારા કિંમતી સરકારી જમીનો ઉપર ગેરકાયદેસર ખડકાઈ ગયેલા દબાણો તોડી પાડવા ઓપરેશન ડિમોલીશન ઝુંબેશ ચાલી રહી છે.આ ઝુંબેશનાં ભાગરૂપે મામલતદારો દ્વારા ધડાધડ ગેરકાયદેસર દબાણો તોડી પાડવામાં આવી રહ્યા છે. ત્યારે આજરોજ સવારથી જિલ્લા કલેકટરનાં આદેશ મુજબ રાજકોટ તાલુકા મામલતદાર અને તેની ટીમ દ્વારા વાવડીના સર્વે નંબરમાં લાંબા સમયથી ખડકાઈ ગયેલા 60 જેટલા ગેરકાયદે દબાણો ઉપર બુલડોઝર ફેરવી દીધુ હતું.
રાજકોટ કલેક્ટર પ્રભવ જોશીના આદેશથી રાજકોટ તાલુકા મામલતદાર ટીમ દ્વારા વાવડીનાં સર્વે નં.149 પૈકીની અને અંદાજીત રૂ.30 કરોડની બજાર કિંમતની 5000 ચો.મી. જેટલી સરકારી જમીન ઉપર લાંબા સમયથી કેટલાક અસામાજીક તત્વો સહિતનાં દબાણકર્તાઓએ કોમર્શિયલ, દારૂના પીઠ્ઠા તથા ઝુંપડા સહિતના 60 દબાણો ગેરકાયદેસર ખડકી દીધા હતા.આ દબાણો કલેકટરનાં ધ્યાને આવતા તેઓએ રાજકોટ તાલુકા મામલતદારને આ દબાણો હટાવી દેવા આદેશ કરવામા આવ્યો હતો.
તાજેતરમાં મામલતદારે દબાણકર્તાઓને સ્વૈચ્છીક રીતે દબાણો હટાવી દેવા નોટીસો ફટકારી હતી છતા નિયત સમયમાં દબાણકર્તાઓએ દબાણો નહી હટાવતા અંતે આજે રાજકોટ તાલુકા મામલતદાર અને તેની ટીમે ચુસ્ત પોલીસ બંદોબસ્ત વચ્ચે 30 કોમર્શિયલ દબાણો અને 30 જેટલા ઝુંપડા તથા ઉપર બુલડોઝર ફેરવી દઈ રૂ. 30 કરોડની સરકારી જમીન દબાણ મુકત કરાવાઈ હતી.
