દિવાળી પૂર્વે બરડા જંગલમાં સફારી શરૂ કરવાની રાજય સરકારની જાહેરાત

પર્યાવરણ સંરક્ષણ અને પ્રવાસનનું અનોખું જોડાણ: બરડા જંગલ સફારી

સફારી શરૂ થવાથી બરડા જંગલમાં પાછા ફરશે ગૌરવમય સિંહની ગાજ

ખાસ-ખબર ન્યૂઝ પોરબંદર, તા.11
દિવાળીની તહેવારની હૂંફ વચ્ચે પોરબંદરના પ્રવાસીઓ અને પ્રકૃતિપ્રેમીઓ માટે ખુશીના સમાચાર આવ્યા છે. પોરબંદર નજીકના બરડા ડુંગરમાં પહેલીવાર જંગલ સફારી શરૂ થવાની તૈયારી ચાલી રહી છે. રાજ્યના વન વિભાગે જાહેરાત કરી છે કે દિવાળી પહેલાં આ સફારી શરુ થઈ જશે, જેનાથી પ્રવાસન ગતિવિધિને મોટો વેગ મળશે અને સ્થાનિક આર્થિક વિકાસને પ્રોત્સાહન મળશે.

બરડા ડુંગરમાં સફારીને એક અનોખી ઉપલબ્ધિ માનવામાં આવી રહી છે. આ ડુંગર સૌરાષ્ટ્રના કેટલાક મહાન પર્યાવરણિક પ્રદેશોમાં ગણાય છે. અહીં, છેલ્લા કેટલાક વર્ષોથી રાજ્ય સરકારના પ્રયાસોથી સિંહોનો પુન:વસવાટ કરાયો છે, જેની સફળતા સાથે જ આ વિસ્તાર હવે એક અભયારણ્યમાં ફેરવાઈ ચૂક્યો છે. બરડા જંગલમાં હાલ ચાર માદા અને એક નર સિંહ વસવાટ કરે છે. તે ઉપરાંત 50થી વધુ દીપડા, નીલગાય, ચિતલ અને અન્ય વન્યજીવ પણ અહીં વસે છે. વન્યજીવનના સંરક્ષણ અને પુન:સ્થાપનના પ્રયાસો હેઠળ જંગલમાં પર્યાવરણને અનુકૂળતાના ઉત્તમ દ્રષ્ટાંત પણ જોવા મળે છે.

સફારીના આયોજનો સાથે રાજ્યના પ્રવાસન ક્ષેત્રમાં નવું પંથ શરૂ થશે. બરડા જંગલ સફારી રાજ્ય સરકારની મહત્વાકાંક્ષી યોજના છે, જે સ્થાનિક તેમજ વિદેશી પ્રવાસીઓને આકર્ષવા માટેની વ્યૂહરચનાનો ભાગ છે.

પોરબંદરના આ પ્રદેશમાં અનોખું કુદરતી સૌંદર્ય અને જૈવિક વિવિધતાનું મિશ્રણ પ્રવાસીઓને પ્રકૃતિની સાથે માનવની ક્રિયાઓની સમાનતા શીખવશે.પ્રવાસન સ્ટ્રેટેજીની સાથે આ સંચાલન સૌરાષ્ટ્રમાં પ્રવાસનને વધુ ઊંચાઈ પર લઇ જશે.

સફારીમાં શું જોવા મળશે?

સફારી પ્રવાસીઓને બરડા જંગલમાં વિમુક્ત કરવામાં આવેલા સિંહો, દીપડા, ચિતલ, નીલગાય સહિત વિવિધ વન્યજીવનની નજરે પળશે. 15 કિલોમીટરના સફારી રૂટ પર સવાર અને સાંજના બે ચક્રોનો અમલ કરવામાં આવશે, જેમાં જીપ્સી દ્વારા પ્રવાસીઓને જંગલનું અનોખું દર્શન કરાવાશે. સફારી દરમિયાન, પ્રવાસીઓને કુદરતી ઝરણાઓ અને ઔષધીય વૃક્ષોનું મોહક દ્રશ્ય પણ જોવા મળશે. બરડા જંગલની આ જૈવ વૈવિધ્યમય વિવિધતા તેને અન્ય વન્યજીવન અભયારણ્યોથી અલગ બનાવે છે.
આ પહેલા સૌરાષ્ટ્રના આ વિસ્તારમાં જંગલ સફારી જેવી કોઈ પણ પર્યટન પ્રવૃત્તિ ઉપલબ્ધ નહોતી. પરંતુ, બરડા ડુંગરની આ સફારીના કારણે પર્યટક આકર્ષણમાં મોટો વધારો જોવા મળશે. જંગલ સફારીથી સ્થાનિક લોકોને રોજગારીની નવી તક મળી શકે છે, તેમજ પોરબંદરના પ્રવાસન વિકાસને પ્રોત્સાહન મળશે.