દર અઠવાડિયે કેટલીક ઘટનાઓ સોશિયલ મીડિયા પર વાયરલ થતી હોય છે. તો, ‘ખાસ ખબર’ આપના સમક્ષ ટ્વિટર, વોટ્સએપ, ફેસબૂક, ઇન્સ્ટાગ્રામ સહિતના સોશિયલ મીડિયા પ્લેટફોર્મ પર ધમધોકાર વાયરલ થયેલી પોસ્ટ્સ પ્રસ્તુત..
પરખ ભટ્ટ
નોરા બહેન, થોડું માપમાં ફેંકો પ્લીઝ!
‘દિલબર’ ફેમ નોરા ફતેહીના એક સ્ટેટમેન્ટને લીધે આ અઠવાડિયે સોશિયલ મીડિયા યુઝર્સને ભરચક વાયરલ કોન્ટેન્ટ મળી ગયું. ઇન્ડિયન આઇડલમાં મહેમાન બનીને આવેલી નોરા ફતેહીએ બોલિવૂડ સિંગર નેહા કક્કરના ખભે હાથ મૂકીને કહ્યું, ‘નેહા કક્કર ભારત માટે હીરો છે અને નેહા કક્કર વગર મ્યુઝિક ઇન્ડસ્ટ્રી કંઈ નથી!’ અને એના આ એક વિધાનને કારણે નેહા અને નોરા બંને ભયંકર ટ્રોલ થયા. ભારત પાસે લત્તા મંગેશકર, એ.આર.રહેમાન, સોનુ નિગમ, કૈલાસ ખેર, અરિજિત સિંઘ, શાન જેવા એક-એકથી ચડિયાતા ગાયકો હોવા છતાં નોરા ફતેહીની આવી કમેન્ટ લોકો માટે હાસ્યાસ્પદ તો બનવાની જ હતી! યુઝર્સે સોશિયલ મીડિયા પર નોરાને આડે હાથ લેતાં લખ્યું કે, ‘બેન.. જરાક માપમાં ફેંકો તો સારી વાત છે. તમને નેહા કક્કરના ગીતો પર સફળતા મળી એનો મતલબ એ નથી કે નેહા જ સર્વસ્વ છે!’
વોટ્સએપની વાયડાઈ!
2016ના અમેરિકન પ્રેસિડેન્શિયલ કેમ્પેઇનથી જ માર્ક ઝકરબર્ગ હવે તો વિવાદોમાં રહેવા ટેવાઈ ગયા છે. એમના પર ફેસબૂક-યુઝર્સના ડેટા ચોરવાનો આરોપ લાગ્યો હતો, જેમાં કેમ્બ્રિજ એનાલિટીકા પણ સંકળાયેલી હતી. ત્યારબાદ થોડા અઠવાડિયા પહેલાં એમના પર સોશિયલ મીડિયા પર આધિપત્ય જમાવવાની કોશિશ કરવાનો આરોપ લગાવવામાં આવ્યો. વોટ્સએપ, ઇન્સ્ટાગ્રામ ખરીદીને ફેસબૂક આખી દુનિયા પર એકહથ્થુ રાજ કરવા માંગે છે, તેવો ખુલાસો થયો. અને હવે, વોટ્સએપની પ્રાઇવસી પોલિસીને લીધે માર્ક ઝકરબર્ગ નવી મુશ્કેલીમાં મૂકાયા છે. આ અઠવાડિયે દુનિયાભરના વોટ્સએપ યુઝર્સના મોબાઇલમાં નવી પ્રાઇવસી પોલિસીનો સ્વીકાર કરવા માટેના નોટિફિકેશન આવ્યા. સાથોસાથ, એમાં ધમકી અપાઈ કે 8 ફેબ્રુઆરી, 2021 પહેલાં જો આ પોલિસીનો સ્વીકાર ન કર્યો તો અકાઉન્ટ સુદ્ધાં ડિલીટ થઈ શકે છે! સામાન્યત: યુઝર્સ માટે ફાયદાકારક હોય તેવી પોલિસી સામે કોઈ વિરોધ નથી ઉઠતો, પરંતુ માર્ક ઝકરબર્ગે નવી પોલિસીમાં સાફ જાહેર કરી દીધું કે વોટ્સએપ યુઝર્સના ડેટા ફેસબૂક સહિતની અન્ય કંપનીઓ સાથે વહેંચી શકાશે. આ વાત દાવાનળની જેમ દુનિયામાં ફેલાઈ અને વોટ્સએપ ખિલાફ દેખાવો શરૂ થયા. ટેસ્લા કંપનીના માલિક એલન મસ્કે તો ત્યાં સુધી કહી દીધું કે, વોટ્સએપને મારો ગોળી! ‘સિગ્નલ’ મેસેજિંગ એપ્લિકેશનનો ઉપયોગ ચાલુ કરી દો! વિશ્વભરમાં અઢી અબજ યુઝર્સ ધરાવતું વોટ્સએપ ધડાકાભેર ડાઉન ગયું. લોકોએ સિગ્નલ અને ટેલિગ્રામ જેવી એપ્સ ડાઉનલોડ કરવાનું શરૂ કરી દીધું. આટઆટલું બની ગયું હોવા છતાં માર્ક ઝકરબર્ગ નમતું જોખવા તૈયાર નથી. તેઓ હજુ પણ પોતાની નવી પ્રાઇવસી પોલિસી અંગે સ્પષ્ટતાઓ આપતા નજરે ચડી રહ્યા છે.
- Advertisement -
સમગ્ર માનવજાત પર તોળાઈ રહેલો રોગ ‘એક્સ’!
હજુ તો કોરોનાનો ખતરો ટળ્યો નથી, ત્યાં વિશ્ર્વ આરોગ્ય સંસ્થા દ્વારા નવા ભયની જાહેરાત કરવામાં આવી છે, જેનું નામ છે: રોગ ‘એક્સ’! ઇબોલા વાયરસને જેમણે સર્વપ્રથમ વખત ઓળખ્યો હતો, એવા પ્રોફેસર જોન-જેક મેમ્બેએ વિશ્વ આરોગ્ય સંસ્થાને જણાવ્યું કે આફ્રિકાના જંગલોમાંથી એક ખતરનાક વિષાણુ માનવજાત વચ્ચે આવી ચૂક્યો છે, જે હજુ સુધી ઓળખી શકાયો નથી. ‘રિપબ્લિક ઑફ ધ કોન્ગો’માં ડોક્ટર્સના ધ્યાનમાં એક એવો દર્દી આવ્યો છે, જેને મગજમાં તાવ ચડી ગયો હતો. ઇબોલા સહિત જાતજાતના વાયરસ અને બેક્ટેરિયા માટેની ટેસ્ટ કરાવ્યા પછી પણ એનું કારણ ડોક્ટર્સ હજુ સુધી જાણી શકાયું નથી. આથી ડોક્ટર્સ દ્વારા તે દર્દીને નામ આપવામાં આવ્યું છે: પેશન્ટ ઝીરો! તેની બિમારી પણ અજાણી હોવાથી રોગને નામ આપવામાં આવ્યું: એક્સ! ડોક્ટર્સના મત મુજબ, આ નવા વિષાણુનો મોર્ટાલિટી રેટ 50-90 ટકા સુધી ઊંચો છે. આનો અર્થ એ થયો કે કોરોના કરતા અનેકગણો ખતરનાક અને જીવલેણ પેથોજન માનવજાત પર ત્રાટકવાની તૈયારી આદરી ચૂક્યો છે. ડોક્ટર્સને ભય છે કે, આ પેથોજનને કારણે સમગ્ર માનવજાતનું નિકંદન નીકળી જાય એટલી ખતરનાક શક્યતા છે! વિશ્વ આરોગ્ય સંસ્થાએ અત્યારથી જ આ નવા રોગ ‘એક્સ’ને પ્રાથમિકતા આપી છે. વિશ્વના પ્રત્યેક દેશો પોતપોતાની હેલ્થકેર સિસ્ટમને સજ્જ રાખે તેવી સૂચના આપી દેવામાં આવી છે. આંતરરાષ્ટ્રીય સ્તર પર તોળાઈ રહેલો આ નવો એપિડેમિક પોતાના ગર્ભમાં શું છુપાવીને બેઠો છે?
વિરૂષ્કાની લક્ષ્મી!
ઇન્ડિયન ક્રિકેટર વિરાટ કોહલી અને એક્ટ્રેસ અનુષ્કા શર્માને ત્યાં આ અઠવાડિયે દીકરીનો જન્મ થયો. સોશિયલ મીડિયા પર ‘કોંગ્રેચ્યુલેશન્સ’થી માંડીને ભાતભાતના મીમ્સ વાયરલ થયા. બીજી વખત ગર્ભવતી બનેલી કરિના કપૂર ખાન સંબંધિત પણ ઘણું કહેવાયું. આ બધાંની વચ્ચે બિચારા અમિતાભ બચ્ચન અડેફેટે ચડી ગયા. એમણે ક્રિકેટરોને ત્યાં દીકરીઓની એક લાંબી યાદી તૈયાર કરીને સોશિયલ મીડિયા પર મૂકી અને છેલ્લે એમાં વિરાટ કોહલીનું નામ પણ ઉમેર્યુ. આ વાંચીને સોશિયલ મીડિયા યુઝર્સે એમની ઝાટકણી કાઢતાં કહ્યું, ‘સાહેબ, હવે અહીંયા તો નેપોટિઝમ રહેવા દો!’ પણ ખેર, આવી એકાદ-બે ઘટનાને બાદ કરતા વિરાટ-અનુષ્કાને ભાગે મોટેભાગે હકારાત્મકતા અને શુભેચ્છાઓનો જ વરસાદ થયો છે. લક્ષ્મી બધાઈ હો, વિરૂષ્કા!
