સાયબર ક્રાઈમના અનેક ફ્રોડ: કુરિયર-લોનના નામે છેતરપિંડી

બેન્ક ખાતામાંથી ઉપડી ગયેલી રકમને પોલીસે પરત અપાવી

ખાસ-ખબર સંવાદદાતા
રાજકોટ શહેરમાં સાયબર ફ્રોડનાં બનાવોમાં સતત વધારો નોંધાઈ રહ્યો છે. જોકે લોકોમાં આ અંગે જાગૃતિ આવતા છેતરપિંડીનો ભોગ બનનાર લોકો પોલીસમાં ફરિયાદ કરતા થયા છે. જેમાં પણ સાયબર હેલ્પલાઇન 1930નો ઉપયોગ સૌથી વધુ લોકો કરી રહ્યા છે, ત્યારે વધુ 4 કિસ્સાઓમાં પોલીસ દ્વારા કુરિયર-લોનના નામે ઓનલાઇન લિંક પર ક્લિક કરાવી છેતરપિંડી તેમજ બેંક ખાતામાંથી ઉપડી ગયેલી રકમને પરત અપાવામાં આવી હતી. પ્રથમ બનાવની વાત કરીએ તો, એક અરજદારના બેંક ખાતામાથી 38,649 રુપિયા તેઓની જાણ બહાર ઉપડી ગયેલા હોવાનું સામે આવ્યું હતું. આ અંગે ભોગ બનનારે સાયબર ક્રાઇમ હેલ્પલાઇન નંબર 1930 ઉપર ફોન કરી પોતાના સાથે બનેલા બનાવની હકીકત વાળી અરજી કરી હતી. આ અરજીની તપાસ ઇ ડીવીઝન પોલીસ મથક ખાતે મોકલવામાં આવેલા જેથી સાયબર ક્રાઇમ ટીમ દ્વારા ટેક્નિકલ એનાલિસિસ કરતા અરજદારના બેંક ખાતામાંથી રકમ એમેઝોન પે થયેલી હોય જે તમામ રકમ અરજદારના બેંક ખાતામાં પરત કરાવ્યા હતા.

બીજા બનાવમાં અરજદારની ઓનલાઇન ટ્રાજેક્શનથી ફ્રોડમાં ગયેલી રકમ 39,996 પરત આપવામાં આવી હતી. જેમાં અરજદારને એરટેલ કંપનીના સીમકાર્ડમાં ઇન્ટરનેટનું ઓનલાઇન રીચાર્જ કરવાનું હોય એરટેલ કંપનીની એપ્લિકેશનમાંથી રૂ.666નું રિચાર્જ કરાવ્યું હતું. જોકે રકમ ડેબિટ થવા છતાં ઈન્ટરનેટ શરૂ નહોતું થયું. આ અંગે એરટેલ કંપનીની રાજકોટની ઓફીસનો રૂબરૂ સંપર્ક કરી કમ્પ્લેન કરી હતી. જોકે બીજા દિવસે અરજદારને અજાણ્યા નંબરમાંથી ફોન આવ્યો હતો. જેમાં આ રકમ રીફંડ કરવાનું કહી એકાઉન્ટ અને ઈટટ નંબર સહિતની વિગતો ફોન કરનારે મેળવી હતી. આ પછી અરજદારના ખાતામાંથી 49,356 ઉપડી ગયા હતા. જે ફ્રોડ થયેલી રકમમાંથી પોલીસે રૂ 39,996 પરત કરાવ્યા હતા.

લોનના ચાર્જ ભરવાનું કહી 54 હજાર ભરાવ્યા
ત્રીજા બનાવમાં અરજદારે ઓનલાઇન લોન લેવા માટે ગુગલમાથી નંબર સર્ચ કરતા સામેવાળા એ અરજદારને લોનના અલગ અલગ ચાર્જ ભરવા કહી 54,000 ભરાવ્યાં હતા. આ અંગેની ફરિયાદ મળતા સામેવાળાના એકાઉન્ટ બ્લોક કરવામાં આવ્યા હતા, ત્યારબાદ નામદાર કોર્ટનો હુકમ મેળવી આરોપીના અલગ અલગ ખાતામાંથી કુલ 33,970 અરજદારના ખાતામાં કોર્ટ હુકમ દ્વારા પરત અપાવ્યા હતા.

કુરિયરના નામે છેતરપિંડી: 63 હજાર ઉપડી ગયા
ચોથા બનાવમાં તમારૂ કુરીયરમાં પાર્સલ આવેલું છે તેમ જણાવી મેસેજમાં લીંક મોકલી 63,000 ઓનલાઇન ઉપાડી લેવાયા હતા. અરજદાર ચંદ્રેશભાઇ વિનોદભાઇ જોટંગીયાને તેમની સાથે ફ્રોડ થયાનું જણાતા 1930માં કોલ કરી પોતાની ઓનલાઇન અરજી નોંધાવી હતી. જે અરજીના કામે ઊંડાણપૂર્વક તપાસ કરી સામેવાળાના ફ્રોડ એકાઉન્ટમાં રકમ હોલ્ડ કરાવી અરજદારની ગયેલ રકમમાંથી રૂ 50,000 પરત અપાવ્યા હતા.