આજથી પતંજલિની પ્રોડક્ટ્સની આ વસ્તુઓનું વેચાણ બંધ

બાબા રામદેવની માલિકીની પતંજલિએ સુપ્રીમ કોર્ટને જાણ કરી છે કે તેણે 14 વસ્તુઓનું વેચાણ બંધ કર્યું છે.

એપ્રિલમાં ઘણી જીવન જરુરી વસ્તુઓના લાઈસન્સ રદ કરી દેવાયાં બાદ આજે બાબા રામદેવની પતંજલિ આયુર્વેદ લિમિટેડે સુપ્રીમ કોર્ટમાં જણાવ્યું હતું કે તેણે 14 ઉત્પાદનોનું વેચાણ અટકાવી દીધું છે. કંપનીએ જસ્ટિસ હિમા કોહલી અને જસ્ટિસ સંદીપ મહેતાની ખંડપીઠને જણાવ્યું કે તેણે 5,606 ફ્રેન્ચાઈઝી સ્ટોર્સને આ પ્રોડક્ટ્સ પાછી ખેંચી લેવાનો નિર્દેશ આપ્યો છે.

14 ચીજોની જાહેરાતો પણ પાછી ખેંચાઈ

પતંજલિ આયુર્વેદે કહ્યું કે મીડિયા પ્લેટફોર્મને પણ આ 14 ઉત્પાદનોની તમામ જાહેરાતો પાછી ખેંચી લેવા માટે સૂચના આપવામાં આવી છે. ખંડપીઠે પતંજલિ આયુર્વેદને બે સપ્તાહની અંદર એફિડેવિટ દાખલ કરવા નિર્દેશ આપ્યો કે શું જાહેરાતો દૂર કરવા માટે સોશિયલ મીડિયા પ્લેટફોર્મ પર કરવામાં આવેલી વિનંતીઓનું પાલન કરવામાં આવ્યું છે અને શું આ 14 ઉત્પાદનો માટેની જાહેરાતો પાછી ખેંચી લેવામાં આવી છે.

IMAની અરજી પર સુપ્રીમ કોર્ટ ગંભીર

ખંડપીઠે કેસની આગામી સુનાવણી 30મી જુલાઈની તારીખ નક્કી કરી છે. સુપ્રીમ કોર્ટ ઇન્ડિયન મેડિકલ એસોસિએશન (IMA) દ્વારા દાખલ કરવામાં આવેલી અરજી પર સુનાવણી કરી રહી છે, જેમાં પતંજલિ પર કોવિડ રસીકરણ અભિયાન અને આધુનિક તબીબી પ્રણાલીઓ વિરુદ્ધ પ્રચાર અભિયાન ચલાવવાનો આરોપ મૂકવામાં આવ્યો છે.

14મીએ પતંજલિને પડ્યો હતો સુપ્રીમનો ઠપકો

સુપ્રીમ કોર્ટે 14 મેના રોજ ભ્રામક જાહેરાતના કેસમાં યોગ ગુરુ રામદેવ, તેમના સહયોગી બાલકૃષ્ણ અને પતંજલિ આયુર્વેદ લિમિટેડને આપવામાં આવેલી અવમાનના નોટિસ પર પોતાનો આદેશ સુરક્ષિત રાખ્યો હતો. સુપ્રીમ કોર્ટના આદેશ બાદ પણ કોર્ટે અનેક પ્રોડક્ટ્સની જાહેરાતો પ્રકાશિત કરવા પર સખત ઠપકો આપ્યો હતો. આ પછી પતંજલિએ જાહેરમાં માફી માગતા કહ્યું કે આ ભૂલનું પુનરાવર્તન નહીં થાય.