રાજકોટ જિલ્લા પંચાયતની સામાન્ય સભામાં વર્ષ 2026-27નું 1193.68 કરોડનું અંદાજપત્ર મંજૂર
ખાસ-ખબર ન્યૂઝ રાજકોટ, તા.27
રાજકોટ જિલ્લા પંચાયતની ખાસ સામાન્ય સભા આજે પ્રમુખ પ્રવિણાબેન રંગાણીના અધ્યક્ષસ્થાને યોજાઈ હતી. આ બેઠકમાં વર્ષ 2026-27 માટેનું રૂ. 1193.68 કરોડનું અંદાજપત્ર સર્વાનુમતે પસાર કરવામાં આવ્યું છે, જેમાં ગ્રામ્ય પ્રજા પર કોઈ પણ પ્રકારનો નવો કરવેરા લાદવામાં આવ્યો નથી. આ સભામાં પક્ષ અને વિપક્ષના 32 પ્રશ્નો રજૂ કરવામાં આવ્યા હતા. જેના સંબંધિત અધિકારીઓએ જવાબ આપ્યા હતા. આ સામાન્ય સભામાં વિપક્ષી નેતા મનસુખ સાકરીયાએ સભામાં હોબાળો મચાવતા રાજકીય વાતાવરણ તંગ બન્યું હતું. બેઠક દરમિયાન પૂર્વ કારોબારી ચેરમેન સહદેવસિંહ જાડેજાએ વિપક્ષી નેતા મનસુખ સાકરીયાએ સિંચાઈ સંબંધિત મામલામાં 2.5 લાખની લાંચ લીધી હોવાના ગંભીર આક્ષેપો કરવામાં આવ્યા હતા.તેમજ સિક્યુરિટી ગાર્ડ પાંડે પાસેથી રૂપિયા 20 હજાર લેવામાં આવ્યા હોવાનો પણ તેમણે દાવો કર્યો હતો. આ આક્ષેપોને પગલે સભામાં ભારે હોબાળો મચ્યો હતો. વિપક્ષના સભ્યો દ્વારા આ આરોપોને નિરાધાર ગણાવી વિરોધ નોંધાવવામાં આવ્યો હતો. મનસુખ સાકરીયાએ સહદેવસિંહ ડોડિયાને કહ્યું હતું કે, તમારી પાસે પુરાવા હોય તો જણાવો. જો કે, આ આક્ષેપ અંગે કોઈ સ્પષ્ટતા સામે આવી નથી. જો આક્ષેપોને લઈને આગળ કાર્યવાહી કરવામાં આવશે તો આવનારા દિવસોમાં રાજકીય પરિસ્થિતિ વધુ ગરમાય તેવી શક્યતા વ્યક્ત કરવામાં આવી રહી છે.
આ બજેટની સૌથી મોટી વિશેષતા એ છે કે તેમાં ગ્રામ્ય પ્રજા પર કોઈ પણ પ્રકારનો નવો કરવેરા નાખવામાં આવ્યો નથી. કુલ બજેટમાંથી રૂ. 1144.13 કરોડ રાજ્ય સરકારની ગ્રાન્ટ, રૂ. 26 કરોડ સ્વભંડોળ અને રૂ. 23.54 કરોડ દેવા વિભાગની જોગવાઈ રાખવામાં આવી છે. બજેટમાં સામાજિક જવાબદારી અને કૃષિ વિકાસ પર વિશેષ ભાર મૂકતા, શહીદ સૈનિકના પરિવારને અપાતી સહાય રૂ. 1 લાખથી વધારીને રૂ. 2 લાખ કરવાની મહત્વપૂર્ણ જાહેરાત કરવામાં આવી છે. આ સભા દરમિયાન 15માં નાણાપંચના વિકાસ કામો અને સ્ટેમ્પ ડ્યુટીની ગ્રાન્ટના કામોની મુદ્દત 31/03/2026 સુધી વધારવાના ઠરાવો મંજૂર કરાયા હતા.
- Advertisement -
રાજકોટ જિલ્લામાં 171 કિમી પર વૃક્ષોનું કટીંગ, સરકારની નીતિ પર સવાલ
એક તરફ સરકાર દ્વારા વૃક્ષારોપણના કાર્યક્રમો યોજાઈ રહ્યા છે, જ્યારે બીજી તરફ 171 કિમી વિસ્તારમાં વૃક્ષોના કટીંગની કામગીરી હાથ ધરાતા પ્રશ્નો ઊભા થયા છે. પર્યાવરણપ્રેમીઓ અને સ્થાનિકોમાં આ મુદ્દે ચર્ચા જાગી છે. જિલ્લા પંચાયતના વિરલ પનારાના માર્ગ અને મકાન વિભાગ દ્વારા કેટલા વૃક્ષોનું કટીંગ કરાયું તેના પ્રશ્નમાં સંબંધિત અધિકારીએ જવાબ આપ્યો હતો કે, રસ્તાને પહોંળા કરવા માટે 171 કિમી વિસ્તારમાં વૃક્ષોનું કટીંગ કરાયું છે. માર્ગ વિસ્તરણ અથવા વિકાસ કામોના ભાગરૂપે આ વૃક્ષોનું કટીંગ કરવામાં આવી રહ્યું હોવાનું જણાવાયુ છે. જો કે, એક તરફ પર્યાવરણ સંરક્ષણના સંદેશા અને બીજી તરફ વૃક્ષોના નાશ વચ્ચે વિરોધાભાસ જોવા મળતા લોકોએ સરકારની નીતિ પર સવાલો ઉઠાવ્યા છે. જિલ્લા પ્રશાસનના અધિકારીઓનું કહેવું છે કે જ્યાં જરૂરી હોય ત્યાં જ કટીંગ કરવામાં આવે છે અને તેના બદલે પૂરક વૃક્ષારોપણ પણ કરવામાં આવશે. છતાં, પર્યાવરણ સંરક્ષણ સાથે વિકાસનું સંતુલન કેવી રીતે જળવાશે તે મુદ્દે ચર્ચા તેજ બની છે.
વર્ષ 2026-27 માટે કુલ રૂ. 1193.68 કરોડની જોગવાઈ
- Advertisement -
કરમુક્ત: ગ્રામ્ય પ્રજા ઉપર કોઈપણ જાતના નવા કરવેરા નાખવામાં આવ્યા નથી.
શહીદ સન્માન: શહીદ થયેલા સૈનિકના પરિવારને અપાતી સહાય રૂ. 1 લાખથી વધારીને રૂ. 2 લાખ કરાઈ
ખેતી અને વેચાણ: પ્રાકૃતિક ખેતી કરતા ખેડૂતો માટે દરેક તાલુકામાં વેચાણ કેન્દ્રો ઊભા કરવા રૂ. 60 લાખની જોગવાઈ
શિક્ષણ અને દીકરીઓ: વિચરતી વિમુક્તિ જાતિની દીકરીઓના શિક્ષણ માટે રૂ. 20 લાખની સહાય જાહેર
પાણી વેરા પ્રોત્સાહન: પાણી વેરાની સારી વસુલાત બદલ 11 તાલુકાના 62 ગામના સરપંચોનું એવોર્ડ આપી સન્માન
ગ્રાન્ટની જાહેરાત: રાજ્ય સરકાર દ્વારા પ્રથમવાર જિલ્લા પંચાયત પ્રમુખને રૂ. 1 કરોડની વાર્ષિક ગ્રાન્ટ ફાળવવામાં આવી
