રશિયા-ચીન ચંદ્ર પર પરમાણુ પ્લાન્ટ બનાવવાની તૈયારીમાં

• આ માટે ટેક્નોલોજી તૈયાર, અમે ન્યૂક્લિયર પાવર પર ચાલતું રોકેટ પણ બનાવીશું: રશિયન સ્પેસ એજન્સી

ખાસ-ખબર સંવાદદાતા
ચીન અને રશિયા સાથે મળીને ચંદ્ર પર પરમાણુ પ્લાન્ટ બનાવવા માગે છે. આ માટે બંને સાથે મળીને કામ કરશે. રશિયન સ્પેસ એજન્સી રોસકોસમોસના સીઈઓ યુરી બોરીસોવે કહ્યું કે 2033-35માં રશિયા અને ચીન સંયુક્ત રીતે ચંદ્રની સપાટી પર પરમાણુ પાવર પ્લાન્ટ સ્થાપશે. બોરીસોવે કહ્યું- આ ન્યુક્લિયર પાવર પ્લાન્ટને ચંદ્રની સપાટી પર લઈ જવા માટે રશિયા ન્યુક્લિયર પાવરથી ચાલતું રોકેટ બનાવશે. આ એક કાર્ગો રોકેટ હશે અને સંપૂર્ણપણે ઓટોમેટિક હશે. તેને ચલાવવા માટે માનવીની કોઈ જરૂર રહેશે નહીં, માનવીએ માત્ર લોન્ચિંગ પર ધ્યાન કેન્દ્રિત કરવું પડશે.

વર્ષ 2021માં જ રશિયા અને ચીને મળીને ચંદ્ર પર સાયન્ટિફિક સ્ટેશન બનાવવાનો રોડમેપ તૈયાર કર્યો હતો. આ માટેની અંતિમ તારીખ 2035 છે. આ તસવીર રશિયાના રાષ્ટ્રપતિ પુતિન (ડાબે) અને ચીનના રાષ્ટ્રપતિ જિનપિંગની છે. (ફાઈલ) બોરીસોવે કહ્યું- આ ન્યુક્લિયર પાવર પ્લાન્ટ ઓટોમેટેડ મોડમાં તૈનાત કરવામાં આવશે.

ચંદ્ર પર પાવર પ્લાન્ટ સ્થાપિત કરતી વખતે, ચંદ્ર પર કોઈ માણસ મોકલવામાં આવશે નહીં. પાવર પ્લાન્ટ બનાવવા માટેની ટેકનોલોજી પૂર્ણ થઈ ગઈ છે. તેમણે કહ્યું- આ પ્રોજેક્ટમાં ટેક્નિકલ ચંદ્ર રોવર્સ હશે, જે સંશોધન કરશે. રોબોટ પણ હશે. અમે ઊર્જા માટે ચંદ્ર પર પરમાણુ પ્લાન્ટ સ્થાપી રહ્યા છીએ. અમે અવકાશમાં કોઈપણ પ્રકારના પરમાણુ હથિયાર મોકલી રહ્યા નથી. અવકાશમાં પરમાણુ શસ્ત્રો ન હોવા જોઈએ.

તાજેતરમાં અમેરિકાએ કહ્યું હતું કે રશિયા સ્પેસ એટેક હથિયાર બનાવી રહ્યું છે. થોડા દિવસો પહેલા વ્હાઇટ હાઉસે પુષ્ટિ કરી હતી કે રશિયા એન્ટી સેટેલાઇટ હથિયાર બનાવી રહ્યું છે. ઉપગ્રહ વિરોધી શસ્ત્રો વડે ઉપગ્રહોને તોડી શકાય છે.બીજા શબ્દોમાં કહીએ તો આ શસ્ત્રો વડે ઉપગ્રહોનો નાશ કરી શકાય છે. જેના કારણે કોમ્યુનિકેશન, નેવિગેશન, સર્વેલન્સ સહિતની ઘણી સુવિધાઓ બંધ થઈ જશે.અમેરિકાની રાષ્ટ્રીય સુરક્ષા પરિષદના પ્રવક્તા જોન કિર્બીએ શુક્રવારે કહ્યું કે રશિયા એન્ટી-સેટેલાઇટ હથિયારો બનાવી રહ્યું છે.

અમેરિકન અધિકારીઓના જણાવ્યા અનુસાર રશિયાએ અમેરિકાના સેટેલાઇટ નેટવર્કને નષ્ટ કરવા માટે આ હથિયાર તૈયાર કર્યું છે. જોકે, રશિયાના નાયબ વિદેશ મંત્રી સર્ગેઈ રાયબકોવે અંતરિક્ષમાં પરમાણુ હથિયારો તૈનાત કરવાના અમેરિકાના અહેવાલોને નકારી કાઢ્યા છે. તેમજ તેને બનાવટી વાર્તા પણ કહી હતી.