“નારી તું નારાયણી” સૂત્ર ગુજરાતની ગ્રામીણ મહિલાઓએ ખરા અર્થમાં ચરિતાર્થ કર્યું: કૃષિ મંત્રી

જૂનાગઢમાં લખપતિ દીદી અભિયાનનો ઉજાસ

ખાસ-ખબર ન્યૂઝ જૂનાગઢ
ભારત સરકારના કૃષિમંત્રી શિવરાજસિંહ ચૌહાણે જૂનાગઢના રાષ્ટ્રીય મગફળી સંશોધન કેન્દ્રની મુલાકાત કરી હતી. આ અવસરે તેમણે ખેડૂતો તથા “લખપતિ દીદીઓ” સાથે આત્મીય સંવાદ સાધ્યો હતો અને કેન્દ્ર સરકારના ગ્રામ વિકાસના વિઝન વિશે સ્પષ્ટ દિશાનિર્દેશ આપ્યો હતો.
મંત્રીએ જણાવ્યું હતું કે વડાપ્રધાન નરેન્દ્ર મોદીના નેતૃત્વમાં મહિલાઓને આત્મનિર્ભર બનાવવા માટે સરકાર દ્રઢ સંકલ્પિત છે. “લખપતિ દીદી” અભિયાન અંતર્ગત વર્ષ 2025 સુધીમાં દેશમાં 2 કરોડ મહિલાઓને વર્ષમાં એક લાખથી વધુ આવકવાળી બનવાનો લક્ષ્યાંક છે. તેમણે જણાવ્યું કે, “જુનાગઢની દીદીઓ તો માત્ર લખપતિ નહીં, પરંતુ મિલેનિયમ દીદી પણ બની રહી છે, જે વાર્ષિક 10 લાખથી વધુ આવક મેળવી રહી છે. આ ગુજરાતના માટે ગૌરવની બાબત છે.” મંત્રી એ મહિલા શક્તિને ‘નારી તું નારાયણી’ સૂત્ર સાથે જોડીને સમાજ અને દેશમાં તેમના યોગદાનની પ્રશંસા કરી. તેમણે કહ્યું કે ગામોની મહિલાઓ ગોબરમાંથી ગણેશજીની મૂર્તિ બનાવીને લોકલ થી વોકલ અભિયાનમાં જોડાઈ રહી છે. તેઓએ જણાવ્યું કે ભારતનું નવનિર્માણ મહિલાઓના પરિશ્રમથી શક્ય બનશે.

આ પ્રસંગે મંત્રીશ્રીએ કૃષિ વિષયક વિવિધ વિષયોની ચર્ચા કરતા જણાવ્યું કે ખેડૂત એ કૃષિની આત્મા છે. ખેતી ભારતની અર્થવ્યવસ્થાનું આધારસ્તંભ છે અને સરકાર ખેડૂતના કલ્યાણ માટે સતત પ્રયત્નશીલ છે. પ્રાકૃતિક ખેતીમાં ગુજરાત એ આગવી પહેલ કરી છે અને ખેડૂતોના ઉત્પાદન ખર્ચમાં ઘટાડો કરવા તેમજ (લઘુતમ સહાયકી ભાવ) દ્વારા પાક ખરીદી માટે સરકારે વિવિધ પગલાં લીધા છે. કાર્યક્રમ દરમિયાન “લખપતિ દીદી” સંકલન પુસ્તક તથા રાષ્ટ્રીય મગફળી સંશોધન કેન્દ્રનો વાર્ષિક રિપોર્ટ 2024 મંત્રીએ વિમોચિત કર્યો હતો. એન.આર.એલ.એમ અંતર્ગત બનેલા વિવિધ સ્ત્રીઓના સ્ટોલ તથા પ્રાકૃતિક કૃષિના સ્ટોલની મંત્રીએ મુલાકાત લીધી હતી અને મહિલાઓની ઉત્પાદન ક્ષમતા જોઈને પ્રશંસા વ્યક્ત કરી હતી.આ પ્રસંગે મંત્રીએ સફળ લેખિત દીદીઓનું સન્માન પણ કર્યું હતું. કાર્યક્રમના આરંભમાં ડો. ડી.કે. યાદવે ભારત સરકારના કૃષિ સંશોધન વિભાગ તરફથી સંક્ષિપ્ત અભિપ્રાય રજૂ કર્યો હતો. મગફળી સંશોધન કેન્દ્રના નિર્દેશક ડો. એસ.કે. બેરાએ સંસ્થાની પ્રગતિનું વર્ણન કર્યું હતું. આ કાર્યક્રમમાં સાંસદ રાજેશ ચુડાસમા, ધારાસભ્ય અરવિંદ લાડાણી, મેયર ધર્મેશભાઈ પોશીયા, કલેક્ટર, કૃષિ યુનિવર્સિટીના કુલપતિ સહિત અનેક અગ્રણીઓ તથા મોટી સંખ્યામાં ખેડૂત અને બહેનો હાજર રહ્યા હતા.