આંતરરાષ્ટ્રીય એરપોર્ટની કામગીરી ઝડપી બનાવવા સમીક્ષા બેઠક: 2023 સુધીમાં હિરાસર એરપોર્ટ તૈયાર થવાની શક્યતા

હિરાસર એરપોર્ટના રન-વે હેઠળ પાણીનો પ્રવાહ પસાર થતો રહેવા દેવા થતી બોકસ કલવર્ટની ડિઝાઈન ન મળતાં અત્યાર સુધી કામ કાચબાની ગતિએ 

ખાસ-ખબર સંવાદદાતા
રાજકોટથી આશરે 30 કિલોમીટર દૂર આવેલા હિરાસર ખાતે નિર્માણાધીન આંતરરાષ્ટ્રીય વિમાન મથક લગભગ માર્ચ 2023 સુધીમાં પૂર્ણ થશે અને આ પ્રોજેકટનો પ્રથમ તબક્કો ઓગસ્ટ 2022 સુધીમાં પૂર્ણ થવાની ધારણા છે. 1025 હેકટરમાં ફેલાયેલ આંતરરાષ્ટ્રીય એરપોર્ટ રાજકોટ-અમદાવાદ હાઈવે પર બનાવવામાં આવી રહ્યું છે ત્યારે આ એરપોર્ટની કામની સમીક્ષા અંગે ઉડ્ડયન વિભાગના અધિકારીઓ સાથે આજે સાંજે રિવ્યુ મિટીંગ યોજાવાની છે તેવું રાજકોટ જિલ્લા કલેકટર અરૂણ મહેશ બાબુએ જણાવ્યું હતું.

વધુમાં કલેકટરે જણાવ્યું હતું કે 1025 હેકટરમાં ફેલાયેલ આંતરરાષ્ટ્રીય એરપોર્ટની કામગીરીની સમીક્ષા બેઠક આજે સાંજે યોજાશે. આ ઉપરાંત જે રન-વે નીચેથી કોઝવે પસાર થઈ રહ્યો છે તેની ડિઝાઈન ઉડ્ડયન વિભાગ દ્વારા દિલ્હી મોકલી આપવામાં આવી છે. આ અંગે ઝડપી યોગ્ય કામગીરી થાય તે માટે કલેકટર કમર કસી રહ્યા છે. આ ઉપરાંત આ પ્રોજેકટથી સ્થાનિક લોકોને રોજગારી મળશે તેમજ સમગ્ર સૌરાષ્ટ્રને ફાયદો થશે. હાલમાં રાજકોટ એરપોર્ટ પરથી દર વર્ષે 4 લાખ સ્થાનિક પ્રવાસીઓ ઉડાન ભરે છે.

2023 સુધીમાં આ સંખ્યા વાર્ષિક છ લાખ પ્રવાસીઓ સુધી પહોંચવાની ધારણા છે. હિરાસર એરપોર્ટ રન-વે હેઠળથી પાણીનો પ્રવાહ પસાર થતો રહેવા દેવા બોક્સ કલવર્ટ પદ્ધતિ અપનાવવામાં આવી રહી છે પરંતુ તેની ડિઝાઈન ઝડપથી બનાવવા દિલ્હી ખાતે મોકલી આપવામાં આવી છે. આમ આ કારણોસર અત્યાર સુધી રન-વેનું કામ હાલ ગો-સ્લો મોશનમાં ચાલી રહ્યું છે ત્યારે આ કામની ગતિ વધારવા કલેકટર આજરોજ મિટીંગ યોજશે.