અમેરિકાના ફ્લોરિડામાં ઇડાલિયા વાવાઝોડાને કારણે રેડ એલર્ટ

ખાસ-ખબર સંવાદદાતા
અમેરિકાના ફ્લોરિડામાં વિનાશક વાવાઝોડાને કારણે રેડ એલર્ટ જાહેર કરવામાં આવ્યું છે. આ વાવાઝોડાને ઇડાલિયા નામ આપવામાં આવ્યું છે જે ફ્લોરિડાના ગલ્ફ કોસ્ટ તરફ આગળ વધી રહ્યું છે, અને તે વધુ તીવ્ર બન્યું છે. આ વાવાઝોડાને કારણે 100 માઈલ પ્રતિ કલાકની ઝડપે પવન ફૂંકાઈ રહ્યો છે. ઇડાલિયા આજે દક્ષિણ જ્યોર્જિયા તરફ આગળ વધે તેવી શક્યતાઓ છે.
અમેરિકાના ફ્લોરિડામાં ઇડાલિયા વાવાઝોડાની તીવ્રતાને જોતા વહીવટીતંત્ર દ્વારા દરિયાકાંઠાના વિસ્તારોમાં એલર્ટ જાહેર કરવામાં આવ્યું છે. પ્રશાસને દરિયાકિનારાની નજીક રહેતા લોકોને ભારે પવન અને પૂરના જોખમથી બચવા માટે આવશ્ર્યક ચીજવસ્તુઓ સાથે સલામત સ્થળે સ્થળાંતર કરવા વિનંતી કરી છે. અધિકારીઓએ સીડર ટાપુના રહેવાસીઓને ચેતવણી આપી છે કે ઇડાલિયાથી તોફાન ખૂબ વધારે ઘાતક હોઈ શકે છે. લગભગ 15 ફૂટ ઊંચા મોજા ઉછળવાની શક્યતા છે. વહીવટીતંત્રે અહીં રહેતા 900 પરિવારોને તોફાનથી બચવા માટે તેમના ઘર છોડીને સુરક્ષિત સ્થળો પર જવાની અપીલ કરી છે. વહીવટી અધિકારીઓએ જણાવ્યું હતું કે લોકોએ શક્ય તેટલી વહેલી તકે દરિયાકાંઠાના વિસ્તારો ખાલી કરવા જોઈએ અને સુરક્ષિત સ્થળોએ જવું જોઈએ.
ઈડાલિયા વાવાઝોડાના કારણે પ્રશાસને દક્ષિણ કેરોલિનામાં ઈમરજન્સી જાહેર કરી દીધી છે. મિયામીમાં નેશનલ હરિકેન સેન્ટરના જણાવ્યા અનુસાર, દરિયાકાંઠે પહોંચતા પહેલા આ વાવાઝોડાની ઝડપ વધુ વધશે. હાલ વહીવટી તંત્ર કોઈપણ પ્રકારની આફતને પહોંચી વળવા માટે સંપૂર્ણ રીતે તૈયાર છે.