રામ રહીમ ફરી 21 દિવસની રજા પર જેલની બહાર આવ્યો

રામ રહીમના અનુયાયીઓમાં આનંદનો માહોલ

હરિયાણા સરકારે ફરી એકવાર ડેરા સચ્ચા સૌદાના વડા અને બળાત્કાર કેસમાં સજા કાપી રહેલા ગુરમીત રામ રહીમ સિંહ પ્રત્યે ઉદારતા દાખવી છે. તે ફરીથી 21 દિવસની રજા પર જેલની બહાર આવ્યો છે. રામ રહીમને કડક સુરક્ષા વચ્ચે સુનારિયા જેલમાંથી સિરસા સ્થિત ડેરા મુખ્યાલય મોકલવામાં આવ્યો હતો. રામ રહીમની મુક્તિના સમાચાર આવતાની સાથે જ દરેક ખૂણે પોલીસ દળ તૈનાત કરી દેવામાં આવ્યું છે. તેમના અનુયાયીઓમાં આનંદનો માહોલ છે.

અગાઉ 28 જાન્યુઆરીએ ડેરા વડાને 30 દિવસના પેરોલ પર મુક્ત કરવામાં આવ્યા હતા, જે 5 ફેબ્રુઆરીએ દિલ્હી વિધાનસભા ચૂંટણીના આઠ દિવસ પહેલા હતા. 28 ફેબ્રુઆરીએ તેમના પેરોલ પૂરા થયા બાદ તેમને સુનારિયા જેલમાં પાછા લાવવામાં આવ્યા હતા. ગયા વર્ષે ઓક્ટોબરમાં, તેમને હરિયાણામાં ચૂંટણીના ત્રણ દિવસ પહેલા 20 દિવસના પેરોલ આપવામાં આવ્યા હતા. જેલ અધિકારીઓના જણાવ્યા અનુસાર ગુરમીત રામ રહીમને બુધવારે સવારે મુક્ત કરવામાં આવ્યો હતો અને તેઓ સિરસામાં ડેરા મુખ્યાલય જવા રવાના થયા હતા, જ્યાં તેઓ 2017 માં દોષિત ઠેરવ્યા પછી બીજી વખત મુલાકાત લઈ રહ્યા છે. “આ વખતે, તેઓ સિરસાના કેમ્પમાં 21 દિવસની રજા વિતાવશે,”

મોટાભાગના પ્રસંગોએ ગુરમીત રામ રહીમની પેરોલ અને રજા ચૂંટણી સાથે જ મળી છે. ગયા વર્ષે ઓક્ટોબરમાં હરિયાણા વિધાનસભા ચૂંટણીના ત્રણ દિવસ પહેલા તેમને 20 દિવસના પેરોલ આપવામાં આવ્યા હતા. ગયા વર્ષે જાન્યુઆરીમાં તેમને ૫૦ દિવસ માટે અને પછી 13  ઓગસ્ટ 2024ના રોજ 21 દિવસ માટે મુક્ત કરવામાં આવ્યા હતા. રાજસ્થાન વિધાનસભા ચૂંટણી પહેલા નવેમ્બર 2023માં તેમને ૨૯ દિવસના પેરોલ મળ્યા હતા અને હરિયાણામાં પંચાયત ચૂંટણી પહેલા જુલાઈ ૨૦૨૩માં ૩૦ દિવસના પેરોલ પર બહાર આવ્યા હતા. ઓક્ટોબર 2022માં હરિયાણામાં આદમપુર વિધાનસભા પેટાચૂંટણી પહેલા તેમને 40 દિવસના પેરોલ આપવામાં આવ્યા હતા.

આ ઉપરાંત, હરિયાણા મ્યુનિસિપલ કોર્પોરેશનની ચૂંટણી પહેલા જૂન 2022 માં તેમને 30 દિવસનો પેરોલ અને પંજાબ વિધાનસભાની ચૂંટણી પહેલા ફેબ્રુઆરી 2022 માં 21 દિવસનો ફર્લો મળ્યો હતો. 24 ઓક્ટોબર 2020 ના રોજ, ગુરમીત રામ રહીમને ગુરુગ્રામની એક હોસ્પિટલમાં તેની બીમાર માતાને મળવા માટે સૂર્યોદયથી સૂર્યાસ્ત સુધી જેલમાંથી મુક્ત કરવામાં આવ્યો. તમને જણાવી દઈએ કે ગુરમીત રામ રહીમ બળાત્કાર અને હત્યાના કેસમાં સજા કાપી રહ્યા છે. આ પહેલા પણ હરિયાણા સરકારે દયા દાખવી છે. દરેક મહત્વપૂર્ણ ચૂંટણી પહેલા તેમની મુક્તિ અંગે પ્રશ્નો ઉભા થયા છે.

રામ રહીમને વારંવાર જેલમાંથી મુક્ત કરવા સામે સુપ્રીમ કોર્ટમાં એક અરજી પણ દાખલ કરવામાં આવી હતી. જોકે, દેશની સુપ્રીમ કોર્ટે આ કેસની સુનાવણી કરવાનો ઇનકાર કર્યો હતો. આ અરજી શિરોમણી ગુરુદ્વારા પ્રબંધક સમિતિ દ્વારા દાખલ કરવામાં આવી હતી જેમાં રામ રહીમને વારંવાર પેરોલ આપવાના હરિયાણા સરકારના નિર્ણય સામે વાંધો ઉઠાવવામાં આવ્યો હતો.

સુપ્રીમ કોર્ટના ન્યાયાધીશ બીઆર ગવઈ અને ન્યાયાધીશ પ્રશાંત કુમાર મિશ્રાની બેન્ચે કહ્યું હતું કે આ અરજી મોટા જાહેર હિતના મુદ્દાને સંબોધવાને બદલે ફક્ત એક જ વ્યક્તિ વિરુદ્ધ છે. તમને જણાવી દઈએ કે આ પહેલા SGPC એ પંજાબ અને હરિયાણા હાઈકોર્ટનો પણ સંપર્ક કર્યો હતો. શિરોમણી ગુરુદ્વારા પ્રબંધક સમિતિ દ્વારા આરોપ મૂકવામાં આવ્યો હતો કે હરિયાણા સરકાર રામ રહીમને કામચલાઉ મુક્તિ આપીને હરિયાણા ગુડ કન્ડક્ટ પ્રિઝનર્સ (ટેમ્પરરી રિલીઝ) એક્ટ, 2022 ની કલમ 11 હેઠળ પોતાની સત્તાનો દુરુપયોગ કરી રહી છે. SGPCના વકીલે આરોપ લગાવ્યો કે અધિકારીઓએ 2022 અને 2024 વચ્ચે સિંહને વારંવાર પેરોલ અથવા ફર્લો આપ્યો હતો.