રાજુલા: યુવતીની હત્યા કરનાર પ્રેમીની ગણતરીના કલાકોમાં ઝડપી લેતી પોલીસ

ખાસ-ખબર ન્યૂઝ રાજુલા

રાજુલામાં અઢી માસ પહેલા સોનલ કિશનભાઈ ચુડાસમા ગુમ થયાની પોલીસ ફરિયાદ યુવતીની માતાએ નોંધાવી હતી. જે અંગે ગઈકાલે રાજુલા પોલીસે બાબરીયાધાર ગામે સીમ વિસ્તારમાં તપાસ અર્થે ગઈ હતી. ત્યારે યુવતીના 25 ફૂટ ઊંડા કૂવામાંથી યુવતીના અવશેષો મળ્યા હતા અને સોનલ ચુડાસમાની હત્યા થઈ અંગે પોલીસે તપાસનો ધમધમાટ શરૂ કર્યો હતો.

બાબરીયાધાર ગામે સીમમા જોલાપરી નદીના કાંઠે સોનલ ચુડાસમા નામની યુવતીના અવશેષો મળ્યા હતા. 35 વર્ષની સોનલ ચુડાસમા નામની યુવતીનું તેના જ પ્રેમીએ હત્યા કરી હોવાની વિગતો પોલીસ તપાસમાં સામે આવી હતી. સોનલના અગાઉ લગ્ન થયેલા હતા અને હાલ રીસામણે હતી ત્યારે તેને બાબરીયાધારના ભાવેશ રૂખડ પરમાર નામના પરિણિત યુવક સાથે પ્રેમસંબંધ થયો હતો. જેથી સોનલ માતા પિતાને છોડી ત્રણ વર્ષથી ભાવેશ સાથે રહેવા જતી રહી હતી. અગાઉ પતિ-પત્ની અને વો ની ભૂમિકામાં ત્રણેય વ્યક્તિઓ હિંડોરણા ગામે રહેતા હતા. અને હાલમા બાબરીયાધાર રહેતા હતા. અઢી માસથી સોનલ ગુમ થઇ હતી. જ્યારે તેનો પ્રેમી ભાવેશ પરમાર સોનલ હિંડોરણા ગયા બાદ પાછી આવી નથી તેવો જવાબ આપતો હોય સોનલની માતા સવિતાબેન સોલંકીએ રાજુલા પોલીસને જાણ કરી હતી. અને લાંબી તપાસ અને પુછપરછ બાદ ભાવેશે પોલીસ સમક્ષ પ્રેમીકા સોનલની હત્યા કર્યાની કબુલાત આપી હતી. પ્રેમી અને પ્રેમીકા વચ્ચે ઝઘડો થતો હોય પ્રેમીકાની હત્યા કરવાનું નક્કી કરી તે કૂવા કાંઠે લઇ ગયો હતો અને માથામા કુહાડીનો ઘા ઝીંકી હત્યા કરી લાશને કુવામા ફેંકી દીધી હતી.

અવાવરૂ કૂવો હોય અત્યાર સુધી કોઇને જાણ થઇ ન હતી. મૃતક સોનલની હત્યા કર્યા બાદ તેના પ્રેમી ભાવેશ પરમારે કપડા ઉતારી લઇ સળગાવી દીધા હતા. અને લાશને અવાવરૂ કૂવામા નાખ્યા બાદ ઉપર ઝાડી ઝાખરા પણ ઉપર નાખી દીધા હતા. મૃતક સોનલને આગલા ઘરથી 3 સંતાન છે. સોનલના લગ્ન પંદર વર્ષ પહેલા કિશન રવજી ચુડાસમા સાથે થયા હતા. અને દસેક વર્ષ ઘર સંસાર ચાલતા એક દીકરો અને બે દીકરીના જન્મ થયા બાદ પતિ-પત્ની વચ્ચે વિખવાદ થતા બે દીકરીને લઇ તે માવતરે આવતી રહી હતી. બાદ સોનલને ભાવેશ પરમાર સામે પ્રેમ સંબંધ બંધાયો હતો. અને ભાવેશ પરણિત હોવા છતાં તેની જોડે રહેવા આવી ગઈ હતી. હાલ ફોરેન્સિક તપાસ અર્થે લાશને પીએમ માટે માટે ભાવનગર ખસેડાઇ છે.