આર. કે. પ્રોવિઝનમાં મળતાં પનીરમાં તેલની ભેળસેળ: નમૂના સબસ્ટાન્ડર્ડ જાહેર

દિલખુશ, શ્રીનાથજી, જય બાલાજી સહિત ખાણી-પીણીના ધંધાર્થીઓને ત્યાં વાસી ફૂડ મળી આવ્યું

ખાસ-ખબર ન્યૂઝ રાજકોટ, તા.25

રાજકોટ મહાનગરપાલિકાના ફૂડ વિભાગ દ્વારા લેવામાં આવેલ ખાદ્યપદાર્થના 2 નમૂના ફેઈલ (સબસ્ટાન્ડર્ડ) જાહેર થતાં નામદાર એજ્યુડિકેટિંગ ઓફિસર અને નિવાસી અધિક કલેકટર સમક્ષ કેસ ચાલી જતાં કુલ રૂા. 6,50,000 દંડના હુકમ કરવામાં આવ્યો છે, સાથે જ ચોમાસાની ઋતુમાં રોગચાળો ફેલાય નહીં તે માટે ફૂડ વિભાગ દ્વારા ખાણી-પીણીના વેપારીઓને ત્યાં દરોડા પાડવામાં આવ્યા હતા. રાજકોટ મહાનગરપાલિકાના ફૂડ વિભાગ દ્વારા રામનાથપરા, હુસેની ચોક આર. કે. પ્રોવિઝનની સામે પનીર (લુઝ)નો નમૂનો પૃથ્થકરણ રિપોર્ટમાં ફોરેન ફેટ (વનસ્પતિ ફેટ) અને તીલ ઓઈલની હાજરી મળી આવતાં નમૂનો સબસ્ટાન્ડર્ડ જાહેર થયો છે, જે અંગેના કેસમાં એજ્યુડીકેટીંગ ઓફિસર અને નિવાસી અધિક કલેકટર રાજકોટ દ્વારા નમૂનો આપનાર પેઢીના માલિક ઈમ્તિયાઝભાઈ જુમાભાઈ કાણિયાને રૂા. 5,00,000ના દંડનો હુકમ કરવામાં આવ્યો છે તેમજ હાથીખાના શેરી નં. 3 રામનાથ કૃપામાંથી મીઠી ચટણી (પ્રિપર્ડ લુઝ)નો નમૂનો પૃથ્થકરણ રિપોર્ટમાં સિન્થેટીક ફૂડ કલરની હાજરી મળી આવતા નમૂનો સબસ્ટાન્ડર્ડ જાહેર થયો છે. જે અંગેના કેસમાં નામદાર એજ્યુડીકેટીંગ ઓફિસર અને નિવાસી અધિક કલેકટર રાજકોટ દ્વારા નમૂનો આપનાર પેઢીના માલિક ઈશ્ર્વરભાઈ લાલજીભાઈ કાકુને રૂા. 1,50,000નો દંડનો હુકમ કરવામાં આવ્યો છે.

આજરોજ ફૂડ વિભાગ દ્વારા ખાણીપીણીની લારી, હોટેલ, રેસ્ટોરન્ટ વગેરેમાં વિશેષ ચકાસણી ઝુંબેશ હાથ ધરવામાં આવી છે જે અન્વયે ફૂડ વિભાગની ટીમ તથા એફએસડબલ્યુ વાન સાથે સર્વેલન્સ ચેકીંગ દરમિયાન શહેરના એ.જી. ચોક હોકર્સ ઝોન કાલાવાડ રોડ વિસ્તારમાં આવેલા ખાદ્યચીજોનું વેચાણ કરતા કુલ 28 ધંધાર્થીઓની ચકાસણી હાથ ધરવામાં આવી હતી. જેમાં દિલખુશ પાણીપુરીના બટેટા, ઢોકળાનું ખીરું મળી કુલ 7 કિ.ગ્રા., બાલા ચાઈનીઝ પંજાબી આજીનો મોટો 7 કિ.ગ્રા. જયશ્રી રામ ચાઈનીઝ પંજાબી બાંધેલો લોટ, ગાર્લિક પેસ્ટ, હર હર મહાદેવ ચાઈનીઝ ગ્રેવી તથા નુડલ્સ, માહિર મદ્રાસ કાફે બટેટાનો મસાલો, પંજાબી ગ્રેવી તથા આજીનો મોટો, પીઠડ ચાઈનીઝ પંજાબી વાસી પનીર, યશ ફાસ્ટફૂડ મીઠી ચટણી, શ્રીનાથજી ભેળ પાણીપુરી- બાફેલા બટેટા, ભોલા ફાસ્ટફૂડ વાસી પિઝા, રુડી વેજ મોમઝ પનીરનો એમ કુલ 44 કિ.ગ્રા. અખાદ્યચીજનો જથ્થો સ્થળ પર નાશ કરવામાં આવેલો હતો તથા પટેલ ચાઈનીઝ પંજાબી, જય બાલાજી કચ્છી દાબેલી, બજરંગ ઘુઘરા, ભેરુનાથ કસાટા આઈસ્ક્રીમ, જિલ્લાની વડાપાઉં, ક્રિષ્ના પાઉભાજી, જલારામ કોલ્ડ્રિંક્સ, શુભમ સેન્ડવીચ, ગાયત્રી મદ્રાસ કાફે, કિશનભાઈ બટેટાવાળા, શન્નીભાઈ બટેટાવાળા, દેવ ફાસ્ટફૂડ, દેવ મદ્રાસ કાફે, ચાઈનીઝ એક્સપ્રેસ, ક્રિષ્ના ચાઈનીઝ પંજાબ, એનજોય પોઈન્ટ, ઉસ્તાદ કાઠિયાવાડીની ચકાસણી કરવામાં આવી હતી.