રાષ્ટ્રપતિ દ્રૌપદી મુર્મુએ, પ્રથમ જ્યોર્તિલિંગ સોમનાથ મહાદેવના દર્શન કરી આશીર્વાદ લીધા

રાષ્ટ્રપતિ દ્રૌપદી મુર્મુએ આજે સવારે પ્રથમ જ્યોતિર્લિંગ સોમનાથ મહાદેવના દર્શન કરીને આશીર્વાદ લીધા હતા

સોમનાથના દર્શન બાદ રાષ્ટ્રપતિ મુર્મુ સાસણ ગીર જવા રવાના થયા હતા, જ્યાં તેઓ આજે સાંજે સિંહદર્શન કરશે

પ્રથમ રાષ્ટ્રપતિ ડૉ. રાજેન્દ્ર પ્રસાદ, 2009માં પ્રતિભા પાટીલ અને 2018માં રામનાથ કોવિંદે સાસણની મુલાકાત લીધી હતી

રાષ્ટ્રપતિ દ્રૌપદી મુર્મુ ત્રણ દિવસના ગુજરાત પ્રવાસના બીજા દિવસે આજે, શુક્રવારે, રાજ્યના બે મુખ્ય સ્થળો – સોમનાથ અને સાસણ ગીરની મુલાકાત લીધી હતી. તેમના આ પ્રવાસના પગલે ગીર સોમનાથ અને જૂનાગઢ જિલ્લામાં ચુસ્ત સુરક્ષા વ્યવસ્થા ગોઠવી દેવામાં આવી છે.

સોમનાથ મહાદેવના કર્યા દર્શન

રાષ્ટ્રપતિ દ્રૌપદી મુર્મુએ આજે સવારે પ્રથમ જ્યોતિર્લિંગ સોમનાથ મહાદેવના દર્શન કરીને આશીર્વાદ લીધા હતા. સોમનાથ પહોંચતા હેલિપેડ ખાતે રાજ્યના પ્રવાસન મંત્રી મુળુ બેરા સહિતના મહાનુભાવોએ તેમનું સ્વાગત કર્યું હતું. મંદિર પરિસરમાં રાષ્ટ્રપતિએ સૌપ્રથમ સરદાર વલ્લભભાઈ પટેલની પ્રતિમાને પુષ્પાંજલિ અર્પણ કરી હતી. ત્યારબાદ તેમણે સોમનાથ મંદિર ટ્રસ્ટના ટ્રસ્ટીઓ પી.કે. લહેરી અને જે.ડી. પરમાર દ્વારા અભિવાદન સ્વીકાર્યું હતું. રાષ્ટ્રપતિએ સોમનાથ મહાદેવને વિધિવત જળાભિષેક, સોમેશ્વર મહાપૂજા અને ધ્વજપૂજા કરી હતી. રાષ્ટ્રપતિના આગમન સમયે યાત્રિકો માટે દર્શન અટકાવી દેવાયા હતા.

સાસણમાં ‘સિંહ દર્શન’ અને આદિવાસી સમાજ સાથે મુલાકાત

સોમનાથના દર્શન બાદ રાષ્ટ્રપતિ મુર્મુ સાસણ ગીર જવા રવાના થયા હતા, જ્યાં તેઓ આજે સાંજે સિંહદર્શન કરશે. વન વિભાગ દ્વારા રાષ્ટ્રપતિના રૂટ માટે જંગલના માર્ગોનું નિરીક્ષણ, વન્યજીવોનું મોનિટરિંગ અને રૂટની તૈયારીઓને આખરી ઓપ આપી દેવાયો હતો. સાસણ ગીરની મુલાકાત દરમિયાન રાષ્ટ્રપતિ મુર્મુ ગીરમાં વસવાટ કરતા આદિવાસી સમાજના લોકો સાથે મુલાકાત પણ કરશે. તેઓ જંગલના સંરક્ષણમાં આદિવાસીઓના સહયોગી યોગદાનને બિરદાવશે. રાષ્ટ્રપતિ મુર્મુ આજે રાત્રિરોકાણ સાસણમાં જ કરવાના છે અને આવતીકાલે સવારે તેઓ દ્વારકા જવા રવાના થશે.

સાસણની મુલાકાત લેનારાં ચોથાં રાષ્ટ્રપતિ

એશિયાઈ સિંહોનું એકમાત્ર નિવાસસ્થાન ગણાતા સાસણ ગીરની મુલાકાત લેનારાં દ્રૌપદી મુર્મુ ભારતનાં ચોથાં રાષ્ટ્રપતિ બન્યાં છે. અગાઉ 1950માં પ્રથમ રાષ્ટ્રપતિ ડૉ. રાજેન્દ્ર પ્રસાદ, 2009માં પ્રતિભા પાટીલ અને 2018માં રામનાથ કોવિંદે સાસણની મુલાકાત લીધી હતી. રાષ્ટ્રપતિના આગમનના પગલે ગીર સોમનાથ અને જૂનાગઢ જિલ્લામાં ચુસ્ત સુરક્ષા બંદોબસ્ત ગોઠવી દેવાયો છે.