ભક્તિ, શક્તિ અને સંસ્કૃતિના પર્વ નવરાત્રી મહોત્વસની તડામાર તૈયારીઓ

જૂનાગઢમાં નવરાત્રિના પાવન પર્વે મંદિરોમાં વિશેષ આયોજનો

નવરાત્રી પર્વે ગરબા, ચૂંદડી, શણગાર સહિતની ચીજવસ્તુનું આગમન
શહેરમાં પ્રાચીન- અર્વાચીન ગરબીના આયોજકો સુસજ્જ

ખાસ-ખબર ન્યૂઝ  જૂનાગઢ, તા.18

શાંતિ, ભક્તિ અને આરાધનાના પર્વ નવરાત્રિને હવે ગણતરીના દિવસો બાકી છે. માઇ ભક્તોમાં અત્યારથી જ ઉત્સાહનો માહોલ છવાયો છે અને માતાજીની આરાધના માટે તડામાર તૈયારીઓ ચાલી રહી છે. જૂનાગઢ શહેરમાં અને આસપાસના વિસ્તારોમાં આવેલા માતાજીના મંદિરોમાં વિશેષ આયોજનો કરવામાં આવ્યા છે, જ્યારે મુખ્ય બજારોમાં પણ ખરીદીનો માહોલ જામ્યો છે. આ ઉપરાંત, પ્રાચીન અને
અર્વાચીન ગરબાનું પણ ભવ્ય આયોજન થઈ રહ્યું છે.

મંદિરોમાં વિશેષ આયોજન અને મહાઆરતી…
જૂનાગઢના મંદિરોમાં નવરાત્રિ દરમિયાન વિશેષ ધાર્મિક કાર્યક્રમોનું આયોજન કરવામાં આવ્યું છે. ગિરનાર પર્વત પર બિરાજમાન જગત જનની માં અંબાના દરબારમાં નવરાત્રિ પર્વની ઉજવણી ભવ્ય રીતે થશે. અહીં માતાજીના વિશેષ શણગાર, મહાઆરતી અને બેઠા ગરબાનું આયોજન કરવામાં આવ્યું છે. ગિરનાર રોડ પર આવેલ ગાયત્રી મંદિર અને સુપ્રસિદ્ધ વાઘેશ્વરી મંદિર ખાતે પણ આ જ પ્રકારે ભવ્ય અને દિવ્ય ઉજવણી કરવામાં આવશે. ભક્તોને માતાજીના દર્શન, આરતી અને પૂજાનો લાભ મળી રહે તે માટે મંદિરના સમયપત્રકમાં પણ ફેરફાર કરવામાં આવ્યો છે. આઠમના દિવસે બીડું હોમાશે અને યજ્ઞનું આયોજન પણ થશે. આ પવિત્ર દિવસોમાં યજ્ઞમાં આહુતિ આપીને ભક્તો ધન્યતા અનુભવશે.

નવરાત્રિની ખરીદીથી બજારોમાં રોનક…
નવરાત્રિ પર્વને અનુલક્ષીને જૂનાગઢની મુખ્ય બજારોમાં ભારે ભીડ જોવા મળી રહી છે. વેપારીઓ માટે આ નવ દિવસ આર્થિક રીતે પણ ખૂબ મહત્વના હોય છે. માઇ ભક્તો દ્વારા નવરાત્રિની તૈયારીઓ પૂરજોશમાં ચાલી રહી છે, જેના ભાગરૂપે બજારોમાં માતાજીની અવનવી ચૂંદડીઓ, રંગબેરંગી ફુલહાર, અવનવા ગરબા અને દીવડા સહિતની વસ્તુઓનું વેચાણ ધમધમી રહ્યું છે. ખાસ કરીને ગરબા માટેના પરંપરાગત પોશાકો, ઓઢણીઓ અને જ્વેલરીની ખરીદી માટે મહિલાઓ અને યુવતીઓમાં ભારે ઉત્સાહ જોવા મળી રહ્યો છે. વેપારીઓ પણ આ વર્ષે સારા વેપારની આશા રાખી રહ્યા છે.

જૂનાગઢમાં પ્રાચીન અને અર્વાચીન ગરબાનો સંગમ…
જૂનાગઢ શહેર પ્રાચીન અને અર્વાચીન ગરબાના સંગમ માટે જાણીતું છે. આ વર્ષે પણ ગરબાના સંચાલકો દ્વારા તડામાર તૈયારીઓ પૂર્ણતાના આરે છે. શહેરમાં અનેક સ્થળોએ શેરી ગરબીઓનું આયોજન થશે, જેમાં ભક્તો માતાજીની સ્તુતિ અને આરાધના કરશે. આ ઉપરાંત, જુદી – જુદી જ્ઞાતિઓ દ્વારા પાર્ટી પ્લોટમાં પણ અલગ-અલગ જ્ઞાતિઓ દ્વારા ગરબાનું ભવ્ય આયોજન કરવામાં આવ્યું છે.

સામાજિક સમરસતાનો સંદેશ…
આ વખતે નવરાત્રિના આયોજનોમાં સામાજિક સમરસતા પર પણ ખાસ ભાર મૂકવામાં આવ્યો છે. દરેક સમાજ દ્વારા ગરબાના આયોજન સાથે સામાજિક અને લોક ઉપયોગી કાર્યો કરીને એક સારો સંદેશો આપવાનો પ્રયાસ કરવામાં આવ્યો છે. આ કાર્યક્રમો દ્વારા એકતા અને ભાઈચારાની ભાવનાને વધુ મજબૂત બનાવવાનો ઉદ્દેશ છે. સમાજના દરેક વર્ગના લોકો એકસાથે મળીને આ પર્વની ઉજવણી કરશે, જે જૂનાગઢની સંસ્કૃતિ અને પરંપરાને વધુ ઉજાગર કરશે.

માતાજીની શક્તિ પૂજા એટલે નવલી નવરાત્રિ …
નવરાત્રિ એ માતાજીના નવ સ્વરૂપોની પૂજાનું પર્વ છે. આ નવ દિવસ દરમિયાન માઇ ભક્તો ઉપવાસ, જપ, તપ અને ધ્યાન કરીને માતાજીની આરાધના કરે છે. આ પર્વ અસત્ય પર સત્યના વિજયનું પ્રતીક છે અને સમાજમાં શાંતિ, સમૃદ્ધિ અને સકારાત્મકતા લાવવાનું કામ કરે છે.આમ, જૂનાગઢ શહેર ભક્તિ, શક્તિ અને સંસ્કૃતિના આ મહાપર્વની ઉજવણી માટે સંપૂર્ણપણે સજ્જ છે.

વહીવટી તંત્રની તૈયારીઓ…
નવરાત્રિ પર્વને શાંતિપૂર્ણ અને સુવ્યવસ્થિત રીતે સંપન્ન કરવા માટે વહીવટી તંત્ર દ્વારા પણ તમામ જરૂરી વ્યવસ્થા કરવામાં આવી છે. પોલીસ તંત્ર દ્વારા ગરબા સ્થળો અને મંદિરો પર સુરક્ષાની ખાસ વ્યવસ્થા ગોઠવવામાં આવી છે. આ ઉપરાંત, ગરબા આયોજકોને પણ ધ્વનિ પ્રદૂષણ અને અન્ય નિયમોનું પાલન કરવા માટે સૂચના આપવામાં આવી છે.