જિલ્લા કલેકટરના માર્ગદર્શન હેઠળ 15 ઓગસ્ટ પહેલા વિવિધ કાર્યક્રમોનું આયોજન, ‘સ્વચ્છતા’ થીમ પર ભાર
ખાસ-ખબર ન્યૂઝ રાજકોટ
- Advertisement -
આગામી 15 ઓગસ્ટ, સ્વતંત્રતા દિવસ નિમિત્તે રાજ્યભરમાં યોજાનારા ’હર ઘર તિરંગા’ અભિયાનની તૈયારીઓ રાજકોટ જિલ્લામાં શરૂ થઈ ગઈ છે. ગૃહ રાજ્યમંત્રી હર્ષ સંઘવીની વર્ચ્યુઅલ ઉપસ્થિતિમાં યોજાયેલી વીડિયો કોન્ફરન્સ બાદ રાજકોટના કલેક્ટર ડો. ઓમપ્રકાશે વિવિધ વિભાગોના અધિકારીઓ સાથે એક બેઠક યોજી હતી.
આ વર્ષે ’હર ઘર તિરંગા’ કાર્યક્રમની થીમ “હર ઘર તિરંગા, હર ઘર સ્વચ્છતા: સ્વતંત્રતા કા ઉત્સવ સ્વચ્છતા કે સંગ” રાખવામાં આવી છે. આ અભિયાનને બે તબક્કામાં વહેંચવામાં આવ્યું છે:
પ્રથમ તબક્કો (તા. 8 ઓગસ્ટ સુધી): આ તબક્કામાં તમામ શાળાઓમાં દેશભક્તિની ભાવનાને વેગ આપવા માટે વિવિધ સ્પર્ધાઓનું આયોજન કરવામાં આવશે. જેમાં તિરંગા ક્વિઝ, રંગોળી સ્પર્ધા અને પત્ર લેખન સ્પર્ધાનો સમાવેશ થાય છે.
બીજો તબક્કો (તા. 9 થી 12 ઓગસ્ટ): આ સમયગાળા દરમિયાન, ગ્રામ પંચાયતો દ્વારા સફાઈ ઝુંબેશ, તિરંગા યાત્રા અને રેલીઓનું આયોજન કરવામાં આવશે.
કલેક્ટર ડો. ઓમપ્રકાશે બેઠકમાં તમામ અધિકારીઓને આ અભિયાનમાં મોટી સંખ્યામાં નાગરિકો સહભાગી થાય તે માટે વિસ્તૃત ચર્ચા કરીને જરૂરી માર્ગદર્શન આપ્યું હતું. આ અભિયાનનો મુખ્ય ઉદ્દેશ્ય નાગરિકોમાં દેશભક્તિ અને સ્વચ્છતા પ્રત્યે જાગૃતિ ફેલાવવાનો છે.
