પક્ષ પલટીની મૌસમ પૂર બહારમાં ખીલી : વધુ એક લોકપ્રિય અભિનેતા સપામાં ઘર વાપસી કરશે

કોંગ્રેસ પાર્ટી છોડીને દિગ્ગજ નેતા અને અભિનેતા રાજ બબ્બર સમાજવાદી પાર્ટીમાં સામેલ થશે!

પૂર્વ કેન્દ્રીય મંત્રી આરપીએન સિંહના ભારતીય જનતા પાર્ટીમાં ગયા બાદ ઉત્તર પ્રદેશમાં કોંગ્રેસને વધુ એક મોટો ઝટકો લાગવા જઈ રહ્યો છે.

પૂર્વ કેન્દ્રીય મંત્રી આરપીએન સિંહ ભાજપમાં ગયા બાદ ઉત્તર પ્રદેશમાં કોંગ્રેસને વધુ એક મોટો ઝટકો લાગવા જઈ રહ્યો છે. કોંગ્રેસના પૂર્વ પ્રદેશ અધ્યક્ષ અને લોકપ્રિય અભિનેતા રાજબબ્બર ફરી એકવાર સમાજવાદી પાર્ટીમાં જોડાવાની અટકળોમાં છે.

સૂત્રોના જણાવ્યા પ્રમાણે, ટૂંક સમયમાં જ તેઓ સપામાં ઘર વાપસી કરશે. સપાના પ્રવક્તા ફખરુલ હસન ચાંદે આ મુદ્દે નિશાન સાધતા લખ્યું કે, કોંગ્રેસના પૂર્વ પ્રદેશ અધ્યક્ષ, પૂર્વ સમાજવાદી નેતા, લોકપ્રિય અભિનેતા રાજ બબ્બર ટૂંક સમયમાં સમાજવાદી પાર્ટીમાં સામેલ થશે.

રાજ બબ્બરે તેમની રાજકીય કારકિર્દીની જનતા દળ સાથે શરૂઆત કરી હતી. તેઓ 5 વર્ષ સુધી જનતા દળ સાથે રહ્યા બાદ તેઓ સમાજવાદી પાર્ટીમાં જોડાયા હતા. 1994 માં સપાએ તેમને રાજ્યસભામાં મોકલ્યા અને 2004 માં તેઓ સપાની ટિકિટ પર જીતીને પહેલીવાર લોકસભામાં પહોંચ્યા. તેમણે 2006 માં સપા સાથેના સંબંધો તોડી નાખ્યા અને તેઓ 2008 માં કોંગ્રેસમાં જોડાયા.

2009 ની લોકસભા ચૂંટણીમાં તેમણે કોંગ્રેસની ટિકિટ પર ફિરોઝાબાદ બેઠક પરથી અખિલેશ યાદવની પત્ની ડિમ્પલ યાદવને હરાવ્યા હતા. 2014 માં કોંગ્રેસે તેમને ગાઝિયાબાદ બેઠક પરથી જનરલ વીકે સિંહ સામે મેદાનમાં ઉતાર્યા હતા, પરંતુ રાજ બબ્બરને ત્યાં હારનો સામનો કરવો પડ્યો હતો. 2016 માં તેમને યુપી કોંગ્રેસની કમાન સોંપવામાં આવી હતી. રાજ બબ્બર યુપીના ટુંડલાના રહેવાસી છે. તેણે 250 થી વધુ બોલિવૂડ ફિલ્મોમાં અભિનય કર્યો છે, જેમાંથી ઘણી સુપરહિટ સાબિત થઇ છે.