વિશ્વના સૌથી સુરક્ષિત શહેરોની યાદીમાં પ્રથમ ક્રમે સિંગાપોર
પાકિસ્તાન પૂરી દુનિયામાં આંતકવાદને લઈને બદનામ છે. હવે વધુ એકવાર પાકિસ્તાનને નીચું જોવાનો વારો આવ્યો છે. ફોર્બ્સ એડવાઇઝરીની યાદી અનુસાર પાકિસ્તાનનું કરાંચી શહેર પ્રવાસન માટે દુનિયાના સૌથી ખતરનાખ શહેરમાં બીજા ક્રમે સ્થાન ધરાવે છે. તેને રેટિંગમાં 100માંથી 93.12 માર્ક્સ આપવામાં આવ્યા છે.
- Advertisement -
આ યાદીમાં વેનેઝુએલાનું કારાકાસ શહેર પહેલા ક્રમ પર છે. આ યાદીમાં ત્રીજા ક્રમે મ્યાનમારનું યાંગોન શહેર છે. રિપોર્ટ અનુસાર આ શહેરોમાં પ્રવાસીઓને સૌથી વધુ જોખમ છે. અપરાધનો દર, હિંસા, આતંકવાદી ધમકીઓ, કુદરતી આફતો અને આર્થિક સમસ્યાઓનો ભય વધારે છે.
અમેરિકાના ગૃહ મંત્રાલયે સુરક્ષાના દૃષ્ટિકોણથી પ્રવાસન માટે જોખમી શહેરોની યાદી બહાર પાડી હતી. જેમાં કરાચીની સ્થિતિ સૌથી ખરાબ હોવાનું જણાવાયું હતું. કરાચીને ઈન્ફ્રાસ્ટ્રક્ચર અને સુરક્ષાના જોખમના આધારે ચોથા ક્રમે રખાયું હતું.
ફોર્બ્સ એડવાઇઝરીના રિપોર્ટમાં 60 માપદંડોના આધારે વિશ્વના 60 શહેરોની રેન્કિંગ બહાર પાડવામાં આવી છે. કરાચીનું નામ ઘણી વખત ખતરનાક શહેરોમાં સ્થાન પામ્યું છે.
- Advertisement -
કરાંચી પાકિસ્તાનનું સૌથી મોટું શહેર છે. હાલમાં જ કરાંચીમાં બે જૂથો વચ્ચેની અથડામણમમાં થયેલી ફાયરિંગમાં પાંચ લોકોના મોત થયા હતા. કરાચીમાં અવારનવાર આતંકવાદી ઘટનાઓ બનતી રહે છે. ગીચ વસ્તી અને પાયાની મૂળભૂત સુવિધાઓના અભાવે શહેર રહેવાલાયક રહ્યું નથી.
બાંગ્લાદેશની રાજધાની ઢાંકા પણ ખતરનાક શહેરોની યાદીમાં છઠ્ઠા ક્રમ પર છે. ચોથા સ્થાન પર નાઇજીરીયાનું લાગોસ, પાંચમાં ક્રમે ફિલિપાઈન્સનું મનીલા, સાતમા ક્રમે કોલંબિયાનું બોગોટા, આઠમાં ક્રમે ઈજિપ્તનું કેરો, નવામાં ક્રમે મેક્સિકો સિટી અને દશમાં ક્રમે ઈક્વાડોરના ક્વિટોને સ્થાન આપવામાં આવ્યું છે.
ફોર્બ્સ એડવાઇઝરી અનુસાર વિશ્વના સૌથી સુરક્ષિત શહેરોની યાદી પણ જાહેર કરાઈ છે. તેમાં સિંગાપુર પહેલા ક્રમે છે. આ પછી બીજા ક્રમે જાપાનનું ટોક્યો છે. કેનેડાનું ટોરોન્ટો ત્રીજુ સૌથી સુરક્ષિત શહેર તરીકે દર્શાવવામાં આવ્યું છે. ચોથું ક્રમે ઓસ્ટ્રેલિયાના સિડનીને સામેલ કરાયું છે. અને પાંચમાં ક્રમે સ્વિટ્ઝર્લેન્ડનું ઝ્યુરિચ શહેર છે.
