વિપક્ષે ચિત્ર ઊભું કર્યું છે કે આ હિંસા ફક્ત અમારા શાસન દરમિયાન જ થઈ હતી: અમીત શાહ

મણિપુરમાં રાષ્ટ્રપતિ શાસન લાદવા તમામ સભ્યોને સહમતી આપવા શાહનો લોકસભામાં પ્રસ્તાવ

કેન્દ્રીય ગૃહ અને સહકાર મંત્રી અમિત શાહે મણિપુરમાં રાષ્ટ્રપતિ શાસન લાદવાની મંજૂરી માટે લોકસભામાં પ્રસ્તાવ રજૂ કર્યો. પ્રસ્તાવ રજૂ કરતી વખતે અમિત શાહે કહ્યું કે, હાઈકોર્ટના નિર્ણયને કારણે મણિપુરમાં બે સમુદાયો વચ્ચે અનામત વિવાદને કારણે જાતિ હિંસા ભડકી હતી. તેમણે કહ્યું કે તે રમખાણ કે આતંકવાદ નથી, પરંતુ હાઇકોર્ટના ચુકાદાના અર્થઘટનને કારણે બે સમુદાયો વચ્ચે થયેલી સાંપ્રદાયિક હિંસા હતી. અમિત શાહે કહ્યું કે, હિંસા ન થવી જોઈએ અને જાતિ હિંસાને કોઈપણ પક્ષ સાથે જોડવી જોઈએ નહીં. તેમણે કહ્યું કે વિપક્ષ દ્વારા એવું ચિત્ર રજૂ કરવાનો પ્રયાસ કરવામાં આવ્યો હતો કે સાંપ્રદાયિક હિંસા ફક્ત અમારા શાસન દરમિયાન જ થઈ હતી.

તેમણે ગૃહને જણાવ્યું કે મણિપુરમાં 1993માં વંશીય હિંસા, 1993 થી 1998 દરમિયાન નાગા-કુકી સંઘર્ષ થયો, જેના પરિણામે 750 લોકો મૃત્યુ પામ્યા અને છૂટાછવાયા બનાવો એક દાયકા સુધી ચાલુ રહ્યા. શાહે કહ્યું કે અમારું માનવું છે કે અમારા સમયમાં આવું બિલકુલ ન થવું જોઈએ, પરંતુ એક દુર્ભાગ્યપૂર્ણ નિર્ણય લેવામાં આવ્યો જેના કારણે હિંસા થઈ અને તેને તાત્કાલિક કાબૂમાં લેવામાં આવી.

કેન્દ્રીય ગૃહમંત્રીએ કહ્યું કે અમારા મુખ્યમંત્રીએ રાજીનામું આપ્યું અને પછી રાજ્યપાલે ભાજપના 37, NPPના 6, NPFના 5, JD(U)ના 1 અને કોંગ્રેસના 5 સભ્યો સાથે ચર્ચા કરી. તેમણે કહ્યું કે જ્યારે મોટાભાગના સભ્યોએ કહ્યું કે અમે સરકાર બનાવવાની સ્થિતિમાં નથી, ત્યારે કેબિનેટે રાષ્ટ્રપતિ શાસનની ભલામણ કરી, જેને રાષ્ટ્રપતિએ સ્વીકારી લીધી. શાહે કહ્યું કે સરકાર ઇચ્છે છે કે મણિપુરમાં વહેલી તકે શાંતિ પુન:સ્થાપિત થાય, પુનર્વસન થાય અને ઘા રૂઝાય. ગૃહમંત્રીએ તમામ સભ્યોને મણિપુરમાં રાષ્ટ્રપતિ શાસન લાદવા માટે મંજૂરી આપવા વિનંતી કરી.