હવે એક બૅડની હૉસ્પિટલ માટે પણ રજિસ્ટ્રેશન ફરજીયાત, ભંગ કરનારને 5 લાખ સુધીનો દંડ

દુકાનની જેમ ક્લિનિકો ચાલતી હોવાની ટકોર

હાઈકોર્ટમાં રાજય સરકારનો જવાબ: સ્ટેટ કાઉન્સિલનાં ગઠનની પ્રક્રિયા ચાલુ

ખાસ-ખબર ન્યૂઝ અમદાવાદ, તા.23
માંડલની શ્રી રામાનંદ આંખની હોસ્પિટલમાં મોતિયાના ઓપરેશન બાદ 17 જેટલા દર્દીએ આંશિક અને સંપૂર્ણ રીતે આંખોની દ્રષ્ટિ ગુમાવતા સર્જાયેલા અંધાપાકાંડ મુદ્દે સુઓમોટો રિટમાં ચીફ જસ્ટીસ સુનિતા અગ્રવાલની ખંડપીઠે એવી માર્મિક ટકોર કરી હતી કે અનેક ડોકટરોની કિલનીક શોપ્સ એકટ હેઠળ રજીસ્ટર્ડ થઈ હોય છે. તેઓ દૂકાનની જેમ કિલનીક ચલાવતા હોય છે તેથી તેમને પણ કિલનીક એસ્ટાબ્લિસમેન્ટ એકટ હેઠળ આવરી લેવા જોઈએ. આ કેસમાં રાજય સરકારે એકટની અમલવારી અને રૂલ્સ સહિતની પ્રક્રિયા વિશે કોર્ટને માહિતી આપી હતી. જે મામલે વધુ વિગતો રજુ કરવાનો આદેશ કરી હાઈકોર્ટે કેસની વધુ સુનાવણી ચાર સપ્તાહ બાદ મુકરર કરી છે.

રાજય સરકારે જણાવ્યું હતું કે, કિલનીકલ એસ્ટાબ્લિસમેન્ટ એકટની અમલવારી માટે એક વેબસાઈટ પણ શરૂ કરવામાં આવી રહી છે અને કાઉન્સીલનું ગઠન પણ કરવામાં આવી રહ્યું છે. હાઈકોર્ટે ટકોર કરી હતી કે તમામ નિયમો અને પ્રક્રિયાનું મેડીકલ કાઉન્સીલ મારફતે વધુમાં વધુ પબ્લિકેશન કરો જેથી તમામ સંબંધીત હિતધારકોને જાણ થાય અને પ્રક્રિયાનો અમલ થાય. તમારી પ્રક્રિયા અંગે સધન પ્રચાર પ્રસાર કરો. જેથી લોકોને જાણ થાય અને કાયદાની અમલવારી કરે. હાઈકોર્ટે ગત સુનાવણીમાં સરકારને ટકોર કરી હતી કે, અનેક હોસ્પિટલો કે કિલનીક ડોકટરો તેમના ઘરમાં ચલાવે છે અને કાયદાથી વિરૂદ્ધ જઈ સર્જરીઓ પણ કરે છે!આ તબીબો લોકોના જીવ સાથે રમત રમે છે. જે અત્યંત જોખમી બાબત છે. રાજય સરકારે કહ્યું હતું કે, એકથી 50 પથારી ધરાવતી કિલનીક હોસ્પિટલો માટે પણ હવે નવા સુધારેલા નિયમો હેઠળ રજીસ્ટ્રેશન કરાવવુ ફરજીયાત કરવામાં આવ્યું છે. એટલુ જ નહિં જો કોઈ કાયદા કે નિયમોનો ભંગ કરશે તો પહેલીવાર 10 હજાર અને બીજી વાર 50 હજાર દંડ કરાશે.પાંચ લાખ સુધીના દંડની જોગવાઈ છે.

અમદાવાદ જીલ્લાનાં વિરમગામ તાલુકા પાસે આવેલા માંડલ ખાતેની શ્રી રામાનંદ આંખની હોસ્પિટલમાં સર્જાયેલા અંધાપાકાંડની સુઓમોટો રિટની સુનાવણીમાં રાજય સરકાર તરફથી કમલભાઈ ત્રિવેદીએ રજુઆત કરી હતી કે ગુજરાત કિલનિકલ એસ્ટાબ્લિસમેન્ટ રૂલ્સ ઘડવામાં આવ્યા છે.અગાઉ 50 બેડથી ઓછી બેડની હોસ્પિટલ કાયદા હેઠળ કવર નહોતી પરંતુ હવે આ રૂલ્સમાં બધી જ હોસ્પિટલો કવર થઈ જાય છે.

જોકે, હાલ સ્ટેટ કાઉન્સીલ સંપૂર્ણપણે કાર્યરત નથી પરંતુ એના માટેની કાર્યવાહી ચાલી રહી છે. હાઈકોર્ટે ટકોર કરી હતી કે મિનિમમ સ્ટાર્ન્ડડ શું સેટ કરવામાં આવ્યા છે? રજીસ્ટ્રેશન પહેલા કોઈ ઈન્સ્પેકશનની પ્રક્રિયા છે કે કેમ? સરકારે કહ્યું હતું કે ઈન્સ્પેકશનની પ્રક્રિયા છે અને જે પ્રકારની હોસ્પિટલ કે તબીબી સેવા હોય તે મુજબની તપાસ કરવામાં આવે છે.