ટ્રમ્પે ABC ન્યૂઝ સામે માનહાનિનો દાવો કર્યો હતો
ખાસ-ખબર ન્યૂઝ વોશિંગ્ટન, તા.16
ન્યૂઝ ચેનલ એબીસી ન્યૂઝ અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પની પ્રેસિડેન્સી લાઇબ્રેરીને 15 મિલિયનનું દાન આપવા સંમત થઈ છે. ટ્રમ્પે એબીસી ન્યૂઝ સામે માનહાનિનો દાવો કર્યો હતો.
એબીસી ન્યૂઝના એન્કર જ્યોર્જ સ્ટેફનોપોલોસે લાઈવ ટીવી પર દાવો કર્યો હતો કે ટ્રમ્પને લેખક ઈ. જીન કેરોલ પર બળાત્કાર કરવા બદલ દોષિત ઠેરવવામાં આવ્યા છે. જ્યોર્જે 10 માર્ચે પોતાના શો ’ધીસ વીક’માં આ દાવો કર્યો હતો.
- Advertisement -
આ કેસ સાથે સંબંધિત દસ્તાવેજો શનિવારે જાહેર કરવામાં આવ્યા હતા. આ મુજબ, એબીસી ન્યૂઝ તેની વેબસાઇટ પર માફી માંગશે અને તેણે કરેલા દાવા બદલ ખેદ વ્યક્ત કરશે. આ સાથે તે ટ્રમ્પના વકીલને 1 મિલિયન ડોલરની ફી પણ આપશે. એબીસી ન્યૂઝે પોસ્ટ કર્યું કે, સમાધાનના બદલામાં મુકદ્દમાને બરતરફ કરવાથી તે ખુશ છે. ડોનાલ્ડ ટ્રમ્પને 2023માં ન્યૂયોર્ક મેગેઝિનના લેખક ઈ. જીન કેરોલ પર જાતીય શોષણ કરવા બદલ દોષિત ઠેરવવામાં આવ્યા હતા. કેરોલે આરોપ લગાવ્યો હતો કે ટ્રમ્પે 1996માં તેની સાથે યૌન શોષણ અને બળાત્કાર કર્યો હતો. જોકે, જ્યુરીએ પોતાના નિર્ણયમાં ટ્રમ્પને માત્ર યૌન શોષણ માટે દોષિત જાહેર કર્યા હતા. આ માટે ટ્રમ્પને 5 મિલિયનનો દંડ પણ ફટકારવામાં આવ્યો હતો. આ પહેલા ટ્રમ્પે કેરોલને લઈને એક નિવેદનમાં કહ્યું હતું કે, તે તેના પ્રકારની નથી. બીજા નિવેદનમાં ટ્રમ્પે આરોપ લગાવ્યો હતો કે કેરોલે જાતીય શોષણ અંગે ખોટું બોલ્યું હતું. ટ્રમ્પના આ નિવેદન બાદ કેરોલે તેના પર માનહાનિનો કેસ કર્યો હતો.
ડોનાલ્ડ ટ્રમ્પને આ વર્ષે 30 મેના રોજ પોર્ન સ્ટાર સ્ટોર્મી ડેનિયલ્સ સાથે સંબંધ રાખવા અને તેને ચૂપ રાખવા માટે પૈસા ચૂકવવાના આરોપમાં દોષી ઠેરવવામાં આવ્યા હતા. દોષિત જાહેર થયા બાદ ટ્રમ્પે ઓગસ્ટમાં ફેડરલ કોર્ટને આ કેસમાં હસ્તક્ષેપ કરવા કહ્યું હતું. આ પછી ફેડરલ કોર્ટે મામલો પાછો ન્યુયોર્ક કોર્ટમાં મોકલી દીધો.ટ્રમ્પે સજા રદ કરવા માટે ન્યૂયોર્ક કોર્ટમાં અરજી કરી હતી. જોકે, ટ્રમ્પે રાષ્ટ્રપતિની ચૂંટણી જીત્યા બાદ કોર્ટે અરજી પરની સુનાવણી અનિશ્ર્ચિત સમય માટે સ્થગિત કરી દીધી હતી. પોર્ન સ્ટાર સ્ટોર્મી ડેનિયલ્સને ચૂપ કરવા માટે પૈસા ચૂકવવા અને ચૂંટણી પ્રચાર દરમિયાન બિઝનેસ રેકોર્ડ ખોટા કરવા બદલ ટ્રમ્પ વિરુદ્ધ કેસ પેન્ડિંગ હતા. આ મામલો 2016માં અમેરિકાના રાષ્ટ્રપતિ તરીકે ચૂંટાયા તે પહેલા બન્યો હતો. તેના ખુલાસા બાદ અમેરિકાના ઈતિહાસમાં આ પહેલીવાર બન્યું છે કે જ્યારે કોઈ રાષ્ટ્રપતિ વિરુદ્ધ ફોજદારી કેસ દાખલ કરવામાં આવ્યો હોય.
