રાજકોટની બજારમાં ફટાકડાંની અવનવી વેરાયટી, વેચાણ શરૂ

ગોલ્ડન ડક, ફ્લેશ ગન, સુપર ડ્રોનનો બાળકોમાં ક્રેઝ

ઇકો-ફ્રેન્ડલી, સ્મોકલેસ અને સ્લો સાઉન્ડવાળા ફટાકડાંની માંગ સૌથી વધુ

દિવાળીને હવે ગણતરીના દિવસો જ બાકી છે. ત્યારે લોકો ઘરની સાફ-સફાઇથી લઇને સજાવટની વસ્તુઓ, નવા કપડા, જ્વેલરી વગેરેની ખરીદી કરી રહ્યા છે. પરંતુ ફટાકડા વગરની દિવાળી તો અધૂરી ગણાય છે. ત્યારે રાજકોટની સદરબજાર સહિતની અનેક બજારોમાં અવનવા ફટાકડાની વેરાયટી જોવા મળી રહી છે. દિવાળી નજીક આવતાં જ શહેરના રસ્તાઓ ઉપર અને ગલી મહોલ્લાના નાકે ઠેર ઠેર ફટાકડાના સ્ટોલ લાગી ગયા છે. ફટાકડાના વેપારીઓએ દુકાનો સજાવી દીધી છે અને વિવિધ રંગબેરંગી ફટાકડાં ગ્રાહકોને આકર્ષી રહ્યા છે. દર વર્ષની જેમ આ વર્ષે પણ બજારમાં ફટાકડાની અવનવી વેરાયટી આવી છે. જેમાં નાના બાળકો માટે ફૂલઝર, ચકરડી, કોઠી, રોકેટ, નાના-મોટા બોમ્બ, ભીત ભડાકા, પોપપોપ તો છે જ આ સિવાય ગોલ્ડન ડક, ફ્લેશ ગન, સુપર ડ્રોન, બંદૂક સહિતની વેરાયટીનું ધૂમ વેચાણ થઈ રહ્યું છે. આ વર્ષે રાજકોટ સહિત સમગ્ર ગુજરાતમાં ફટાકડાના વેચાણમાં કેટલાક નવા અને આધુનિક પ્રકારના ફટાકડા ટ્રેન્ડમાં જોવા મળી રહ્યા છે. વેપારીઓના જણાવ્યા મુજબ, લોકો હવે માત્ર અવાજ કરતા ફટાકડાની જગ્યાએ સ્મોકલેસ ફટાકડાં વધુ પસંદ કરી રહ્યા છે. તેમજ મેડ ઇન શિવાકાશી ફટાકડાં હજુ પણ સૌથી વધુ લોકપ્રિય છે. આમ દિવાળીની ચમક સાથે રાજકોટની બજારોમાં હાલ ઉત્સવમૂડ છવાઈ રહ્યો છે.