વિક્રમજીત સિંહની શાનદાર સદી: નેધરલેન્ડના 362 રનના જવાબમાં ઓમાન 246 રનમાં ખખડ્યું
વર્લ્ડકપ-2023માં ક્વોલિફાઈ કરવાની નેધરલેન્ડસની આશા હજુ પણ યથાવત છે. આઈસીસી વર્લ્ડકપ ક્વોલિફાયરમાં રમાયેલા મહત્ત્વના મુકાબલામાં નેધરલેન્ડે ઓમાનને 74 રને હરાવ્યું છે.
- Advertisement -
હરારેના મેદાન ઉપર ઓમાનના કેપ્ટને ટોસ જીતીને નેધરલેન્ડસને પહેલાં બેટિંગ કરવાનું આમંત્રણ આપ્યું હતું. નેધરલેન્ડસની શરૂઆત ધમાકેદાર રહી અને પહેલી વિકેટ માટે વિક્રમજીત સિંહ અને મેક્સ ઑ ડૉડે પહેલી વિકેટ માટે 117 રન બનાવ્યા હતા. ડૉડ 35 રન બનાવીને આઉટ થયો જે પછી વિક્રમજીતે વેસ્લે બેરેસી સાથે મળીને પણ બીજી વિકેટ માટે ફિફટીની ભાગીદારી કરી હતી.
વિક્રમજીતે શ્રેષ્ઠ બેટિંગ કરતા પોતાના વન-ડે કરિયરની પહેલી સદી બનાવી હતી. વિક્રમે 109 બોલનો સામનો કરતા 11 ચોગ્ગા અને બે છગ્ગાની મદદથી 110 રન બનાવ્યાહતા. જ્યારે બેરેસી પોતાની સદી પૂર્ણ કરવાથી ચૂકી ગયો અને 97 રને આઉટ થયો હતો. નેધરલેન્ડસે પહેલાં બેટિંગ કરતા સ્કોર બોર્ડ ઉપર 7 વિકેટ ગુમાવીને 362 રન બનાવ્યા હતા.
363 રનના લક્ષ્યાંકનો પીછો કરવા ઉતરેલી ઓમાનની ટીમ કોઈ પણ સમયે મેચ જીતે તેવું લાગી રહ્યું નથી કેમ કે ટીમે પોતાની પહેલી ચાર વિકેટ માત્ર 102 રનના સ્કોરે ગુમાવી દીધી હતી. આ પછી અયાન ખાને શોયેબ ખાન સાથે મળીને ઈનિંગને સંભાળી પાંચમી વિકેટ માટે 100 રનની ભાગીદારી કરી હતી. જો કે આ બન્નેની વિકેટ પડતાં જ ઓમાન ખખડવા લાગ્યું હતું અને 246 રને થંભી ગયું હતું.
