ફિલ્મ ‘OMG 2’નું ટ્રેલર રિલીઝ: શિવના ગણ તરીકે જોવા મળશે અક્ષય કુમાર

ફિલ્મ ‘OMG 2’નું ટ્રેલર રિલીઝ થઇ ગયું છે, ટ્રેલરના શરૂઆતમાં ભગવાન શિવ નંદીને કહે છે, ‘મારો ભક્ત મુશ્કેલીમાં છે શિવના એક ગણને મદદ કરવા મોકલ.’ આ સીન પછી અક્ષય કુમારની એન્ટ્રી થાય છે.

OMG 2 Trailer: અક્ષય કુમાર અને પંકજ ત્રિપાઠીની ફિલ્મ ‘OMG 2’ની ચર્ચા જોરશોરથી ચાલી રહી છે. ફિલ્મ OMG માં અક્ષય કુમાર અને પરેશ રાવલની અદ્દભુત એક્ટિંગ જોવા મળી હતી, જે બાદ હવે ચાહકોને OMG 2 પાસેથી ઘણી અપેક્ષાઓ છે. એવામાં હવે મેકર્સે ‘OMG 2’ ફિલ્મનું ટ્રેલર રિલીઝ કર્યું છે અને ટ્રેલર જોઇને લોકોમાં ફિલ્મને લઈને સસ્પેન્સ વધુ વધી ગયું છે.

ફિલ્મમાં અક્ષયનું પાત્ર આ પ્રકારનું હશે
અક્ષય કુમારે ફિલ્મનું ટ્રેલર રિલીઝ કરતી વખતે ટેગ લાઈનનો ઉપયોગ કર્યો છે. કેપ્શનમાં તેણે લખ્યું, ‘સ્વાગતની તૈયારી શરૂ કરો, આવી રહ્યા છો ડમરુધારી.’ ટ્રેલર રિલીઝ ખૂબ જ ધમાકેદાર છે. ફિલ્મનું ટ્રેલર જોયા બાદ સ્પષ્ટ થાય છે કે અક્ષય હવે ફિલ્મમાં શિવ તરીકે નહીં પરંતુ શિવના ગણ તરીકે જોવા મળી રહ્યો છે. ફિલ્મના ટ્રેલરના શરૂઆતના દ્રશ્યમાં ભગવાન શિવ નંદીને કહે છે, ‘મારો ભક્ત મુશ્કેલીમાં છે’. નંદી, શિવના એક ગણને તેની મદદ કરવા મોકલ.’ આ સીન પછી જ અક્ષય કુમારની એન્ટ્રી થાય છે.

ફિલ્મમાં એજ્યુકેશન સિસ્ટમ પર સવાલ ઉઠાવવામાં આવશે
અક્ષય કુમાર સંપૂર્ણપણે ભગવાન શિવના રંગમાં રંગાયેલા જોવા મળે છે. જેમ તેમના ગણો તેમના જેવા દેખાય છે. જ્યારે પંકજ ત્રિપાઠી શરણ મુદગલના પાત્રમાં જોવા મળે છે. આ ફિલ્મમાં યામી ગૌતમે વકીલની ભૂમિકા ભજવી છે. દરેકની એક્ટિંગ શાર્પ અને ઓન પોઈન્ટ લાગે છે. ટ્રેલર જોઈને સ્પષ્ટ થાય છે કે આ વખતે ફિલ્મ એજ્યુકેશન સિસ્ટમ પર સવાલ ઉઠાવવા જઈ રહી છે.