વિશ્વના અનેક દેશોમાં ઊંચા ભાવે પણ કેસર કેરીની માંગ ઉઠી
ઓછો પાક હોવા છતાં ઊંચા ભાવના કારણે સ્થાનિક મધ્યમ વર્ગ “ભીમ અગિયારસ”ના પર્વે કેરી ખરીદી નહીં શકે
- Advertisement -
ખાસ-ખબર ન્યૂઝ ગીર સોમનાથ, તા.8
ગીર સોમનાથ અને તાલાળા ગીર અહીંના કેસરી સિંહ અને કેસર કેરી ના કારણે વિશ્વ પ્રસિદ્ધ બન્યું છે. ત્યારે કેસર કેરી પર છેલ્લા પાંચેક વર્ષથી વિપરીત હવામાનનું ગ્રહણ લાગ્યું છે. જેથી સતત છેલ્લા પાંચ વર્ષથી કેસર કેરીનો પાક ઘટી રહ્યો છે. જેના કારણે ઓછી કેરી, વધુ ભાવ અને કેરીની સમય મર્યાદા ટૂંકી બનતા કેસર કેરીના રસિયાઓ માટે ભીમ અગિયારસ પર કેસર કેરી ખરીદવી કઠિન બનશે. ગત સીઝનની સાપેક્ષમાં જો વાત કરવામાં આવે તો ગત વર્ષે તાલાળા મેંગો યાર્ડ ખાતે બાર લાખ કેસર કેરીના બોક્સ ની આવક હતી. સાથે 300 થી લઈ અને 500 રૂપિયા સરેરાશ 10 કિલો ના બોક્સ નો ભાવ રહ્યો હતો. પરંતુ આ વખતે વિપરીત હવામાનને કારણે કેરીના ફ્લાવરિંગ ખરી પડવાના કારણે માત્ર 40% કેરી જ બચી શકી હતી.. ઓછી કેરી હોવાને કારણે આ વર્ષે આખી સિઝનમાં કેરીના ભાવ ભારે ઊંચા રહ્યા છે. હાલ કેસર કેરીનું છેલ્લું અઠવાડિયું ચાલી રહ્યું છે. ત્યારે પણ 10 કિલોના એક બોક્સના 800 થી લઈને 1300 રૂપિયા સુધી ના ભાવ ચાલી રહ્યા છે. જેના કારણે સામાન્ય વર્ગ પરંપરા અનુસાર ભીમ અગિયારસ જેવા પર્વે પણ કેસર કેરી ખરીદી નહીં શકે. સાથે જો હવામાન વિભાગની આગાહી મુજબ વરસાદ શરૂ થયો તો પણ કેરી નહીં ખાઈ શકાય. આમ કેસર કેરી ગ્રાહકો માટે આ વખતે ઉંચા ભાવને કારણે કડવી બની છે.
તો આ વખતે કેસર કેરી વિદેશોમાં 500 ટન થી વધુ નિકાસ થઈ ચૂકી છે. વિદેશમાં લંડન, યુકે, સ્વીઝરલેન્ડ, અખાતિ દેશો, આફ્રિકા જેવા દેશોમાં ભારે નિકાસ થઈ છે. સાથે સાથે હજુ પણ ત્યાં કેરીની જબરી માંગ છે. જેથી જે ખેડૂતોના ખેતરમાં કેસર કેરી આ વખતે પાકી છે તેમને બહુ સારા રૂપિયા નિકાસના કારણે મળ્યા છે. તો સ્થાનિક લેવલે ભાવ ઊંચા રહેતા સ્થાનિકોએ કેસર કેરીનો સ્વાદ કડવો માણ્યો છે. ત્યારે હાલ કેસર કેરીનું ક્લોઝિંગ ચાલી રહ્યું છે. અને તેમાં પણ વરસાદ પડે એટલે કેસર કેરી માંથી સ્વાદ જતો રહે છે. તેમાં જીવાતો પડી જાય છે અને ચોમાસામાં કેસર કેરી સ્વાસ્થય માટે પણ આરોગ્ય પ્રદાથ નથી ગણાતી.. ત્યારે કેસર કેરીનું અંતિમ અઠવાડિયું હાલ ચાલી રહ્યું છે.
