‘વોકલ ફોર લોકલ’
ગૃહ ઉદ્યોગો અને નાના વેપારીઓના પરિશ્રમને અંજવાળીએ, તેમની વસ્તુઓ ખરીદીને ચાલો તેમની દિવાળી દીપાવીએ
- Advertisement -
ખાસ-ખબર સંવાદદાતા
સ્થાનિક ધંધાર્થીઓ અને નાના વેપારીઓને સહકાર આપવાના હેતુથી કેન્દ્ર સરકાર દ્વારા ‘વોકલ ફોર લોકલ’ પહેલનો પ્રારંભ કરાવવામાં આવ્યો છે ત્યારે ચાલો આપણે સૌ પણ આ પહેલમાં જોડાઈએ અને આ તહેવારોની સિઝનમાં સ્થાનિક બજારોમાંથી જ નાના વેપારીઓ, લારી ધારકો અને ફેરીયાઓ પાસેથી વસ્તુ ખરીદી તેમના પરિશ્રમને અજવાળીએ. હાલમાં દિવાળીનો તહેવાર ચાલી રહ્યો છે ત્યારે મોરબીમાં જય બજરંગ મહિલા મંડળ સંચાલિત જય બજરંગ દીવડા ગૃહ ઉદ્યોગ અનેક પ્રકારના દીવડા બનાવે છે ત્યારે આ દિવાળીએ તેમને ત્યાંથી દીવડાની ખરીદી કરીને આપણા ઘરે તેમજ ત્યાં કામ કરતા બહેનોના ઘરે પણ અજવાળું કરીએ.
મોરબીના લાલપર પાસે જય બજરંગ દીવડા ગૃહ ઉદ્યોગ આવેલ છે. દિલીપભાઈ વામજા અને તેમના પત્ની અનિલાબેન વામજા તેમજ તેમના ભાઈ હિતેશભાઈ વામજા ત્રણેય સાથે મળીને આ ગૃહ ઉદ્યોગનું સંચાલન કરે છે. તેમની સાથે 40 થી 50 જેટલી બહેનો પણ ગૃહ ઉદ્યોગમાં જોડાયેલી છે. આ ગૃહ ઉદ્યોગની ટીમ અનેક પ્રકારના દીવડા બનાવી તેમાં પોતાના સપનાઓના સપ્તરંગો ભરી આ દીવડાને વધુ આકર્ષક બનાવે છે. અનેક બહેનોની રોજગારી સાથે જોડાયેલા આ દીવડાના ગૃહ ઉદ્યોગમાં દીવડાની અનેક પ્રકારની વેરાયટીઓ બનાવવામાં આવે છે. ઘણી બધી વેરાયટીઓ તો એવી છે કે, લોકોને બીજે ક્યાંય જોવા પણ ન મળે. ખરેખર મનમોહક દિવડા જોઈને ઘડીક તો અચરજ થાય જ.
દિલીપભાઈ અને અનિલાબેનને આ ઉદ્યોગમાં કામ કરતા જોઈએ ત્યારે તેમના ચહેરા પર એક આત્મસંતોષ વ્યક્ત થતો હોય. આ આત્મસંતોષ સાથે તેઓ જાણે કહેતા હોય કે, ધંધો નાનો છે પણ અમારો પોતાનો છે. ગૃહ ઉદ્યોગની આ ત્રિપુટી ભાત ભાતના દીવડા બનાવી દિવાળીએ અનેક ઘરોમાં અને મંદિરોમાં તો અજવાળા પાથરે જ છે પરંતુ અનેક બહેનોને રોજગારી આપી તેમના ઘરમાં પણ આજીવિકાનું અજવાળું પાથરી રહ્યા છે તો ચાલો આપણે પણ આ ‘વોકલ ફોર લોકલ’ પહેલમાં સહભાગી બનીને આવા નાના ઉદ્યોગો તેમજ ગૃહ ઉદ્યોગો પાસેથી વસ્તુઓની ખરીદી કરીને તેમના પરિશ્રમને જરૂરથી અંજવાળીએ.
