મુખ્ય આરોપીના 4 દિવસના રિમાન્ડ મંજૂર; શાંતાબેનના સોગંદનામાથી નવા ખુલાસાની શક્યતા
ખાસ-ખબર ન્યૂઝ મોરબી
- Advertisement -
મોરબીના ચકચારી જમીન કૌભાંડમાં પકડાયેલ 70 વર્ષીય મહિલા આરોપી શાંતાબેન પરમારના એક દિવસના રિમાન્ડ પૂર્ણ થતાં તેમને જેલ હવાલે કરવામાં આવ્યા છે. શુક્રવારે બપોરે રિમાન્ડ પૂરા થતાં તેમને કોર્ટમાં રજૂ કરાયા હતા. બીજી તરફ, આ કેસના અન્ય આરોપી સાગર નવઘણભાઇ સાવધાર (ઉ.વ. 39) ના કોર્ટે ચાર દિવસના રિમાન્ડ મંજૂર કર્યા છે. સીઆઇડીની ટીમ હવે સાગર સાવધાર પાસે ઘટનાનું રી-ક્ધસ્ટ્રક્શન કરાવશે. તપાસમાં સામે આવ્યું છે કે, સાગર સ્ટેમ્પ પેપર લેવા ગયો હતો, શાંતાબેનના અંગૂઠાને ઓળખી બતાવેલ અને તેમનું બોગસ પાન કાર્ડ બનાવ્યું હતું. આ ઉપરાંત, તેણે આઈડીએફસી બેંકમાં શાંતાબેનનું ખાતું ખોલાવવા માટે પણ પ્રયાસ કર્યો હતો. સીઆઇડી આ તમામ સ્થળોએ આરોપીને સાથે રાખીને ઘટનાનું રી-ક્ધસ્ટ્રક્શન કરાવીને વધુ પુરાવા એકત્ર કરશે.મોરબીમાં હાલ ચર્ચાનો વિષય એ છે કે, આરોપી શાંતાબેન પરમારે હાઇકોર્ટ અને મોરબીની કોર્ટમાં સોગંદનામું રજૂ કરીને પોતાને નિર્દોષ ગણાવ્યા છે. એટલું જ નહીં, તેમણે આ કેસમાં ’તાજના સાક્ષી’ બનવા માટે પણ તૈયારી બતાવી છે. આ સોગંદનામામાં કૌભાંડમાં સંડોવાયેલા અન્ય કોના કોના નામ છે, તે જાણવા માટે લોકોમાં ભારે ઉત્સુકતા જોવા મળી રહી છે. આ કેસમાં એક તરફ જમીનના મૂળ માલિક અને ફરિયાદીએ 17 લોકોના નામ આરોપી તરીકે સીઆઇડીને આપ્યા છે. બીજી તરફ, શાંતાબેને કોર્ટમાં સોગંદનામું રજૂ કરીને આ ગુનામાં કોનો શું રોલ છે તેની વિગતવાર માહિતી આપી છે. મોરબીના વજેપર ગામે આવેલ સર્વે નંબર 602 વાળી જમીનના આ કૌભાંડમાં સીઆઇડીના ડીવાયએસપી આર.એસ.પટેલ અને તેમની ટીમે ઊંડાણપૂર્વક તપાસ હાથ ધરી છે. આગામી દિવસોમાં આ કેસમાં વધુ ચોંકાવનારા ખુલાસા થવાની શક્યતા સેવાઈ રહી છે.
