વાછ્કપર ગામે કુટુંબ કલહમાં દવા પીતાં સગીર દીકરાનું મોત

માતાપિતાની બોલાચાલીને પગલે માતા અને બાળકો દ્વારા દવા પી લેતા દિકરાનો દુર્ભાગ્યપૂર્ણ અંત, ટંકારા પોલીસે તપાસ શરૂ કરી

ખાસ-ખબર ન્યૂઝ મોરબી, તા.1
મોરબી જિલ્લાના ટંકારા તાલુકાના વાછ્કપર ગામે કુટુંબ કલહે કરૂણ રૂપ ધારણ કર્યું હતું. માતા-પિતાને રૂપિયા બાબતે થયેલી બોલાચાલીને પગલે માતાએ ઝેરી દવા પી લીધી હતી. આ દ્રશ્ય જોઇને 15 વર્ષનો પુત્ર હરદેવ હીરાલાલ સાકરીયા અને તેની બહેન આરવીએ પણ દવા પી લીધી હતી. જેમાં સારવાર દરમિયાન પુત્ર હરદેવનું મોત થતાં ગામમાં શોકની લાગણી છવાઈ ગઈ છે.
પ્રાપ્ત વિગતો અનુસાર, ગત 23 ઓગસ્ટે વાછ્કપર ગામના રહેવાસી 15 વર્ષીય હરદેવએ ઝેરી દવા પી લીધી હતી. તાત્કાલિક તેને રાજકોટની હોસ્પિટલમાં ખસેડવામાં આવ્યો હતો. જોકે, સારવાર દરમિયાન હરદેવનું મોત થયું હતું.

માહિતી મુજબ, રૂપિયા અંગે માતા-પિતા વચ્ચે તીવ્ર બોલાચાલી થઈ હતી. આથી માતા કૃપલીબેનને મનોમન લાગી આવતા તેમણે દવા પી લીધી હતી. માતાની આ હરકત જોઈને હરદેવ અને તેની બહેન આરવીએ પણ ઝેરનું સેવન કર્યું હતું. બંનેને હોસ્પિટલમાં ખસેડાયા હતા, પરંતુ દુર્ભાગ્યે હરદેવ જીવતો રહી શક્યો નહીં.
ટંકારા પોલીસે આ બનાવની નોંધ કરી કાયદેસરની કાર્યવાહી શરૂ કરી છે. ગામમાં માતા-પિતા વચ્ચેની ક્ષણિક બોલાચાલીએ આખા પરિવારમાં શોકનો માહોલ ઊભો કર્યો છે.