સુપર કેરી ટેમ્પોમાંથી 1800 લિટર શંકાસ્પદ પ્રવાહી સાથે એક આરોપી ઝડપાયો
ખાસ-ખબર ન્યૂઝ મોરબી, તા.7
માળિયા પોલીસ દ્વારા પેટ્રોલિંગ દરમિયાન ગેરકાયદેસર રીતે પેટ્રોલીયમ પ્રોડક્ટની હેરાફેરી કરતા એક આરોપીને ઝડપી પાડવામાં આવ્યો છે. તેની પાસેથી સુપર કેરી ટેમ્પો, મોબાઈલ અને 1800 લિટર શંકાસ્પદ પ્રવાહી સહિત કુલ ₹3.28 લાખનો મુદ્દામાલ જપ્ત કરવામાં આવ્યો છે.
પોલીસ સ્ટાફ પેટ્રોલિંગમાં હતો તે સમયે બાતમી મળી હતી કે, એક સુપર કેરી ટેમ્પોમાં શંકાસ્પદ પેટ્રોલીયમ પ્રોડક્ટ ભરીને વેચાણ માટે જઈ રહ્યો છે. આ બાતમીના આધારે પોલીસે શંકાસ્પદ ટેમ્પોને રોકીને તપાસ કરી હતી.
- Advertisement -
ટેમ્પો ચાલક જયેશભાઈ ભગવાનજીભાઈ ખાદાને (ઉંમર અને રહેઠાણ વિશે માહિતી નથી) પૂછપરછ કરતાં જાણવા મળ્યું કે, તે આ જથ્થો ગેરકાયદેસર રીતે હેરાફેરી કરી વેચાણ અર્થે લઈ જઈ રહ્યો હતો. પોલીસે ટેમ્પોમાંથી 30 કેરબામાં ભરેલો 1800 લિટર શંકાસ્પદ પેટ્રોલીયમ પ્રોડક્ટનો જથ્થો, સુઝુકી કંપનીનો સુપર કેરી સીએનજી ટેમ્પો અને ઓપો કંપનીનો મોબાઈલ ફોન મળીને કુલ ₹3.28 લાખનો મુદ્દામાલ જપ્ત કર્યો હતો.
પોલીસે આરોપી જયેશભાઈ ખાદાની ધરપકડ કરીને કાયદેસરની કાર્યવાહી હાથ ધરી છે અને આ રેકેટમાં અન્ય કોઈની સંડોવણી છે કે કેમ તે દિશામાં વધુ તપાસ ચાલી રહી છે.
