માલદીવ ભારતનું આભારી: ભૂતપૂર્વ રાષ્ટ્રપતિ નશીદે કહ્યું “ભારત ન હોત તો અમારું અર્થતંત્ર ડૂબી ગયું હોત”

ખાસ-ખબર ન્યૂઝ  માલદીવ, તા.24
માલદીવના ભૂતપૂર્વ રાષ્ટ્રપતિ મોહમ્મદ નશીદે કહ્યું છે કે જો ભારત ન હોત તો આપણી અર્થવ્યવસ્થા બરબાદ થઈ ગઈ હોત.
નશીદે કહ્યું કે તેમના દેશની આર્થિક સ્થિતિ એટલી ખરાબ થઈ ગઈ છે કે જો ભારતે સમયસર મદદ ન કરી હોત તો માલદીવ નાદાર (ડિફોલ્ટ) થઈ ગયો હોત.
2022-23માં પર્યટનના પતનને કારણે માલદીવ ઊંડા આર્થિક સંકટમાં ફસાઈ ગયું. તેનું વિદેશી દેવું વધી ગયું હતું અને ડોલરની તીવ્ર અછત હતી. ભારતે અનાજ-ઈંધણ પુરવઠો અને ક્રેડિટ લાઇન પૂરી પાડીને માલદીવને ડિફોલ્ટથી બચાવ્યો.
નશીદનું આ નિવેદન પ્રધાનમંત્રી નરેન્દ્ર મોદીના માલદીવ પ્રવાસ પહેલા આવ્યું છે. પીએમ મોદી 25 અને 26 જુલાઈના રોજ માલદીવની મુલાકાતે રહેશે. આ દરમિયાન તેઓ સ્વતંત્રતા દિવસની ઉજવણીમાં મુખ્ય અતિથિ તરીકે હાજરી આપશે.
નાશીદે કહ્યું કે માલદીવની વિદેશ નીતિ હંમેશા ભારત પ્રથમ રહી છે. નાશીદે સ્વીકાર્યું કે ચૂંટણીઓને કારણે માલદીવની નીતિ ચીન તરફ ઝુકાવ ધરાવે છે, પરંતુ હવે એવું નથી.
નશીદે કહ્યું કે માલદીવનું સમગ્ર રાજકારણ ઇન્ડિયા ફર્સ્ટ નીતિ પર આવ્યું છે. તેમના મતે, ભારત પણ માલદીવને મહત્વ આપે છે. વડાપ્રધાન મોદીની મુલાકાત આનો પુરાવો છે.
તેમણે કહ્યું કે આ મુલાકાત માત્ર સંબંધોને મજબૂત બનાવશે નહીં, પરંતુ વિકાસ માટે નવા માર્ગો પણ ખોલશે. ભારતના આર્થિક વિકાસની પ્રશંસા કરતા, નાશીદે કહ્યું કે ભારતની પ્રગતિ તેની સાથે તેના પડોશી દેશોને પણ સાથે લઈ જાય છે.
તેમણે કહ્યું કે ભારતની “પડોશી પ્રથમ” નીતિએ માલદીવને વિશાળ આર્થિક તકો આપી છે. જેના કારણે ભારતીય પ્રવાસીઓની સંખ્યામાં ઝડપી વધારો થયો છે.
નશીદે સૂચન કર્યું કે ભારત અને માલદીવ વચ્ચે વેપાર કરાર થવો જોઈએ. આનાથી માલદીવ ટકાઉ ધોરણે ભારતને વધુ માછલી વેચી શકશે.
નશીદના મતે, ભારતમાં માલદીવની માછલીની ખૂબ માગ છે. જો બંને દેશો વચ્ચે વેપાર કરાર થાય તો તે બંને દેશો માટે ફાયદાકારક રહેશે.
તેમણે કહ્યું કે આનાથી લોજિસ્ટિક્સ, શિપિંગ અને ટકાઉ દરિયાઈ વિકાસ જેવા ક્ષેત્રોમાં પણ સહયોગ વધશે. નશીદે આશા વ્યક્ત કરી કે વડાપ્રધાન મોદીની મુલાકાતથી ભારતીય પ્રવાસીઓની સંખ્યામાં વધુ વધારો થશે. તેમણે કહ્યું કે ભારતીય સહાયથી બનાવવામાં આવી રહેલું હનીમાડુ એરપોર્ટ હવે લગભગ તૈયાર છે અને તે દક્ષિણ ભારતના ઘણા શહેરોથી માત્ર એક કલાક દૂર હશે.