માધાપરનું કામચલાઉ બસ સ્ટેશન ખંઢેર બન્યું

મુસાફરોને બેસવા માટેના બાંકડા અને પંખા નથી : રિનોવેટ કરવા મુસાફરોની માગણી
બસ સ્ટેશનમાં જામનગર-મોરબીની 200 બસનો સ્ટોપ પુન : શરૂ; શૌચાલયનો અભાવ
ખાસ-ખબર ન્યૂઝ રાજકોટ

રાજ્યના પૂર્વ મુખ્યમંત્રી વિજય રૂપાણીના કાર્યકાળમાં ભેટરૂપે માધાપર બસ સ્ટેશનના નિર્માણ માટે ટોકન ભાવે 6800 ચો.મી.જગ્યામાં જમીનની ફાળવણી કરવામાં આવી હતી, જે મોરબી અને જામનગર જતા મુસાફરો માટે ઉપયોગી બન્યું. અહિંથી 200 જેટલી બસોની અવરજવર રહે છે. જોકે, આ કામચલાઉ બસ સ્ટેશન ખંઢેર બન્યું હતું, પરંતુ ધારાસભ્યની સ્થળ મુલાકાત અને રજૂઆત બાદ 4 વર્ષ બાદ 2025માં આ પિકઅપ સ્ટેન્ડ ફરી કાર્યરત કરવામાં આવ્યું છે. જોકે હજુ અહીં મુસાફરોને બેસવા માટેના બાંકડા અને પંખા નથી. અહીં નવું બસ સ્ટેશન બને એવી મુસાફરોની પ્રબળ માગ છે. મળતી માહિતી પ્રમાણે મનપાની ટી.પી. સ્કિમના વાંકે બસ સ્ટેશનના નિર્માણનું કામ અટક્યું છે.

એક મુસાફરે જણાવ્યું હતું કે, રાજકોટ એસટી વિભાગે છેલ્લા ઘણા વર્ષો પહેલાં આ બસ સ્ટેશન બનાવેલું છે. માધાપર પિક અપ સ્ટેન્ડના નામે આ બસ સ્ટેશન બનાવવામાં આવેલું છે. પહેલા એવું થતું હતું કે, એસટી બસો બસ સ્ટેન્ડની બહારથી જ નીકળી જતી હતી. જોકે બાદમાં રાજકોટ એસટીના વિભાગીય નિયામક દ્વારા અહીંથી પસાર થતી દરેક એસટી બસને બસ સ્ટેશનની અંદર આવવા માટે સૂચના આપવામાં આવી છે. જેથી બહારથી જે બસો નિકળી જતી હતી, તે બસો પીકઅપ સ્ટેન્ડની અંદર પણ આવી રહી છે, જેનાથી મુસાફરોને ફાયદો થઈ રહ્યો છે.
સામેની તરફ જે જગ્યાએ બસ ઊભી રહેતી હતી, ત્યાં મુસાફરો માટે કોઈ જ સુવિધા ન હતી. મુસાફરો ઉનાળાના આકરા તાપમા શેકાતા હતા. જોકે, હવે અહીંથી અપડાઉન થતી તમામ બસો માધાપર પીકઅપ સ્ટેન્ડની અંદર જ ઉભી રહેતા મુસાફરોને ઘણી રાહત થઈ છે. આ ઉપરાંત ઇન્કવાયરી બારી પણ શરૂ થતા કઈ બસ કેટલા વાગ્યે આવવાની છે અને કઈ બસ નથી આવવાની તેનો ખ્યાલ મુસાફરોને આવી શકે છે.

જોકે, હજી અહીં પતરાના શેડ વાળું પીકઅપ સ્ટેન્ડ છે, જેને લીધે અહીં ઊભા રહેતા મુસાફરોને પણ આકરા તાપનો અનુભવ તો થાય જ છે. આ સાથે જ મુસાફરોને બેસવા માટે બાંકડા પણ નથી, જેને કારણે અહીં આવતા બાળકો, મહિલાઓ અને વડીલ મુસાફરોને ખૂબ જ તકલીફ પડે છે. આ સાથે જ અહીં પંખા પણ નાખવામાં આવ્યા નથી. જેને લીધે અહીં વેઇટિંગમાં ઊભા રહેતા મુસાફરો ગરમીને કારણે પરસેવાથી નીતરી જાય છે. અગાઉ જ્યારે આ પીકઅપ સ્ટેન્ડ શરૂ કરવામાં આવ્યું ત્યારે બેસવાના બાંકડા હતા અને શૌચાલયો પણ સારા હતા. બાદમાં હાલ તેમાનું કંઈ જ જોવા મળતું નથી.