સાંસદ રાજેશ ચુડાસમા, પૂર્વ ધારાસભ્ય રાજશી જોટવા, પૂર્વ મંત્રી જસા બારડે નોટોનો વરસાદ કર્યો
ખાસ-ખબર ન્યૂઝગિર-સોમનાથ, તા.17
વેરાવળમાં આવેલા આદ્રી ગામમાં મહાકાળી ગૌશાળાના લાભાર્થે લોકડાયરો યોજાયો હતો. આ લોકડાયરામાં તરભ વાળીનાથ મંદિરના મહંત જયરામગીરી બાપુ પર ડોલર અને ગોલ્ડ પ્લેટેડ નોટોનો વરસાદ કરવામાં આવ્યો હતો. છેલ્લાં 25 વર્ષથી આદ્રીમાં મહાકાળી ગૌશાળાના લાભાર્થે દર વર્ષે ભાદરવા મહિનાના સોમવારે પૂર્વ ધારાસભ્ય રાજસીભાઈ જોટવાના નેતૃત્વમાં આદ્રી ગામ સમસ્ત દ્વારા લોકડાયરાનું અને સમૂહ પ્રસાદીનું આયોજન કરવામાં આવે છે. ડાયરામાં મહંત જયરામગીરી બાપુને ડાયરાના મંચ પાસે લાવીને સાંસદ રાજેશ ચુડાસમા, પૂર્વ ધારાસભ્ય તેમજ આયોજક રાજસીભાઈ જોટવા અને ધારાસભ્ય તેમજ પૂર્વ કેબિનેટ મંત્રી જસાભાઈ બારડે અને ગામના યુવાનોએ મહંત જયરામગીરી બાપુ પર નોટોનો વરસાદ કર્યો હતો. સામાન્ય રીતે કોઈપણ ડાયરામાં પુરુષોની સંખ્યા વધુ જોવા મળે છે અને મહિલાઓ નહિવત હોય છે, જો કે આદ્રી ગામના આ ડાયરામાં 35000 લોકોમાં 7000 મહિલાઓ ઉપસ્થિત રહી હતી. વેરાવળ, પ્રભાસ પાટણ, તાલાળા અને સુત્રાપાડા વિસ્તારના આહીર સમાજ તેમજ અન્ય સમાજના લોકો આ ડાયરામાં હાજર રહ્યાં હતા. આ ધાર્મિક કાર્યમાં અનેક જ્ઞાતિના આગેવાનો, કાર્યકરો અને વિવિધ પક્ષોના પદાધિકારીએ ભાગ લીધો હતો. આ ડાયરામાં ડોલર, ગોલ્ડ પ્લેટેડ નોટો, 10ની નોટ થી લઈ 500ની નોટ પણ ઉડાડવામાં આવી હતી. આદ્રી ગામના યુવાનો રોમીલ રામ અને પિયુષ રામ દ્વારા ડાયરાના કલાકાર સાગરદાન ગઢવી, રાજસીભાઈ જોટવા અને જયરામગીરી બાપુ ઉપર ડાયરામાં 20 લાખથી વધુનો ઘોર થઈ હતી . જેમાં ડોલર અને ગોલ્ડ પ્લેટેડ નોટોનો વરસાદ કરવામાં આવ્યો હતો. ઘોર થયેલ રૂપિયા ગૌશાળામાં ગાયોની સેવા માટે વાપરવામાં આવશે.
