પાકિસ્તાનમાં ‘લૉકડાઉન’!

સ્કૂલો બે અઠવાડિયા માટે બંધ, કર્મચારીઓ માટે પણ વર્ક ફ્રોમ હોમ પોલિસી લાગુ: મંત્રીઓના પગાર-વિદેશ પ્રવાસો રોક્યા

ખાસ-ખબર ન્યૂઝ નવી દિલ્હી

પાકિસ્તાનના વડાપ્રધાન શાહબાઝ શરીફે સોમવારે વધતી ઓઈલ કિંમતોને ધ્યાનમાં રાખીને ખર્ચમાં કાપ મૂકવાની યોજનાની જાહેરાત કરી છે. આ અંતર્ગત સરકારી કચેરીઓ અઠવાડિયામાં માત્ર ચાર દિવસ ખુલશે અને અડધા કર્મચારીઓ વર્ક ફ્રોમ હોમ કરશે. આ અઠવાડિયાના અંતથી શાળાઓ બે અઠવાડિયા માટે બંધ રહેશે.
પાકિસ્તાની ન્યૂઝ ચેનલ જિયો ન્યૂઝ અનુસાર, મંત્રીઓ અને સલાહકારોના વિદેશ પ્રવાસો રોકી દેવામાં આવ્યા છે. મંત્રીઓ બે મહિના સુધી પગાર નહીં લે અને સાંસદોના પગારમાં 25%નો ઘટાડો થશે. તેમજ, પાકિસ્તાનમાં હવે બે મહિના સુધી સરકારી વાહનોને 50% ઓછું ઇંધણ મળશે. 60% સરકારી વાહનો ચાલશે નહીં. તમામ સરકારી વિભાગો પોતાના ખર્ચમાં 20%નો ઘટાડો કરશે. શરીફે કહ્યું કે અમેરિકા-ઇઝરાયલ-ઈરાન સંઘર્ષને કારણે ક્રૂડ ઓઇલની કિંમત 60 ડોલરથી વધીને 100 ડોલર પ્રતિ બેરલથી વધુ થઈ ગઈ છે. આ કારણોસર આ નિર્ણયો લેવામાં આવ્યા છે.

પાકિસ્તાનમાં પેટ્રોલ-ડીઝલના ભાવમાં ભડકો: પેટ્રોલ 335.86 અને ડીઝલ 321.17 પ્રતિ લિટરે પહોંચ્યું
પાકિસ્તાને પેટ્રોલ અને ડીઝલની કિંમતોમાં લગભગ 20%નો વધારો કર્યો છે. પેટ્રોલ અને ડીઝલની કિંમતોમાં 55 રૂપિયા (પાકિસ્તાની રૂપિયો) પ્રતિ લિટર સુધીનો વધારો કરવામાં આવ્યો છે. આ વધારા પછી પાકિસ્તાનમાં પેટ્રોલની કિંમત હવે 335.86 રૂપિયા પ્રતિ લિટર થઈ ગઈ છે. જ્યારે ડીઝલ 321.17 રૂપિયા પ્રતિ લિટરના સ્તરે પહોંચી ગયું છે. કિંમતોમાં વધારાના સમાચાર આવ્યા પછી તરત જ પાકિસ્તાનના મોટા શહેરો જેવા કે લાહોર અને કરાચીમાં પેટ્રોલ પંપો પર ભારે ભીડ જામી ગઈ. લોકો કલાકો સુધી પોતાની વારીની રાહ જોતા જોવા મળ્યા. લોકોને ડર છે કે આવનારા દિવસોમાં ક્યાંક ઓઈલની અછત ન સર્જાય.

બાંગ્લાદેશમાં પેટ્રોલ-ડીઝલના વેંચાણ પર મર્યાદા લદાઈ
બાંગ્લાદેશ સરકારે પેટ્રોલ અને ડીઝલના વેચાણ પર મર્યાદા લાગુ કરવી પડી છે. ઢાકા સહિતના ઘણા શહેરોમાં પેટ્રોલ પંપોની બહાર લાંબી કતારો લાગી છે અને લોકો ડરના કારણે વધુ ઓઈલ ખરીદીને જમા કરવાનો પ્રયાસ કરી રહ્યા છે. જમાખોરી અને અફવાઓને રોકવા માટે બાંગ્લાદેશ પેટ્રોલિયમ કોર્પોરેશન (બીપીસી) એ કડક નિયમો લાગુ કર્યા છે. હવે બાઇક માટે દિવસમાં માત્ર 2 લિટર પેટ્રોલ જ મળશે. ખાનગી કાર માટે મહત્તમ 10 લિટરની મર્યાદા નક્કી કરવામાં આવી છે, જ્યારે બસો અને ટ્રકો માટે 70 થી 220 લિટર સુધીની મર્યાદા રાખવામાં આવી છે.