પોલીસનાં નાક નીચે હાઇવે પર દારૂનું વેંચાણ

દારૂનાં વેંચાણનો વિડીયો વાયરલ થતાં વંથલી પોલીસને રેલો આવ્યો

બે દિવસ પહેલા જ દારૂ પીધેલાઓએ પોલીસ પર હુમલો કર્યો હતો

જૂનાગઢમાં લુખ્ખાઓ બેફામ : સફાળી જાગેલી પોલીસે કાર્યવાહી કરી

ખાસ-ખબર સંવાદદાતા

જૂનાગઢ જિલ્લામાં સબ સલામતની વાતો વચ્ચે કાયદો અને વ્યવસ્થાની સ્થિતીનું મુલ્યાંક થવું જોઇએ. જૂનાગઢ શહેર અને જિલ્લામાં લુખ્ખાતત્વો બેફામ બની ગયા છે. દારૂનાં હાટડા ચાલી રહ્યાં છે. જૂનાગઢનાં હાઇવે પર રોડ પર બનાવેલી દુકાનમાં દેશી દારૂનું ખુલ્લે આમ વેચાણ થતું હોવાનો વિડીયો સામે આવ્યો હતો અને વંથલી પોલીસનાં પગ નીચે રેલો આવી ગયો હતો. એટલુ જ નહી જૂનાગઢમાં બે દિવસ પહેલા દારૂ પીને પોલીસ પર હુમલાની ઘટના બની હતી. નશાખોરોથી ખુદ પોલીસ પણ સલામત ન હોવાની ચર્ચા જાગી છે. જૂનાગઢ જિલ્લામાં કાયદો અને વ્યવસ્થાની સ્થિતી કથળી હોય તેવું લાગી રહ્યું છે. લોકોની સલામતીને લઇ સવાલ ઉભા થયા છે. પોલીસનાં નાક નીચે બુટલેગરો બેફામ બન્યા છે. જાહેરમાં દારૂનુ વેંચાણ થઇ રહ્યું છે. પોલીસ મુકપ્રેક્ષક બની જોઇ રહી હોય તેવું લાગી રહ્યું છે. આમ પ્રજાને દંડો દેખાડતી પોલીસ બુટલેગરો સામે લાચાર બની જાય છે. જેના કારણે ખુલ્લે આમદારૂનું વેંચાણ થાય છે. આવા તત્વનો કોઇ જ રોકવાવાળું હોતું નથી.

વાડલા ફાટક નજીક રોડ ઉપર દ્વારકેશ ડિલકસ માલધારી ચા નામની દુકાનમાં દારૂ વેંચાતો હોવાનો વિડીયો વાયરલ થયો છે. જેમાં દુકાનદાર ખુલ્લેઆમ કોઇ પણ જાતનાં ડર વિના દારૂનું વેંચાણ કરે છે. આ અંગે વંથલી પોલીસને રજુઆતો થઇ હતી. પરંતુ પોલીસે કોઇ જ કાર્યવાહી કરી ન હતી. અંતે ગઇકાલે એક વિડીયો વાયરલ થયો હતો. જેમાં દુકાનદાર થડામાંથી દારૂની કોથળી કાઢીને આપે છે. વિડીયો વાયરલ થયા બાદ વંથલી પોલીસ સફાળી જાગી હતી અને કાર્યવાહી કરવા દોડી ગઇ હતી. દુકાનદાર નાથા વકમાતભાઇ કછોટ સામે કાર્યવાહી કરી હતી. પોલીસે રેઇડ પાડતા અહીંથી દારૂની 10 કોથળીઓ મળી આવી હતી. દુકાનદાર નાથા વકમાતભાઇ કછોટ સામે ગુનો નોંધી કાર્યવાહી કરી હતી. જાહેરમાં અને સરળતાથી દારૂ મળી રહેતો હોય પીનારા પણ બેફામ બન્યાં છે. બે દિવસ પહેલા જ દારૂ પીને બે શખ્સોએ પોલીસ મેન ઉપર હુમલો કર્યો હતો.

સામાન્ય પ્રજા સામે ધોકા પછાડતી પોલીસ અહીં લાચાર કેમ ?
પોલીસ સામાન્ય પ્રજા સામે ધોકા પછાડતી હોય છે. પરંતુ બુટલેગરો સામે લાચાર કેમ બની જાય છે ? તેવા સવાલ ઉભા થયા છે. બુટલેગર બેફામ બનતા દારૂ પી લુખ્ખાઓ સામાન્ય પ્રજાને રંજાડે છે. આવા તત્વો પોલીસ ઉપર પણ હુમલો કરી દે છે. પોલીસને દારૂનું વેંચાણ કરતા તત્વો સામે કડક હાથે કામ કરવાની માંગ ઉઠી છે.

હાઇવે પર દુકાન જ ગેરકાયદેસર
વાડલા ફાટક પાસે દુકાનમાંથી દારૂ પકડાયો છે. તે દુકાન હાઇવને બાજુમાં બનાવી નાખવામાં આવી છે. દુકાન જ ગેરકાયદેસર હોવાનું પણ ચર્ચામાં આવ્યું છે.

ભેંસાણનાં ગામડામાં મહિલાઓએ વિરોધ કર્યો હતો
ઘણા સમય પહેલા ભેંસાણ તાલુકાનાં ગામડામાં દેશી દારૂ વેંચાતો હોવાનું બહાર આવ્યું હતું. ગામડાની મહિલાઓએ દારૂ વેંચનારને પકડ્યો હતો. તેનો વિડીયો પણ વાયરલ થયો હતો. જૂનાગઢ શહેર અને જિલ્લામાં બેફામ દારૂનું વેંચાણ થઇ રહ્યું છે અને સરળતાથી દારૂ મળી રહે છે.