ભારતમાં TikTok પાછું આવ્યું? ચીની એપના પાછા ફરવાની ચર્ચા વચ્ચે સરકારે જવાબ આપ્યો

ભારતમાં વપરાશકર્તાઓ TikTok ની વેબસાઇટ હોમપેજ ઍક્સેસ કરી શકે છે તેવા અહેવાલો વચ્ચે, ઇલેક્ટ્રોનિક્સ અને માહિતી ટેકનોલોજી મંત્રાલયના સૂત્રોએ સ્પષ્ટતા કરી છે કે ચીની એપ્લિકેશન પરનો પ્રતિબંધ હજુ સુધી હટાવવામાં આવ્યો નથી.

શું દાવો કરાઇ રહ્યો છે?

એવો દાવો કરવામાં આવી રહ્યો છે કે ચાઇનીઝ વીડિયો સ્ટ્રીમિંગ પ્લેટફોર્મ TikTokની વેબસાઇટ 5 વર્ષ પછી ભારતમાં ફરીથી લોન્ચ કરવામાં આવી છે. જોકે આ એપ્લિકેશન હજુ પણ ઉપલબ્ધ નથી. હકીકતમાં, 2020માં ભારત સરકારે સુરક્ષા કારણોસર TikTok સહિત ઘણી ચાઇનીઝ એપ્લિકેશનો પર પ્રતિબંધ મૂક્યો હતો.

બિઝનેસ ટુડેના રિપોર્ટમાં દાવો કરાયો હતો કે, ઘણા વપરાશકર્તાઓ TikTokની વેબસાઇટ ઍક્સેસ કરી શકે છે, પરંતુ આ એપ્લિકેશન Google Play Store અને Apple App Store પર દેખાતી નથી. TikTok કે તેની પેરેન્ટ કંપની Bytedance એ એપના ભારતમાં પાછા ફરવા અંગે કોઈ સત્તાવાર નિવેદન આપ્યું નથી.

તમને જણાવી દઈએ કે, જૂન 2020માં જ્યારે ગલવાન ઘાટીમાં ભારત-ચીન વચ્ચે તણાવની સ્થિતિ સર્જાઈ હતી ત્યારે TikTok પર પ્રતિબંધ મૂકવામાં આવ્યો હતો. ભારત સરકારે 59 મોબાઇલ એપ્લિકેશનો પર પ્રતિબંધ મૂક્યો હતો, તેમને રાષ્ટ્રીય સુરક્ષા માટે ખતરો ગણાવ્યો હતો. આ યાદીમાં TikTok, ShareIt, UC બ્રાઉઝર, UC News અને ઘણી લોકપ્રિય એપ્લિકેશનો સામેલ હતી. આ પ્રતિબંધ માહિતી ટેકનોલોજી અધિનિયમ 2000 ની કલમ 69A હેઠળ લાદવામાં આવ્યો હતો.