જેના કાર્યમાં ટાઢ, તાપ, ભય, પ્રીતિ, સમૃદ્ધિ અથવા અસમૃદ્ધિ વિઘ્ન કરી શકતા નથી; તે જ પંડિત કહેવાય છે

અર્થામૃત

કથામૃત: ન્યુયોર્ક શહેર અને બ્રુકલિનને જોડતો એક પુલ બનાવવાનો વિચાર આવતા જહોન ઓગસ્ટસ રોબલિંગ નામના એન્જિનિયરે પુલની ડિઝાઇન બનાવી. તમામ નિષ્ણાતોએ તેની આ ડિઝાઇન તદ્દન અવ્યવહારુ છે અને આવો પુલ બની જ ન શકે એમ કહીને એને ગાંડો ગણાવ્યો. જહોનને માત્ર એક જ વ્યક્તિનો સાથ હતો અને તે હતો તેનો દીકરો વોશિંગ્ટન રોબલિંગ. બાપ-દીકરાએ સાથે મળીને કામગીરી શરૂ કરી. આ માટે એન્જિનિયરોની એક ટીમ તૈયાર કરી. કામ હજુ તો વેગ પકડે તે પહેલા જ કામ કરતા બનેલી એક દુર્ઘટનાને કારણે તા. 22-7-1869ના રોજ જહોન રોબલિંગનું અવસાન થયું. ‘પિતા વગર આ કામ આગળ કેમ વધશે?’ એમ વિચારવાને બદલે બાપનું સપનું પૂર્ણ કરવા માટે હવે દીકરાએ બધાં જ કામની જવાબદારી પોતાના માથા પર લીધી. પણ વિધિની વક્રતા જુવો કે વોશિંગ્ટન રોબલિંગ પણ બાપની જેમ જ તા. 3-1-1870ના રોજ એક દુર્ઘટનાનો ભોગ બન્યો અને એનું શરીર કામ કરતું બંધ થઈ ગયું. પુલ બનાવવા માટે કામ કરતા એન્જિનિયરોને એ કોઈ માર્ગદર્શન આપી શકે એમ ન હતો, કારણ કે એના હાથની માત્ર એક આંગળી જ કામ કરતી હતી. પિતાએ હાથ પર લીધેલા પ્રોજેક્ટને પૂર્ણ કરવા હવે વોશિંગ્ટને પત્ની એમિલીનો સાથ લીધો. માત્ર આંગળીના ઇશારે એણે એક ભાષા વિકસાવી જે માત્ર એમિલી જ સમજી શકતી હતી. એમિલીએ પણ પતિને પૂરો સહકાર આપ્યો. એ ગણિત અને ઇજનેરીવિદ્યા શીખી અને પતિ જે કંઈ પણ આંગળીના ઇશારે સમજાવે તે પ્રમાણે પુલનું કામ કરતા ઇજનેરોને એ માર્ગદર્શન આપવા લાગી. પૂરા 13 વર્ષ સુધી આ રીતે ચાલ્યું અને 1883ના વર્ષમાં જહોન રોબલિંગનું સપનું પુત્ર વોશિંગ્ટન અને પુત્રવધૂ એમિલીએ સાકાર કરી બતાવ્યું. આજે આ બ્રુકલિન બ્રિજ પરથી રોજના લાખો લોકો પસાર થાય છે.

બોધામૃત

જો મનોબળ દ્દઢ હોય તો દુનિયાની કોઈ તાકાત આપણને સફળ થતા રોકી શકે નહીં. ગમે તેવી મુશ્કેલીઓની વચ્ચે પણ આપણી સાહસયાત્રા ચાલુ રહે તો મુકામ સુધી પહોંચે જ એમાં શંકાને કોઈ સ્થાન નથી. કોઈ કામ હાથ પર લો અને કોઈ પ્રશ્નો ઊભા થાય ત્યારે આ ઘટનાને યાદ કરજો.

અનુભવામૃત
અડચણો ત્યારે જ દેખાય છે, જ્યારે તમે તમારા ધ્યેય પરથી આંખ ખસેડી લો છો! -હેન્રી ફોર્ડ