દેશમાં બીજો ગાંધી પાકશે તો એ રાહુલ ગાંધી : ઇન્દ્રનીલ

પૂર્વ ધારાસભ્ય ઈન્દ્રનીલે માનસિક સંતુલન ગુમાવ્યું કે શું?

ગાંધીજીમાં તો ક્યાંક લુચ્ચાઈ હતી; કોંગ્રેસના પૂર્વ MLAનો વિડીયો વાઇરલ

કોંગ્રેસના જ નેતા દ્વારા મહાત્મા ગાંધીજીનું અપમાન કરતો
વિડીયો સામે આવતા સવાલો ઉઠી રહ્યા છે

ખાસ-ખબર ન્યૂઝ  મુંબઇ, તા.11

રાજકોટમાં કોંગ્રેસના દિગ્ગજ નેતા અને પૂર્વ MLA ઈન્દ્રનીલ રાજગુરૂનો એક વિડીયો વાઇરલ થયો છે. આ વિડીયોમાં તેઓ રાહુલ ગાંધીના ભરપેટ વખાણ કરતા જોવા મળી રહ્યા છે. એટલું જ નહીં રાહુલ ગાંધીનાં આ વખાણ કરવામાં ભાન ભૂલી ઈન્દ્રનીલ રાષ્ટ્રપિતા મહાત્મા ગાંધીજીને ’લુચ્ચા’ કહીને સંબોધી રહ્યા છે. આ વિડીયો હાલ સોશિયલ મીડિયામાં ભારે વાઇરલ થયો છે. વિડીયોમાં ઈન્દ્રનીલ બોલી રહ્યા છે કે, આવતા દિવસોમાં મારા શબ્દો લખવા હોય તો લખી લેજો, આ દેશમાં જો બીજો ગાંધી પાકશે તો એ રાહુલ ગાંધી હશે, સચ્ચાઈનાં રસ્તે છે, ગાંધીજીમાં તો ક્યાંક લુચ્ચાઈ હતી. આ માણસ તો સંપૂર્ણપણે નિખાલસ અને સાચો માણસ છે. તેમને પપ્પુ ઠેરવવાનો પ્રયત્ન કર્યો અને તેના માટે જ અબજો રૂપિયા વાપરી નાખ્યા, આમ છતાં તેઓ અડગ રહીને લડ્યા છે. આજે દેશ તેમને સ્વીકારે છે કે, માણસ બરાબર છે. નરેન્દ્ર મોદી બફાટ કરે તેનાથી કોઈને કઈ ફરક પડતો નથી. પરંતુ રાહુલ ગાંધી એમ કહે કે, ગઉઅ સરકાર બનતી નથી અને 200થી વધુ બેઠક તેઓને નહીં મળે ત્યારે તેમાં કાંઈક તથ્ય હશે.

ઉલ્લેખનીય છે કે, આ વિડીયો કઈ જગ્યાનો તેમજ ક્યારનો છે તે હજુ સામે આવ્યું નથી. પરંતુ વિડીયોમાં સ્ટેજ ઉપર ઈન્દ્રનીલ ભાષણ કરતા નજરે પડી રહ્યા છે. કોર્પોરેટર વશરામ સાગઠિયા સહિતના કોંગ્રેસના નેતાઓ પણ જોવા મળી રહ્યા છે. પરેશ ધાનાણીનું બેનર લાગેલું પણ જોવા મળી રહ્યું છે. ત્યારે વિડીયો આગામી લોકસભા ચૂંટણીનાં પ્રચારનો હોવાનું જણાય રહ્યું છે. જોકે, હકિકતમાં આ વિડીયોમાં કેટલી સચ્ચાઈ છે તે તપાસનો વિષય છે. પરંતુ કોંગ્રેસના જ નેતા દ્વારા મહાત્મા ગાંધીજીનું અપમાન કરતો આ વિડીયો સામે આવતા અનેક સવાલો ઉઠી રહ્યા છે. વધુમાં જણાવ્યું હતું કે, મેં મારા શબ્દો ઉમેર્યા નથી. ઇન્દિરા હતા એ લોખંડી મહિલા હતા. આ દેશ ફરીથી કોઈ ગાંધીને જોશે તો એ રાહુલ ગાંધી હશે. ગાંધીજીને પણ કોંગ્રેસ સાથે કોઈવાર ઇસ્યુ થયા હતા. રાહુલજીને પણ થાય છે. પરંતુ દેશ હિતની વાત આવે ત્યારે બન્ને પક્ષાપક્ષીથી દૂર રહી દ્રઢતા, અહિંસા અને હિંમતથી કરનારા છે.

લુચ્ચાઈનો પર્યાય શબ્દ ચતુરાઈ: ઇન્દ્રનીલ રાજગુરૂ

ગાંધીજી માટે અપમાનજનક શબ્દો પ્રયોગ કરવાના મામલે ઇન્દ્રનીલ રાજગુરૂએ પ્રતિક્રિયા આપતા જણાવ્યું હતું કે, પહેલા તો આનંદનો વિષય છે કે, ગાંધીજીનો વિરોધ કરનારા લોકો ગાંધીજી માટે વાત કરી રહ્યા છે. ઇતિહાસમાં જે લખાયેલી છે, પુસ્તકોમાં જે લખાયું છે તે વાત મેં કરી હતી. અંગ્રેજો સામે જે નીડરતાથી ગાંધીજી લડ્યા હતા. રાહુલ ગાંધી ભાજપ સામે લડી રહ્યા છે. ગાંધીજી અને રવિન્દ્રનાથ ટાગોરના સબંધો અને શબ્દોને ટાંકીને લખાયેલા ઇતિહાસમાંથી મેં નિવેદન આપ્યું હતું. લુચ્ચાઈનો પર્યાય શબ્દ એટલે ચતુરાઈ છે. લોકશાહી બચાવવા માટે રાહુલ ગાંધી લડી રહ્યા છે એ જોતા આવતા દિવસોમાં લોકો રાહુલ ગાંધીમાં ગાંધીજી જોશે.