“હું બ્રહ્મા, હું નારાયણ, હું જ મહાદેવ છું”

છાંયા કઠપૂતળીના માધ્યમથી ’શિવપુરાણ’ની મનોરમ્ય કથાઓ પ્રસ્તુત થઈ

ખાસ-ખબર ન્યૂઝ ગિર-સોમનાથ
’કલા દ્વારા આરાધના-સોમનાથ મહોત્સવ’ના બીજા દિવસે પદ્મશ્રીથી સન્માનિત કલાકાર રામચંદ્ર પુલાવરના પરિવાર દ્વારા છાંયા કઠપૂતળીના માધ્યમથી ’શિવપુરાણ’ની મનોરમ્ય પ્રસ્તુતિ રજૂ કરવામાં આવી હતી. છાંયા કઠપૂતળીના માધ્યમથી સર્વેએ ’પ્રાણીજગતની વિવિધ લાક્ષણિકતાઓ’ સાથે ’શિવ-પાર્વતી મિલન’, ’ઋષિ-શિષ્ય સંવાદ’, ’આશુતોષ શશાંક શેખર…’ શિવસ્તુતિ, ’સમુદ્રમંથન’ જેવી પૌરાણીક અને આદ્યાત્મિક કથાઓ માણી હતી.

રાજીવ પુલાવર દ્વારા રજૂ થયેલી ’થાલપાવાકુટ્ટુ’ કળાના માધ્યમથી ’શિવપુરાણ’ના વિવિધ પાત્રને છાયાઓના માધ્યમથી જીવંત બનાવવામાં આવ્યાં હોય એવી ઉપસ્થિત સર્વેએ અનુભૂતિ કરી હતી. ઉલ્લેખનીય છે કે, મલયાલમમાં કઠપુતળીની આ કલાને ’થાલપાવાકુટ્ટુ’ તરીકે ઓળખાય છે. જે ’લેધર પપેટ પ્લે’ એટલે કે શેડો પપેટ્રી (છાંયા કઠપુતળી) ના નામથી ખ્યાત છે. આ કળાના માધ્યમથી લોકકથા, પૌરાણિક વાર્તાઓ, ’રામાયણ’,’શિવ કથા સહિત આધ્યાત્મિક કથાઓ રજૂ કરવામાં આવે છે.