હિજાબ મામલો: સુપ્રીમ કોર્ટે કર્ણાટક હાઈકોર્ટના વચગાળાના આદેશ સામેની અરજી પર તાત્કાલિક સુનાવણી કરવાનો ઇનકાર કર્યો 

કર્ણાટકમાં ઘણા દિવસોથી સ્કૂલ-કોલેજમાં હિજાબ પહેરવાને લઈને વિવાદ ચાલી રહ્યો છે. હવે હિજાબ મામલે કર્ણાટક હાઈકોર્ટના વચગાળાના આદેશને સુપ્રીમ કોર્ટમાં પડકારવામાં આવ્યો છે. પરંતુ સુપ્રીમ કોર્ટે હાઈકોર્ટના વચગાળાના આદેશ સામેની અરજી પર તાકીદે સુનાવણી કરવાનો ઈન્કાર કરી દીધો છે. સુપ્રીમ કોર્ટે કહ્યું છે કે તે સમય આવશે ત્યારે જ આ મામલે હસ્તક્ષેપ કરશે. નોંધનીય છે કે ગુરુવારે હાઈકોર્ટે આ મામલો પેન્ડિંગ ન થાય ત્યાં સુધી સ્કૂલ-કોલેજમાં કોઈપણ ધાર્મિક વસ્ત્રો કે હિજાબ પહેરવા પર પ્રતિબંધ મૂક્યો હતો. સુપ્રીમ કોર્ટમાં ગયેલા અપીલકર્તાઓનું કહેવું છે કે હાઈકોર્ટનો આ વચગાળાનો આદેશ મુસ્લિમ અને બિન-મુસ્લિમ વિદ્યાર્થીનીઓ વચ્ચે ભેદ ઉભો કરે છે. જો કે, અગાઉ કોંગ્રેસના નેતા અને વરિષ્ઠ વકીલ કપિલ સિબ્બલે પણ સુપ્રીમ કોર્ટમાં અપીલ કરી હતી. પરંતુ સુપ્રીમ કોર્ટે તેમની દલીલ સ્વીકારી ન હતી. પ્રાપ્ત માહિતી અનુસાર, અરજીકર્તા રહેમતુલ્લા કોથવાલ અને આદિલ અહેમદે સુપ્રીમ કોર્ટમાં અપીલ દાખલ કરી છે. અરજીમાં કહેવામાં આવ્યું છે કે કર્ણાટક હાઈકોર્ટનો વચગાળાનો આદેશ ધર્મનિરપેક્ષતાની ભાવના અનુસાર નથી.