ખાસ-ખબર ન્યૂઝ અમરેલી
હવામાન વિભાગની આગાહીના પગલે ગઇકાલ સવારથી જ અમરેલી જિલ્લામાં વાદળછાયુ વાતાવરણ સર્જાયું હતું. અને બપોર બાદ અચાનક વાતાવરણમાં પલટો આવ્યો હતો. અને વરસાદન ધમાકેદાર એન્ટ્રી થઈ હતી. રાજુલા- જાફરાબાદ, ખાંભા, ધારી, બગસરા, લાઠી, લિલિયા પંથકમાં ધોધમાર વરસાદ વરસ્યો હતો. રાજુલા તાલુકાના ડુંગર, કુંભારીયા, દેવકા, ખાંભલીયા, છતડીયા, હિંડોરણા, નવી-જુની માંડરડી, ધારેશ્વર સહિત ગામોમાં વરસાદ પડ્યો હતો. અસહ્ય ગરમી બાદ વાતાવરણમાં ઠંડક પ્રસરી હતી. ત્યારે સવારથી સાંજ સુધી વરસાદ વરસ્યો હતો. થોડી કલાકોના વિરામ બાદ ફરી રાત્રીએ રાજુલા પંથકમાં ધોધમાર વરસાદ શરૂ થયો હતો. રાજુલા શહેર સહિત ગ્રામ્ય વિસ્તારોમાં વીજળીના કડાકાભડાકા અને પવન સાથે ધોધમાર વરસાદ વરસ્યો હતો. ધોધમાર વરસાદને પગલે રાજુલા શહેરમાં પવન અને ધોધમાર વરસાદને કારણે વીજળી ગુલ થઇ હતી. જોકે બે કલાક બાદ ફરી વીજપુરવઠો કાર્યરત થયો હતો. રાજુલા શહેરના હવેલી ચોક વિસ્તાર, એસટી બસ સ્ટેન્ડ નજીક સહિત વિવિધ વિસ્તારોમાં વરસાદના પાણી ભરાયા અને રોડ પર વહેતા થયા હતા. બીજીતરફ અમરેલી શહેરમાં પણ ધોધમાર વરસાદ પડ્યો હતો. વીજળીના કડાકાભડાકા સાથે ધોધમાર વરસાદથી અમરેલી શહેર પાણી પાણી થયું હતું. વરસાદી પાણી રોડ પર વહેતા થયા હતા. અમરેલીના રાજકમલ ચોક, ફોરવર્ડ સર્કલ અને ભીડભંજન મંદિર પાસે પાણી ભરાયા હતા. પાણી ભરાતા વાહનચાલકો અને રાહદારીઓ મુશ્કેલીમાં મુકાયા હતા. અમરેલીમાં વરસાદને કારણે નવરાત્રી મહોત્સવ દરમિયાન સાતમા નોરતે ધોધમાર વરસાદ પડતા અમરેલીમા આવેલ ખોડલધામ અને થનગનાટ પાર્ટી, સૈયારા પાર્ટી પ્લોટ બંધ રહ્યો હતો. ગતરાત્રીએ અમરેલીનો ઠેબી ડેમનો એક દરવાજો ખોલાયો હતો. ઠેબી ડેમમાં સપાટી જાળવવા માટે 0.3 મીટરનો એક દરવાજો ખોલવામાં આવ્યો હતો. ડેમનો દરવાજો ખોલાતા તંત્ર દ્વારા નીચેનોળા વિસ્તારોને હેડ કરવામાં આવ્યા હતા. આ તરફ રાજુલાના શહેરમાં પણ વિવિધ વિસ્તારોમાં થતી શેરી ગરબીઓ પણ બંધ રાખવામાં આવી હતી. વરસાદે કારણે ખેલૈયાઓના ઉત્સાહમાં ભંગ પડયો હતો. અને સાતમા નોરતે ગરબાનું આયોજન થઇ શક્યું ન હતું. રાજુલા પંથકમાં દોઢ ઇંચ કરતા વધારે વરસાદ નોંધાયો છે. હાલ આજરોજ વહેલી સવારથી જ વરસાદનું આગમન થયું રાજુલા પંથકમાં વરસાદી માહોલ યથાવત છે.
