રાજસ્થાન સામે શાનદાર વિજય સાથે પોઇન્ટ ટેબલમાં ગુજરાત ટાઇટન્સ નંબર 1

સુદર્શનની આક્રમક રમત: 218 રનના જીતના ટાર્ગેટ સામે રાજસ્થાન 159 જ બનાવી શક્યું

ખાસ-ખબર ન્યૂઝ અમદાવાદ

સાઈ સુદર્શનની શાનદાર અડધી સદીની મદદથી ગુજરાત ટાઇટન્સે બુધવારે રાજસ્થાન રોયલ્સ સામે 58 રનથી શાહી વિજય નોંધાવ્યો હતો. ચોથા વિજય સાથે ગુજરાતની ટીમ ટોપ પર પહોંચી ગઈ છે. ગુજરાતે સુદર્શન (82)ની ત્રીજી અડધી સદીની મદદથી છ વિકેટે 217 રન બનાવ્યા હતા. ત્યારબાદ રાજસ્થાન 19.2 ઓવરમાં 159 રનમાં ઓલઆઉટ થઈ ગયું હતું.રાજસ્થાનના બેટ્સમેનોએ રન બનાવવા માટે સંઘર્ષ કરવો પડ્યો હતો. હેટમાયર (52) અને કેપ્ટન સેમસન (41) સિવાય ગુજરાતના બોલરો સામે કોઈ ટકી શક્યું ન હતું. આ બે સિવાય માત્ર પરાગ (26) જ ટૂર માર્ક સુધી પહોંચી શક્યો.લક્ષ્ય પૂરો કરવા રાજસ્થાનના બે બેટ્સમેન માત્ર 12 રન પર પેવેલિયન પરત ફર્યા હતા. યશસ્વી (6)ને અરશદે અને નીતિશ રાણાને સિરાજે આઉટ કર્યો હતો. સંજુએ પરાગ સાથે ત્રીજી વિકેટ માટે 48 રન જોડ્યા. ખેજરોલિયાએ પરાગને બટલરના હાથે કેચ કરાવીને આ વધતી ભાગીદારીને તોડી હતી.આગામી ઓવરમાં રાશિદે જુરેલને પણ આઉટ કર્યો હતો. સંજુએ હેટમાયર સાથે મળીને પાંચમી વિકેટ માટે 48 રન જોડ્યા અને સ્કોર 100ની પાર પહોંચાડ્યો. પ્રસિદે સંજુને આઉટ કરીને ટીમને પાંચમી સફળતા અપાવી. હેટમાયરની ઇનિંગ્સનો અંત, પ્રસિધ્ધ એ કિશોરના હાથે કેચ કરાવીને કર્યો હતો. ગુજરાત તરફથી પ્રસિદે ત્રણ જ્યારે રશીદ અને કિશોરે બે-બે વિકેટ ઝડપી હતી.આ પહેલા સુદર્શન સિવાય બટલર અને શાહરૂખે 36-36 રન બનાવ્યા હતા. જ્યારે રાહુલ તેવટિયાએ અણનમ 24 રનનું યોગદાન આપ્યું હતું. આ સાથે ટીમ બેસો પાર કરવામાં સફળ રહી હતી. આર્ચરના ઇનસ્વિંગર બોલ પર કેપ્ટન ગિલ (2) સસ્તામાં આઉટ થયો હતો. સુદર્શન અને બટલરે બીજી વિકેટ માટે 47 બોલમાં 80 રનની ભાગીદારી કરીને સારા સ્કોરનો પાયો નાખ્યો હતો. સુદર્શને પ્રથમ છ ઓવરમાં રન રેટ વધાર્યો હતો. તીક્ષ્ણાએ બટલરને કઇઠ આઉટ કરી ભાગીદારીનો અંત કર્યો હતો. રાજસ્થાનના બોલરોએ મધ્ય ઓવરોમાં દબાણ બનાવવાનો પ્રયાસ કર્યો હતો. પરંતુ પછી શાહરૂખે દેશપાંડે અને પછી તીક્ષ્ણાના પર શાનદાર શોટ ફટકારીને રનની ગતિ વધારી. શાહરૂખે 14મી ઓવરમાં તીક્ષ્ણાના પર સતત બોલ પર એક સિક્સ અને બે ફોર ફટકારી હતી.જોકે, તે આ બોલરનો શિકાર બન્યો હતો. રધરફર્ડ આવતાની સાથે જ તેણે પહેલા જ બોલ પર લોંગ ઓન પર સ્કાયસ્ક્રેપર સિક્સર ફટકારીને દર્શકોનો ઉત્સાહ વધાર્યો હતો. પરંતુ પછીની ઓવરમાં તે સંદીપના વાઈડ બોલ પર બેટ લઈને પાછો ફર્યો અને સંજુના હાથે કેચ થયો.