વૃદ્ધિ : ક્રોપ કવરની મદદથી મરચીની ખેતી કરી આવકમાં વધારો કરતા ઉમરેઠીના ખેડૂત માલદેભાઈ

તાપમાનમાં વધારો-ઘટાડો, ઋતુ પરિવર્તનમાં ફેરફાર સામે રક્ષણ આપે છે ક્રોપ કવર

ખાસ-ખબર ન્યૂઝ જૂનાગઢ
પ્રાકૃતિક અને રક્ષણાત્મક ખેતી થકી ગીર સોમનાથ જિલ્લાના ખેડૂતો પોતાની આવકમાં વૃદ્ધિ કરી રહ્યાં છે. કૃષિ ક્ષેત્રે થતાં મહત્તમ સંસાધનોનો ઉપયોગ અને સંશોધનો થકી ખેડૂતો પોતાની જમીનની ફળદ્રુપતાને પુન:જીવીત તો કરી જ રહ્યાં છે. આ સાથે જ અનેકવિધ મિશ્રપાકોના વાવેતર થકી આર્થિક ઉપાર્જન કરી રહ્યાં છે. ત્યારે ઉમરેઠી ગામના ખેડૂતની ખેત પદ્ધતી દ્વારા વધુ આવક મેળવવાની પ્રેરણા લઇ શકાય તેમ છે.

મહેનતુ માનવી ખેડૂત માલદેભાઈ લખમણભાઈ રામ પોતાના 3 વિઘા ખેતરમાં ક્રોપકવરની મદદથી શિયાળામાં મરચીનું વાવેતર કરી અને પોતાની આવક વધારી રહ્યાં છે.માલદેભાઈએ જણાવ્યું હતું કે, 1 વિઘામાં મરચીના પાકના માધ્યમથી અંદાજિત રૂ. દોઢ લાખનું ઉત્પાદન મેળવી શકાય છે. આ રીતે મેં મારા 3 વિઘા ખેતરમાં મરચીનું વાવેતર કર્યું છે. જ્યારે ખેતીની ટેક્નોલોજીસભર નહોતી ત્યારથી હું મરચીનું વાવેતર કરૂં છું પરંતુ ટેક્નોલોજી આવ્યા પછી હવે પરંપરાગત ખેતી કરતાં ખૂબ જ ફાયદો થયો છે. ટેક્નોલોજીના કારણે શારીરિક શ્રમ ઘટ્યો છે અને ખેત ઉત્પાદનમાં ફાયદો પહોંચે છે.
અમે મરચીનું વાવેતર અનેક પદ્ધતિથી કરેલું છે. પહેલા જમીનમાં ફૂગ ખૂબ જ પરેશાન કરતી હતી એટલે અમે ડ્રિપ પદ્ધતિથી ખેતી કરવા લાગ્યાં હતાં. જોકે, દર વર્ષે ક્લાઈમેટ ચેન્જના કારણે ક્રોપ કવર પદ્ધતિથી મરચીનું ઉત્પાદન મેળવવા લાગ્યાં છીએ. આ રીતે ક્રોપ કવર પદ્ધતિથી ખૂબ જ ફાયદો થયો છે.

ક્રોપ કવર માટે સરકાર દ્વારા અપાય છે સહાય
સરકાર દ્વારા વખતોવખત જાહેર કરેલ પેનલમાં સમાવિષ્ટ ઉત્પાદકના અધિકૃત વિકેતા પાસેથી આ ક્રોપ કવર ની ખરીદી કરવાની હોય છે. શાકભાજી પાકો માટે ઇંછઝ-2 યુનિટ કોસ્ટ અંતર્ગત ક્રોપ કવર સહાય માટે મહત્તમ રૂ. 50,000 પ્રતિ હેક્ટર ખર્ચના 50% કે મહત્તમ રૂ.25,000 પ્રતિ હેક્ટરની મર્યાદામાં, બે માંથી જે ઓછું હોય તે સહાય ખેડૂતને મળવાપાત્ર રહેશે.ખાતાદીઠ અને લાભાર્થીદીઠ ઓછામાં ઓછા 0.20 હેકટરથી મહત્તમ 2.00 હેકટર સુધીના વાવેતરમાં ઉપયોગ કરેલ કવર/બેગ માટે આજીવન એકવાર સહાય મળવાપાત્ર રહેશે.