4 વાગ્યાથી રાજકોટ-જામનગર હાઈવે પર ભારે વાહનો પ્રતિબંધિત, વૈકલ્પિક રૂટ જાહેર: 482 પોલીસકર્મી બંદોબસ્તમાં તહેનાત રહેશે
ખાસ-ખબર ન્યૂઝ રાજકોટ
- Advertisement -
ભારત-ઈંગ્લેન્ડ વચ્ચે ચાલી રહેલી ટી-20 સિરિઝની ત્રીજી મેચ આજે(28 જાન્યુઆરી) રાજકોટના નિરંજન શાહ ક્રિકેટ સ્ટેડિયમમાં રમાવા જઈ રહી છે. ખંઢેરી પાસે આવેલા સ્ટેડિયમમાં રમાનારી મેચના પગલે બપોરે 4 વાગ્યાથી રાત્રે 1 વાગ્યા સુધી રાજકોટ-જામનગર હાઈવે પર ભારે વાહનો પર પ્રતિબંધ મૂકી ડાઈવર્ઝન આપવામાં આવ્યું છે. ઈન્ટરનેશનલ મેચમાં હજારોની સંખ્યામાં પ્રેક્ષકો આવવાના હોય પોલીસ વિભાગ તરફથી ચુસ્ત સુરક્ષા બંદોબસ્ત ગોઠવવામાં આવ્યો છે. પોલીસની સાથે ખાનગી બાઉન્સરો પણ ખડેપગે રહેશે. રાજકોટમાં આજે રમાનારી ટી-20 મેચને લઈ ગ્રાઉન્ડથી લઈ રસ્તાઓ પર કેવી વ્યવસ્થા છે તેની આગળ વાત કરીએ.
રાજકોટ જામનગર રોડ પર ખંઢેરી સ્થિત નિરંજન શાહ ક્રિકેટ સ્ટેડીયમ ખાતે ભારત-ઈગ્લેન્ડ વચ્ચે ટી-20 સિરીઝનો ત્રીજો મેચ આવતીકાલે રમાનાર છે જેને લઈ રાજકોટ ગ્રામ્ય પોલીસ દ્વારા ચુસ્ત પોલીસ બંદોબસ્ત વ્યવસ્થા કરી દેવામાં આવી છે. જેમાં જિલ્લા પોલીસ વડાના માર્ગદર્શન હેઠળ ડી.વાય.એસ.પી સહિત 482 જેટલા પોલીસ તેમજ 400 ખાનગી સિક્યુરિટી તૈનાત રહેશે.
તા.01.11.2019થી મોટર વ્હીકલ એકટના કાયદાના સુધારા મુજબ ટુ-વ્હીલર વાહન ચાલકોને ફરજીયાત હેલ્મેટ પહેરવાનો કાયદો અમલમા આવેલ છે. જે મુજબ ટુ-વ્હીલર વાહન ચાલકોએ ફરજીયાત હેલ્મેટ પહેરવાનો રહેશે. પરંતુ સૌરાષ્ટ્ર ક્રિકેટ એસોસિયેશન હેઠળના નિરંજન શાહ ક્રિકેટ સ્ટેડીયમના નિતી નિયમો મુજબ સ્ટેડીયમમાં હેલ્મેટ અંદર લઇ જવા પર પ્રતિબંધ મુકવામાં આવેલ છે. તેમજ સ્ટેડીયમની અંદર કે બહાર ગેઇટ ઉપર હેલ્મેટ રાખવાની માટેની કોઇ વ્યવસ્થા કરવામાં આવેલ નથી જેથી ટુ વ્હીલર વાહનો લઈ ક્રિકેટ મેચ જોવા આવનાર તમામ પ્રેક્ષકોએ પોતાના હેલ્મેટ પોતાના વાહન સાથે સુરક્ષિત રીતે લોક કરવા માટેની વ્યવસ્થા કરીને આવવા માટે જાહેર જનતાને પોલીસ દ્વારા સુચના કરવામાં આવે છે.
સ્ટેડિયમ પર પ્રેક્ષકોનું થશે ભરપૂર મનોરંજન
ભારત અને ઇંગ્લેન્ડ વચ્ચેની ત્રીજી ટી-20 મેચ સાંજના 7 વાગ્યાથી શરૂ થશે જેનું લાઇવ પ્રસારણ 25 કેમેરા, બે જિમી, બે બગી કેમેરા, એક ડ્રોન અને સ્પાઇડર કેમેરાની મદદથી કરવામાં આવશે. આ સાથે સાથે મેદાનની અંદર ચાર મોટી કઊઉ સ્ક્રીન પણ મુકવામાં આવી છે જેમાં પણ લોકો લાઇવ સ્ક્રીન નિહાળી શકશે. મનોરંજન માટે ડીજેનું પણ આયોજન કરવામાં આવ્યું છે જેમના દ્વારા મેચ દરમિયાન ચોગ્ગા, છગ્ગા કે વિકેટ દરમિયાન ડીજે વગાડી લોકોને મનોરંજન પૂરું પાડવામાં આવશે.
