ગીરગઢડા અજાણ્યા વાહન ચાલકે બાઇકને હડફેટે લેતાં યુવાનનું મોત

ખાસ-ખબર સંવાદદાતા
મોટા સમઢીયાળા ગામે રહેતા ધનજી જાદવ ઝાલાવાડીયા, કે જે ગીરગઢડા ખાતે કૌટુંબિક લગ્ન પ્રસંગે ગયો હતો. ત્યાંથી પરત ફરતી વેળાએ બાઈક પર પોતાના ઘરે આવતો હતો. ત્યારે ઈટવાયા-ખીલાવડ રોડ પર અજાણ્યા વાહન ચાલકે બાઇકને પાછળથી અડફેટે લેતા યુવક બાઈક સાથે ફંગોળાયો હતો. જ્યાં બાઇક સવાર ધનજી રસ્તાની સાઈડમાં પટકાતા શરીરના ભાગે ગંભીર ઇજા પહોંચતા લોહીલુહાણ હાલતમાં ઢળી પડ્યો હતો. અજાણ્યો વાહન ચાલક અક્સ્માત સર્જી નાશી છૂટ્યો હતો. આજુબાજુના વાડી વિસ્તારમાં રહેતા લોકોને અકસ્માતનો અવાજ આવતા તાત્કાલિક ઘટના સ્થળે દોડી ગયા હતા. ઈમરજન્સી 108ને જાણ કરતા યુવકને એમ્બ્યુલન્સ મારફતે ઉના સરકારી હોસ્પિટલે ખસેડવામાં આવ્યો હતો. પરંતું સારવાર મળે તે પહેલા યુવકનું મોત નિપજ્યું હતુ.
યુવકને ઉના સરકારી હોસ્પિટલના તબીબે મૃત જાહેર કર્યો હતો અને આ અંગેની જાણ તેના પરિવારજનોને થતા હોસ્પિટલે દોડી ગયા હતા. આ અકસ્માતમાં યુવાનનું મોત નિપજતા પરિવારજનોમાં શોક પ્રસરી ગયો હતો. આ બાબતે મૃતકનાં ભાઇએ ગીરગઢડા પોલીસમાં અજાણ્યાં વાહન ચાલક સામે ફરીયાદ નોંધાવતા પોલીસે આગળની તપાસ હાથ ધરી છે. જોકે અજાણ્યાં વાહન ચાલકે હિટ એન્ડ રન કરી નાશી છુટતા પોલીસ વાહન ચાલકની તપાસ કરી રહી છે.