કાલથી વડાપ્રધાન મોદી ગુજરાતમાં સૌરાષ્ટ્રમાં ત્રણ જંગી જાહેર સભા ગજવશે

રાજયમાં લોકસભાની ચૂંટણીમાં હવે મોદી ઇફેકટ સર્જવા તૈયારી

કાલે ડીસા અને હિંમતનગર તેમજ ગુરૂવારે આણંદ, જુનાગઢ, જામનગર અને સુરેન્દ્રનગરમાં જાહેર સભા
રૂપાલાના વિરોધ અને ક્ષત્રિય વિવાદના પગલે વડાપ્રધાનની સભા માટે રાજયના ટોચના ત્રણ આઇપીએસ અધિકારીઓને સોંપાતી જવાબદારી: તૈયારીઓને આખરી ઓપ

ખાસ-ખબર ન્યૂઝ રાજકોટ, તા.30

રાજયની લોકસભાની 26 અને વિધાનસભાની પાંચ બેઠકોની તા.7 મેના આયોજીત કરાયેલ પેટા ચૂંટણીના આડે હવે માત્ર ગણતરીના દિવસો જ બાકી રહ્યા છે. ત્યારે આ ચૂંટણીમાં હવે મોદી ઇફેકટ સર્જવા માટે તૈયારીઓને આખરી ઓપ અપાઇ ચૂકયો છે. વડાપ્રધાન મોદી આવતીકાલથી ગુજરાતમાં ચૂંટણી પ્રચારની કમાન સંભાળનાર છે. તેઓ સૌરાષ્ટ્ર-ગુજરાતમાં છ જનસભાથી લોકસભાની સૌરાષ્ટ્ર ઉતર અને મધ્ય ગુજરાતની 15 બેઠકોને આવરી લેશે.

જેમાં આવતીકાલે તા.1 બુધવારના ડિસા અને હિંમતનગરમાં વડાપ્રધાન નરેન્દ્રભાઇ મોદીની જનસભા આયોજીત કરવામાં આવી છે જે બાદ તા. રને ગુરૂવારના તેઓ સવારના આણંદ ત્યારબાદ વઢવાણ, જુનાગઢ અને જામનગરમાં વિરાટ જનસભાને સંબોધીત કરનાર છે. અહીં એ ઉલ્લેખનીય છે કે, રાજકોટ લોકસભા બેઠકના ભાજપના ઉમેદવાર પરસોતમ રૂપાલા સામે ક્ષત્રિય સમાજના વિરોધના પગલે વિવાદના મંડાણ થયા છે ત્યારે સૌરાષ્ટ્રમાં વડાપ્રધાન નરેન્દ્રભાઇ મોદીની જનસભા માટે સુરક્ષાની જવાબદારી રાજયના ત્રણ ટોચના આઇપીએસ અધિકારીઓને સોંપવામાં આવી છે જેમાં રાજકુમાર પાંડેયનને જામનગર, સુભાષ ત્રિવેદીને જુનાગઢ તેમજ અભયસિંહ ચુડાસમાને સુરેન્દ્રનગર ખાતે યોજાનાર વડાપ્રધાન નરેન્દ્રભાઇ મોદીની જાહેર સભાની જવાબદારી સોંપવામાં આવી છે. વડાપ્રધાનની આ જાહેર સભા પૂર્વે રાજયના ગૃહમંત્રી હર્ષ સંઘવી દ્વારા પણ જુનાગઢ, જામનગર, સુરેન્દ્રનગરની મુલાકાત લેવામાં આવી હતી.

આગામી તા. 2 મેના જુનાગઢ ખાતે દેશના વડાપ્રધાન નરેન્દ્રભાઇ મોદી કૃષિ યુનિવર્સિટીના મેદાનમાં જાહેર સભાને સંબોધન કરશે. આગામી 7મેના લોકસભા અને માણાવદર વિધાનસભાની પેટા ચૂંટણી માટે મતદાન થનાર છે. હાલ ચૂંટણી પ્રચાર અંતિમ તબકકામાં છે. તમામ રાજકીય પક્ષો સહિતના મત માટે દોડધામ કરી રહ્યા છે. આગામી તા. 2-5ને ગુરૂવારના બપોરેના 3 કલાકે વડાપ્રધાન નરેન્દ્રભાઇ મોદી જુનાગઢ કૃષિ યુનિવર્સિટીના મેદાનમાં જુનાગઢ, પોરબંદર, અમરેલી બેઠકના ઉમેદવારો માટે ચૂંટણી પ્રચાર કરશે. સભા માટે 60 હજાર જેટલા લોકોનો ટાર્ગેટ છે. બે દિવસ બાકી હોય ત્યારે ગઇકાલથી પોલીસનો બંદોબસ્ત ગોઠવી દેવામાં આવ્યો છે. આસપાસના મકાનો બિલ્ડીંગોમાં પણ બંદોબસ્ત રહેશે. વડાપ્રધાનની તા.2-5ને ગુરૂવારની સભા કૃષિ યુનિવર્સિટીના ગ્રાઉન્ડમાં યોજાશે. તેની વ્યવસ્થામાં સુરક્ષા માટે એસપીજી, કેન્દ્રીય એજન્સીના અધિકારીઓ જુનાગઢ આવી રહ્યા છે. હેલીકોપ્ટરના મોટા ફેરા બે દિવસથી શરૂ થઇ ચુકયા છે.

સભા સ્થળ છાવણીમાં ફેરવાઇ ચુકયું છે. સુરેન્દ્રનગર લોકસભાની બેઠક માટે વડાપ્રધાન નરેન્દ્ર મોદી પ્રચાર માટે સુરેન્દ્રનગરમાં સભા ગજવશે. આગામી તા.2 મેએ મોદી સુરેન્દ્રનગર આવવાના હોવાની ભાજપ આગેવાનોએ જાહેરાત કરી દીધી છે. ત્યારે આગામી તારીખ 2 5 ના રોજ નરેન્દ્રભાઈ મોદી સુરેન્દ્રનગર શહેરમાં ત્રિમંદિર સામે આવેલ વિશાળ ગ્રાઉન્ડમાં ભાજપના ઉમેદવારને જીતાડવા માટેની સભા કરવામાં આવનાર છે ત્યારે સુરેન્દ્રનગરની બેઠક ભાજપ માટે એ ગ્રેડની મનાય છે. છતાં ચૂંટણીમાં ક્ષત્રિય સમાજનો રોષ, કોંગ્રેસના તળપદા કોળી જ્ઞાતિના ઉમેદવાર અને ભાજપના ઉમેદવારને લઇને ભાજપ કચાસ રાખવા માંગતુ નથી. શહેરના ત્રિમંદિર સામે ભાજપે સભાની જાહેરાત કરી છે.

સુરેન્દ્રનગર લોકસભાની બેઠકના પ્રચાર માટે વડાપ્રધાન નરેન્દ્રભાઇ મોદી તા.2ના રોજ સુરેન્દ્રનગરમાં સભા ગજવનાર છે. ત્યારે ત્રિમંદિર સુરેન્દ્રનગર-મૂળી રોડ પર સભાસ્થળે હાલ ડોમ તૈયાર કરવા સહિત તડામાર તૈયારીઓ ચાલી રહી છે. તા.2મેએ વડાપ્રધાન સુરેન્દ્રનગરમાં સભા માટે આવી રહ્યા છે. સુરેન્દ્રનગર-મૂળી રોડ પર આવેલી ત્રિમંદિર પાસેની જગ્યાએ તડામાર તૈયારીઓ ચાલી રહી છે. લોકસભાની ચૂંટણીમાં ઝાલાવાડની આ બેઠક પર છેલ્લા 2 ટર્મથી વડાપ્રધાનની સભા બાદ સમીકરણો બદલાતા હોય છે. ત્યારે આ વખત શું થાય તે જોવું રહ્યું.