માણાવદર ખાતે જિલ્લા કક્ષાની સ્વાતંત્ર્ય દિવસની ઉજવણી થશે: તૈયારીઓની સમીક્ષા બેઠક યોજાઈ

ખાસ-ખબર ન્યૂઝ જૂનાગઢ, તા.6
આ વર્ષે સ્વતંત્રતા દિવસની જિલ્લા કક્ષાની ઉજવણી માણાવદર ખાતે આવેલ આઈસ મીલ કમ્પાઉન્ડ, મીતડી રોડ પર કરવામાં આવશે. આ ભવ્ય કાર્યક્રમના સુચારુ આયોજન માટે ઇન્ચાર્જ કલેક્ટર તેજસ પરમારના અધ્યક્ષ સ્થાને એક ઉચ્ચ સ્તરીય બેઠક યોજાઈ હતી. તંત્ર દ્વારા આ અંગેની પૂર્વ તૈયારીઓ શરૂ કરી દેવામાં આવી છે.
બેઠકમાં કલેક્ટરે વિવિધ વિભાગો પાસેથી માહિતી મેળવીને જરૂરી દિશાનિર્દેશો આપ્યા હતા. જેમાં બેઠક વ્યવસ્થા, વીજ પુરવઠો, પીવાના પાણીની સુવિધા, પોલીસ પરેડ, સાંસ્કૃતિક કાર્યક્રમોનું આયોજન, સરકારી કચેરીઓ પર રોશની, સ્થળની સ્વચ્છતા, મેડિકલ અને ફાયર સેફ્ટી સહિતની તમામ વ્યવસ્થાઓની વિગતવાર સમીક્ષા કરવામાં આવી હતી. તથા દરેક વિભાગને તેમની જવાબદારીઓ સુપેરે નિભાવવા માટે જરૂરી સૂચનો આપ્યા હતા. આ બેઠકનું સંચાલન અધિક નિવાસી કલેક્ટર સુશ્રી કે.બી.પટેલ દ્વારા કરવામાં આવ્યું હતું. બેઠકમાં જિલ્લા વિકાસ અધિકારી એચ.પી.પટેલ, પોલીસ અધિક્ષક સુબોધ ઓડેદરા, ડીઆરડીએ નિયામક જાડેજા, વંથલી પ્રાંત અધિકારી કનકસિંહ ગોહિલ સહિતના સંબંધિત અધિકારીઓ ઉપસ્થિત રહ્યા હતા. કાર્યક્રમને સફળ બનાવવા માટે તમામ વિભાગો સંયુક્ત રીતે કામગીરી કરશે તેમ જણાવવામાં આવ્યું હતું.