કોંગ્રેસ પ્રમુખની રેસમાં દિગ્વિજય સિંહની એન્ટ્રી

સોનિયા ગાંધી અને એ કે એન્ટની વચ્ચે એક કલાક બેઠક ચાલી

ખાસ-ખબર સંવાદદાતા
કોંગ્રેસ પ્રમુખ પદની ચૂંટણી વધુને વધુ રસપ્રદ બની રહી છે. ચૂંટણી મેદાનમાં હવે કોંગ્રેસના વરિષ્ઠ નેતા દિગ્વિજય સિંહની પણ એન્ટ્રી થઇ છે. સૂત્રોના જણાવ્યા અનુસાર દિગ્વિજય સિંહ પ્રમુખ પદની દોડમાં સામેલ થવા સંપૂર્ણપણે તૈયાર છે. તેઓ આજે રાતે દિલ્હી પહોંચી શુક્રવારે ઉમેદવારી ફોર્મ ભરે તેવી શક્યતા છે. ચૂંટણી ફોર્મ ભરવા માટે હવે ફક્ત બે જ દિવસ બાકી રહ્યાં છે.આ દરમિયાન કોંગ્રેસ પ્રમુખ સોનિયા ગાંધીએ પક્ષના વરિષ્ઠ નેતા એ કે એન્ટની સાથે એક કલાકથી પણ વધુ સમય માટે બેઠક કરી હતી.

સૂત્રોના જણાવ્યા અનુસાર આ બેઠકમાં પ્રમુખની ચૂંટણી અને રાજસ્થાનમાં રાજકીય સંકટ જેવા મુદ્દાઓ પર ચર્ચા કરવામાં આવી હતી. બીજી તરફ રાજસ્થાનમાં અશોક ગેહલોતના સમર્થકોેના વિદ્રોહ પછી તે ગેહલોત પ્રમુખ પદની ચૂંટણી લડશે કે નહીં તે અંગે પણ શંકા ઉભી થઇ છે. રાજસ્થાનમાં છેલ્લા કેટલાક દિવસોમાં જે કંઇ પણ થયું તેનાથી ગાંધી પરિવાર નારાજ છે.