રાજકોટના શખ્સની ધરપકડ : સપ્લાયર, મંગાવનાર સહિત ત્રણની શોધખોળ
ખાસ-ખબર ન્યૂઝ રાજકોટ, તા.8
- Advertisement -
રાજકોટમાં દારૂની હેરાફેરી ઉપર ખાસ વોચ રાખવાની સૂચન અન્વયે ક્રાઇમ બ્રાન્ચની ટીમે બાતમી આધારે મોડી રાત્રે રતનપર ગામે દરોડો પાડી 5,61,600 રૂપિયાની કિંમતની 432 બોટલ દારૂ ભરેલી કાર સાથે રાજકોટના બુટલેગરની ધરપકડ કરી કાર, મોબાઈલ, દારૂ સહીત 15,66,600નો મુદામાલ કબ્જે કરી દારૂનો જથ્થો મંગાવનાર અને સપ્લાયર સહીત ત્રણ શખ્સોની શોધખોળ હાથ ધરી છે.
રાજકોટમાં દારૂની ગેરકાયદે હેરફેર ઉપર તૂટી પડવા અને બુટલેગરો સામે કડક કાર્યવાહી કરવા પોલીસ કમિશ્નર બ્રજેશકુમાર ઝા, એડિશનલ સીપી મહેન્દ્ર બગડિયા, ડીસીપી ક્રાઇમ જગદીશ બાંગરવા, એસીપી ક્રાઇમ બી બી બસિયાની સૂચના અંતર્ગત ક્રાઇમ બ્રાન્ચ પીઆઇ એમ આર ગોંડલીયા, એમ એલ ડામોર અને સી એચ જાળવણી રાહબરીમાં પીએસઆઈ વી ડી ડોડીયાની ટિમ પેટ્રોલિંગમાં હતી ત્યારે સ્ટાફના જયરાજ્ભાઇ કોટીલા, રાજેશભાઈ જળુ અને પ્રદીપસિંહ જાડેજાને મળેલી બાતમી આધારે રતનપર ગામે દરોડો પાડી બાતમીવાળી કાર કોર્ડન કરી કારમાં બેઠેલા શખ્સને સકંજામાં લઇ નામઠામ પૂછતાં રાજકોટના કલ્યાણનગરમાં રહેતો મહિપાલસિંહ લગધીરસિંહ ઝાલા હોવાનું જણાવ્યું હતું કારની જડતી લેતા કારમાંથી 5.62 લાખનો 432 બોટલ દારૂ મળી આવતા પોલીસે મહિપાલસિંહની પૂછતાછ કરતા પોતાને રાજકોટના ઘનશ્યામનગરમાં રહેતા હિતેન્દ્ર ઉર્ફે ભૂરો દિલીપસિંહ ઝાલા નામના શખ્સે કાર લઈને મોકલ્યો હતો અને રતનપર આવી પોતે કાર આપી દીધી હતી જેમાં રતનપરના લકીરાજ ઉર્ફે લકી રઘુવીરસિંહ ઝાલા અને હિતેન્દ્રના મિત્રએ દારૂ ભરી આપ્યો હતો જે રાજકોટ લઈને પહોંચે તે પૂર્વે જ પોલીસે ઝડપી લીધો હતો પોલીસે પકડાયેલ શખ્સ સહીત ચાર સામે ગુનો નોંધી 15,66,600નો મુદામાલ કબ્જે કરી હિતેન્દ્ર ઉર્ફે ભૂરો, લકીરાજ ઉર્ફે લકી અને આ બંનેના મિત્રની શોધખોળ હાથ ધરી છે. પકડાયેલ મહિપાલસિંહ સામે 4, હિતેન્દ્ર સામે 2 અને લકીરાજ સામે 3 ગુના નોંધાઈ ચુક્યા છે. રાઇટર દિગપાલસિંહે જણાવ્યું હતું કે પકડાયેલ શખ્સ માત્ર ડ્રાયવર છે તેને કહ્યા મુજબ તે હિતેન્દ્રની કાર લઈને રતનપર ગયો હતો ત્યાંથી કાર લઇ ગયા બાદ ચોક્કસ જગ્યાએ ઉભું રહેવાનું કહ્યું હતું અને કાર લઇ જનાર શખ્સ દોઢ બે કલાક પછી દારૂનો જથ્થો ભરેલી કાર લઈને આવ્યો હતો અને મહિપાલને સોંપી દીધી હતી જેથી કાર આપી ગયેલો શખ્સ ક્યાંથી દારૂ ભરી લાવ્યો તે પણ તપાસનો વિષય બની રહ્યો છે.
દારૂની હેરાફેરી માટે કારમાં ખોટી નંબર પ્લેટ લગાવી હતી
ક્રાઇમ બ્રાન્ચે રાજકોટ મોરબી હાઇવે ઉપર બાતમી આધારે રતનપર ગામે દરોડો પાડી હ્યૂન્ડાઈ કંપનીની ક્રેટા કાર કોર્ડન કરી હતી આ કારમાં નંબર પ્લેટ જોતા જી જે 38 બી જે 2100 જોવા મળી હતી જયારે પોલીસે કારની તપાસ કરતા આ નંબર પ્લેટ ખોટી હોવાનું જાણવા મળ્યું હતું કારના સાચા નંબર જી જે 08 ડી એસ 8725 હોવાનું જાણવા મળ્યું હતું દારૂની હેરાફેરી માટે ખોટી નંબર પ્લેટ લગાવી હોવાનું સામે આવ્યું છે.
