ગત વર્ષોએ કથિત રીતે ચીનથી થયેલ કોરોનાની શરુઆત બાદ હવે ફરી એકવાર ચીનમાં કોરોનાએ હાહાકાર મચાવ્યો છે. વિગતો મુજબ કોરોના મહામારીના કારણે ચીનના ઘણા શહેરો ફરી એકવાર લોકડાઉનનો સામનો કરી રહ્યા છે. ચેંગદુ શહેરમાં દરરોજ સેંકડો કેસ નોંધાતા હોવાને કારણે બે કરોડથી વધુ લોકોને ઘર છોડવાની મનાઈ ફરમાવવામાં આવી છે.
ચીની સરકારના આદેશ અનુસાર, ગુરુવારથી રવિવાર સુધી ચેંગદુમાં એક વિશાળ કોવિડ પરીક્ષણ અભિયાનનું આયોજન કરવામાં આવ્યું છે. દક્ષિણ પશ્ચિમ પ્રાંત સિચુઆનની રાજધાનીમાં તમામ રહેવાસીઓને સાંજે 6 વાગ્યાથી ઘરે રહેવાનો આદેશ આપવામાં આવ્યો છે પરંતુ પરિવારના સભ્યને દૈનિક જરૂરિયાતો પૂરી કરવા માટે બહાર જવા અને ખરીદી કરવાની મંજૂરી આપવામાં આવી છે.
- Advertisement -
ચીનના મેટ્રોપોલિટન ચેંગદુ ગુરુવાર સાંજથી લોકડાઉનનો સામનો કરશે. આ પહેલા ચીનના ડેલિયન અને શેનઝેનમાં કોરોનાના વધતા જતા કેસોને કારણે લોકડાઉન લાગુ કરવામાં આવ્યું હતું. રાજધાની બેઇજિંગ અત્યારે સંક્રમણથી એટલી અસરગ્રસ્ત નથી. જોકે રાજધાનીના પ્રવેશ અને બહાર નીકળવા પર નિયંત્રણો લાદવામાં આવ્યા છે અને લોકોને દરરોજ કોરોના ટેસ્ટ કરાવવા માટે કહેવામાં આવ્યું છે. ચેંગદુ ઉપરાંત ઉત્તરપૂર્વમાં શેન્યાંગ અને દક્ષિણપૂર્વમાં જીશુઇ જેવા શહેરો પણ આંશિક લોકડાઉન હેઠળ છે. રિપોર્ટ્સમાં કહેવામાં આવી રહ્યું છે કે, ચીનમાં ‘ઝીરો કોવિડ પોલિસી’ હેઠળ આવા પગલા લેવામાં આવી રહ્યા છે.
ચીને વિદેશથી આવતા પ્રવાસીઓ માટે તેની સરહદો મોટાભાગે બંધ કરી દીધી છે. હોટલમાં ક્વોરેન્ટાઈન કરાયેલા લોકોની સ્વચ્છતા વ્યવસ્થા અવ્યવસ્થિત હોવાનું કહેવાય છે. વિશ્વ આરોગ્ય સંસ્થાએ સોમવારે ચીનની નીતિને અસ્થિર ગણાવી છે. આ સાથે ચીનની એક થિંક ટેન્કે લોકડાઉન લાદવાના શાસક કમ્યુનિસ્ટ પાર્ટીના નિર્ણય સામે જાહેરમાં અસંમતિ વ્યક્ત કરી છે. તેમનું કહેવું છે કે, મુસાફરી, ઉદ્યોગ અને વેપાર પર પ્રતિબંધ મૂકવાથી આર્થિક અસર થશે.